77
Emuhkehkatoh emynyhmaryhtao
Asape nymerohpyry, osekarotohme Ritonõpo a.
1 Opore Ritonõpo kohmãko ase;
opore ikohmãko ase, mame jomiry etãko mana.
2 Popyra ehtoh toehse ya ahtao oturũko ase
Kuesẽkomo a koko, jemary anỹnõko ase
jotururume eya, yrome jemuhkehkara mana.
3 Osenetuputyryhtao Ritonõpo poko
pusuh kapitõko ase;
ipoko emynyhmaryhtao sekese pyra exĩko ase.
4 Jynyhmapopyra Ritonõpo mana;
torẽtykehxo jexiryke oturusaromepyra ase.
5 Pake ehtopõpyry poko osenetupuhnõko ase,
poetome jehtopõpyry poko roropa.
6 Wenikehpyra ase jeremiatopõpyry poko koko ahtao.
Emynyhmãko ro ase ukurohtao,
ya rokẽ ynara ekaropõko ase:
7 “Jũme yna rumekãko Kuesẽkõ nae?
Jũme Ritonõpo zamaro ehsaromepyra ynanae?
8 Yna pyno pyra toehse nae?
Aomihpyry yna a tymyakãmase hnae?
9 Tuenikehse Ritonõpo nae yna pyno toexiry poko?
Yna pyno toexiry tymyakãmase hnae
yna zehno toehtoh ke?”
10 Mame ynara tykase ywy: “Popyrahxo nase
kuakorehmarykõ se pyra toehse Ritonõpo Imehxo
Exikety mana, pake toehtopõpyry sã pyra.”
11 Ritonõpo, wenikehpyra ase onyrityã kurã poko, ajamitunuru ke!
Osenetupuhnõko ase onyrityã osenuruhkatoh
poko pake ahtao.
12 Osenetupuhnõko ase emero onyrityã poko,
emynyhmãko ase onyrityã poko emero ajamitunuru ke.
13 Ritonõpo, onyrityã emero kure mana.
Imepỹ ritõ asã pyra mã ipunaka,
Imehxo Exiketyme mase.
14 Ritonõpome mase, ajamitunuru ke
kure ehtoh rokẽ rĩko mase; imeimehnõ nonory
põkomo a ajamitunuru tonepose oya.
15 Ajamitunuru ke opoetory tõ typynanohse oya,
Jako pakomotyamo te, Joze pakomotyamo, enara.
16 Ritonõpo, oeneryhtao tuna tomo a tõserehse sã mã kehko, zueme exikety tykytyky tykase.
17 Akurũ tomo a konopo tukuãse,
konomerume nexiase kapu ao,
xiaxiake neneneh tykase kapu poko.
18 Konomeru konõto tururume toytose epozakuroko;
nono saereh tykase nenenehkane ke,
nono tykytyky tykase, kywyh kywyh tykase roropa.
19 Pohkane kuroko xikihxikihme mytoase,
osema myriase zue kuroko,
yrome oputahpyry onenepyra toh nexiase.
20 Toky tõ kaneru tõ pyno exikety sã opoetory tõ
tarose oya, Moeze maro, Arão maro.