83
Izyraeu tõ epetõkara poremãkapõko Ritonõpo mana
Asape nymerohpyry. Eremiatopo.
1 Ritonõpo, mynyhme pyra exiko!
Tehme pyra exiko, oturuko ynanetaryme!
2 Eneko ke! Õmipona pyra oepetõkara mã toto,
õmiry rumekãko ose pyra exiketomo.
3 Osenetupuhnõko mã toto tokare pyra
opoetory tõ poremãkapory poko tyya xine.
Osenetupuhnõko mã toto
mokaro ryhmary poko onewomatyã poko.
4 Ynara ãko mã toto: “Ehmaropa! Izyraeu tõ enahkase,
wenikehtohme toto esety poko jũme.”
5 Oepetõkara atae mã toto tõsenetupuhtohkõ poko;
mokaro atae exiketõ oporemãkapory poko
ynara mã toto:
6 Etõ põkomo te, iximaeu tõ maro;
Moape põkomo te, hakarita tõ maro;
7 Kepau põkomo te, Amõ tõ maro, Amareke tõ
maro, pirixteu tomo te, Tiro põkomo, enara.
8 Axirio tõ roropa osepeme toehse mokaro maro,
tyjamitunuru ke amonita tõ akorehmãko,
moapita tõ roropa, Ro pakomotyamo.
9 Ritonõpo, mokaro tyriko onyrihpyry sã
mitianita tomo a, onyrihpyry sã Xisera poko,
Japĩ poko roropa tuna Kisõ po;
10 Typoremãkase toh oya Ẽtoa po,
ekepyry tõ tymotase nono po.
11 Ituisary tõ tyriko onyrihpyry sã
Orepe tomo a Zeepe maro;
toto esẽ tõ iporemãkapoko Zepa poremãkatopõpyry
sã oya, Saumuna roropa.
12 Ynara tykase toto exiryke:
“Izyraeu tõ nonory sapoitone kuesarykõme ehtohme,
Ritonõpo nonoryme ahtao ro.”
13 Ritonõpo Jesemy, sapararahme mokaro aropoko
putoh katoh samo, tiriiku pihpyry samo
mya tarose ahtao tyryrykane a!
14 Itu zahkary sã apoto a,
emory mã po apoto zukary sã roropa,
15 mya mokaro aropoko tyryrykane konõto ke,
enaromỹke tyriko toto tyryrykane jamitu ke,
wiriwirikane ke.
16 Ritonõpo yna Esemy, mokaro tyripoko
aehxirotyã samo,
ajamitunuru enetupuhpotohme eya xine!
17 Typoremãkase tyripoko toto,
jũme aehxirohpyryme toto ehtohme!
Ah norihno toto, iporemãkatyãme toto exiryke ipunaka!
18 Zuaro imehnõ ehtohme:
Omoro rokẽ Ritonõpome mase, yna Esemy,
Tuisa Imehxo mase,
sero nono põkõ emero Esẽme mase!