76
Ritonõpo orẽpyra Exikety
Asape nymerohpyry. Eremiatopo. Inekarohpyry eremiaketõ tuisary a.
1 Ritonõpo waro Juta põkõ mã toto;
imehxo aexiry waro mã Izyraeu tomo.
2 Tapyike mã ynororo pata Jerusarẽ po;
tosao mana ypy Xião po.
3 Moroto tyzehno exiketõ pyre tytahtahkase eya;
toto osewomatoh tonomo, tapema tõkehko,
ipyrekõ emero tonahkase eya.
4 Xixi motye saereh ãko mase, Ritonõpo!
Orẽpyrahxo mexiase toehse ropa awahtao
ypy tõ poe ozehnotokõ poremãkaxĩpo!
5 Mokaro soutatu tõ, jamihme exiketõ pyre
tarose kehko emero;
seromaroro nyhnõko mã toto toorihse,
osewomasaromepyra toexirykõke.
6 Ritonõpo, Jako Esemy, mokaro
enaroximaryhtao oya, kawaru tõ maro epo ytoketõ roropa toepukase, toorihse toto.
7 Ahno emero ouno mã toto. Oẽpataka xikihme ehsaromepyra mã toto, zehno awahtao.
8 Kapu aeino “Awãnohtorỹko ase,” karyhtao mokaro a; zuno toehse sero nono põkomo,
tymynyhpãse ropa toto,
9 towõse awahtao zae apiakatohme oya,
mokaro emero tyrohmanohposã pynanohtohme oya sero nono po.
10 Oxiehno ahno ahtao ro toahmasẽme exĩko mase itamurumehxo;
tõsetapakehse toto ahtao, orihpyra exiketõ oseahmãko mã toto oeahmaryme.
11 Onekarorykõ enehtoko Ritonõpo Kuesẽkomo a
õmihpyry ae ro; osehtoko imehnõ nonory põkomo,
moe pyra exiketomo, onekarorykõ enehtohme
Ritonõpo a. Tõmiry omipona imehnõ ripõko mana emero porehme;
12 kowenu poetory tõ, epyrypaketõ,
poremãkapõko Ritonõpo mana.
Zuno imehnõ nonory põkõ tuisary tõ ripõko mana.