118
Kure mase, Ritonõpo, orẽpyra jyriryke oya
1 “Kure mase,” kahtoko Ritonõpo a, kure aexiryke,
kypyno xine aexiry enahpỹme roropa exiryke.
2 Ah Izyraeu tõ ynara nykã toto:
“Kypyno xine aexiry jũme enahpỹme mana!”
3 Ah Ritonõpo maro oturuketõ ynara nykã toto:
“Kypyno xine aexiry jũme enahpỹme mana!”
4 Ah aomipona exiketõ emero ynara nykã toto:
“Kypyno xine aexiry jũme enahpỹme mana!”
5 Jetuarimaryhtao Ritonõpo tykohmase ya;
tozuhse ywy eya tanỹse ywy eya jetuarimatoh poe.
6 Ritonõpo ymaro mana, enaromyra exĩko ase;
jyryhmasaromepyra imehnõ mana.
7 Ritonõpo ymaro mana; jakorehmãko mana.
Morara exiryke yneneryme jepetõkara
poremãkapõko mana.
8 Kurehxo mana Ritonõpo enetuputyry kyya xine,
kure hkopyra mana ahno eraximary
kypynanohtohkõme.
9 Kurehxo mana Ritonõpo enetuputyry kyya xine,
kure hkopyra mana tuisa tõ eraximary
kypynanohtohkõme.
10 Jepetõkara jomye exiketõ tuhke toh nexiase,
yrome Ritonõpo Jesẽ jamitunuru ke tonahkase toto ya.
11 Tapuruse exiase eya xine emero rokẽ poe,
yrome Ritonõpo jamitunuru ke tonahkase toto ya.
12 Tõximõse toto ano zũ samo, jomye,
yrome tyahkase toto apoto ke amoriry tõ
tonore exiketõ samo;
Ritonõpo jamitunuru ke tonahkase toto ya.
13 Tõsetapase toh nexiase ymaro tyjamitunuru ke
jetapatohme,
orikyĩse exiase, yrome Ritonõpo jakorehmase.
14 Ritonõpo Jesemy yjamihtanohpõko mana,
orẽpyra jehtohme; typynanohse ywy eya.
15 Etatoko ke, kui ãko mã toto tãkye toehtohkõke
Ritonõpo poetory tomo orẽpyra toexirykõke:
“Ritonõpo jamitunuru ke orẽpyra toehse sytatose!
16 Ritonõpo jamitunuru orẽpyra mana,
ijamitunuru ke kuepetõkara typoremãkase kyya xine.”
17 Orihpyra exĩko ase; mãpyra isene exĩko ase,
imehnõ zurũko ase Ritonõpo Kuesẽkõ nyrityã poko.
18 Tuãnohse exiase yronymyryme eya,
yrome jorihmapopyra nexiase.
19 Ritonõpo Tapyĩ omõtoh tonõ etapuruhmakatoko
moro taka jytotohme;
omõnõko ase Ritonõpo eahmatohme.
20 Sero nase Ritonõpo omõtohme;
aomiry omipona exiketõ rokẽ omõnõko mã toto eya.
21 Oeahmãko ase, Ritonõpo, jomiry totase oya exiryke,
orẽpyra kyripoase roropa.
22 Moro topu, tapyi rinanõ nurumekahpyry,
moro topu se toehse toto, kurãme kuhse exiryke,
tapyi kyryryme nymyry.
23 Moro tyrise Ritonõpo a, osenuruhkatohme
kyya xine!
24 Sero ẽmepyry Ritonõpo nyrihpyryme mana,
orẽpyra toehtohme;
tãkye sehtone, soseahmatone roropa sero ẽmepyry ae!
25 Yna ipynanohko, Ritonõpo, yna ipynanohko!
Yna emãkapoko, Ritonõpo!
26 Kure rokẽ mokyro tyriko, Ritonõpo,
opoe oehkety oesety ke!
Ritonõpo Tapyĩ tae kure rokẽ oripõko ynanase.
27 Ritonõpo Kuesẽkõme mana;
saerehkatoh ekaroneme mana kypona xine.
Amoriry tõ oemary ao, õseahmarykõme
ytoytopitotoko apoto apõ zomye.
28 Omoro mase Jesemy, oeahmãko ase.
Omoro mase Jesemy, imehnõ zurũko ase
imehxo oehtoh poko.
29 “Kure mase, Ritonõpo,” kahtoko
Kuesẽkomo a kure aexiryke,
kypyno xine aexiry jũme enahpỹme exiryke.