81
Oseahmatoko, Ritonõpo Omiry omipona ehtoko
Asape nymerohpyry, inekarohpyry eremiaketõ tuisary a.
1 Oeremiatoko ãtãkyemarykõme Ritonõpo netaryme,
kuewomanekõme mana;
oeremiatoko Ritonõpo Jako Esẽ eahmaryme.
2 Rue tõkehko etotoko tãpori tõ roropa; tãkye ehtoh etotoko rira tõkehko, haapa tõkehko roropa.
3 Rueimo etotoko oseahmatoh ritohme nuno kasenato toehse ahtao zumome nuno toehse ahtao roropa.
4 Morohne mã tyripose Izyraeu tomo a,
Ritonõpo Izyraeu Esẽ nyripohpyry.
5 Toytose Ritonõpo ahtao Ejitu põkõ poremãkapose
tõmihpyry tokarose eya Izyraeu tomo a,
aomipona toto ehtohme.
Omi totase ya onoky omiryme? Zuaro pyra exiase.
Ynara tykase:
6 “Õparykõ poe orohmanohpotohkõ touse ya,
omoxinety ouru samo,
tymyhpokase ropa mexiatose ya,
ruto tõ tijoro tõ ke pehme onupuimara oehtohkõme.
7 Oetuarimarykohtao kykohmatose,
mame kypynanopyatose.
Moroto aotonemyhpyry sã jahtao
tyryrykane konõto ao, kuezukuatose.
Mame kukukuatose tuna enatyry tõ Meripa po.
8 Etatoko ke, ypoetory tomo, ãmorepatohkõ ya!
Izyraeu tomo otato oexirykõ se ase ipunaka!
9 Jũme imehnõ neponãmary oneahmara ehtoko,
imehnõ ritõ pyno pyra ehtoko ipunaka.
10 Ywy ase Ritonõpo Oesẽkomo,
ya touse amarokomo Ejitu nonory poe.
Ẽtakatoko, anahpatorỹko ase.
11 “Yrome ypoetory tõ jomiry etary se pyra
toh nexiase;
Izyraeu tõ jomiry omipona pyra toh nexiase.
12 Naeroro tyyrypyrykõ se exiketõ sã toto tyripose ya,
typenetatohkõ poko toto ehtohme.
13 Otato ypoetory tõ ehtoh se exiase ipunaka,
Izyraeu tõ jomiry omipona ehtoh yzamaro exiry se!
14 Morara awahtao xine oepetõkara poremãkapory ya,
ozehno xine exiketõ wãnopyry roropa.
15 Mokaro, yzehno exiketõ tosekumuru po
porotyry jẽpataka,
toto wãnohtoh jũme exikehpyra exiry.
16 Yrome oya xine tiriiku kurã ekarory
anapyrykõme, ano zeni roropa ekarory oya xine
õkurukõme tuesapare oehtohkõ pona.”