37
Iirypyrymãkõ etyhpyry, kurãkõ etyhpyry roropa
Sero saumu tymerose Tawi a.
1 Torẽtyke pyra exiko popyra exiketõ poko.
Zae pyra ehtoh poko exiketõ poko zumoxike pyra exiko.
2 Onahpoty anoryry sã,
okynã pyra osenepyra exĩko mã toto;
orihnõko mã toto otyro orikyry sã xixi ao.
3 Ritonõpo enetupuhko Oesẽme,
kure ehtoh poko exiko roropa;
morara awahtao kure exĩko mase,
imehnõ zuno pyra Ritonõpo nekarohpyry po.
4 Atãkyemako Kuesẽkõ poko!
Mame openetatoh ekarõko oya mana.
5 Osekaroko Kuesẽkomo a. Oesẽme nymyry
enetupuhko. Mame ãkorehmãko mana.
6 Ajohpe pyra oehtoh ẽmepyry sã tyripõko mana.
Zae oehtoh ripõko mana saerehkatoh samo
tãxiahtao exikety samo.
7 Imehnõ zumoxike pyra exiko,
tineru itamurume apoiryhtao eya xine,
oserẽtykyro pyra exiko imehnõ poko,
typenetatohkõ xihpyry riryhtao roropa eya xine.
Mynyhme rokẽ exiko Ritonõpo nyriry eraximaryme.
8 Zehno pyra exiko, zenonohpyra roropa.
Imehnõ poko atakirimara roropa exiko,
torẽtyke pyra exiko popyra oexiryino.
9 Ritonõpo Kuesẽkõ enetupuhnanõ mã kure rokẽ
exĩko inekarohpyry po kuesarykõme. Yrome
popyra exiketõ mã taroposẽme exĩko mã toto.
10 Okynã pyra popyra exiketõ mã
osenepyra exĩko mana; toto zupiry se awahtao,
toto zupĩko mase repe,
yrome toto onenepyra exĩko mase.
11 Tyamene se pyra exiketõ towomasẽme exĩko mã toto
Ritonõpo nekarohpyry po, tãkye exĩko mã toto,
kure rokẽ exĩko torẽtyke pyra roropa.
12 Popyra exiketõ mã atamorepãko mã toto
kurãkõ poremãkatohme tyya xine.
Zehno sã toto enẽko mã toto.
13 Yrome pohnõ eneryke tyya, exianãko
Kuesẽkõ mana, okynã pyra enahnõko mã toto.
Moro waro Kuesẽkõ mana.
14 Popyra exiketõ typyrekõ apoĩko mã toto:
tapema tomo, taky tõ maro, tymõkomokãkara
etapatohme, etuarimaketõ maro, zae ehtoh poko
exiketõ roropa etapatohme.
15 Yrome mokaro popyra exiketõ totapasẽme
exĩko mã toto tytapemãkõ ke,
itakykõ tytahkasẽme exĩko roropa mã kehko.
16 Kurehxo mõkomo pitiko,
zae ehtoh poko exiketõ mõkomoryme ahtao;
popyrahxo mõkomo itamurume,
zae pyra exiketõ mõkomoryme ahtao.
17 Ynara exiryke mokaro zae pyra exiketõ jamitunuru
enahnõko mana, yrome zae ehtoh poko exiketõ
ewomãko Kuesẽkõ mana.
18 Tõmihpyry omipona exiketõ pynanohnõko
Kuesẽkõ mana;
jũme inekarohpyry esẽme exĩko mã toto.
19 Popyra ehtoh toehse ahtao,
etuarimara exĩko mã toto.
Inapyrykõ ipune mana emitapãtoh konõto toehse ahtao.
20 Yrome popyra exiketõ orihnõko mã toto;
Kuesẽkõ zehnotokõ osenepyra exĩko mã toto
onahpoty ekuru sã jakanahmã po.
Orexĩto sã osenepyra exĩko mã toto.
21 Popyra exiketõ tineru ekaropõko mã
axĩtao rokẽ repe,
yrome onepehmara ropa ekurehnõko mã toto.
Mãpyra zae ehtoh poko exiketõ imehnõ
pynanohnõko mã toto,
tykyryrykõ ekarõko mã toto pitiko rokẽ pyra.
22 Kure rokẽ Ritonõpo nyrityã moroto exĩko mã toto
inekarohpyry po toto esaryme.
Yrome popyra tyripose aexityã enahkãko mana.
23 Zae kuesemarykõ ae kuarotorỹko Kuesẽkõ mana,
tyamaro exiketõ ewomãko mana.
24 Aepukarykohtao jũme toto onemapopyra
Esẽkõ mana,
toto akorehmãko mana owõtohme ropa.
25 Poetome exiase, seromaroro tamuhpõme toehse ywy,
yrome yneneryme zae ehtoh poko
exiketõ onurumekapitopyra Kuesẽkõ mana.
Ipoenõ roropa: “Ise, ise,” kara toto tonahsẽ poko.
26 Imehnõ pynanohnõko mana, tytineru ke
imehnõ akorehmãko mana.
Ipoenõkõ roropa Ritonõpo nekarohpyryme mã toto.
27 Zae pyra ehtoh poe eramako, zae ehtoh
poko oehtohme;
mame opoenõ maro apakõ maro exikehpyra
matose Ritonõpo nekarohpyry po.
28 Zae ehtoh poko exiketõ Kuesẽkõ zamaro mã
toto, typoetory ỹme exiketõ onurumekara mana,
toto ewomãko mana.
Yrome zae pyra ehtoh poko exiketõ pakomotyã
enahketõme mã toto.
29 Zae ehtoh poko exiketõ mã nono esẽme
exĩko mã toto Ritonõpo nekarohpyry po.
Jũme moroto exĩko mã toto.
30 Tuaro exiketõme mã oturũko mã toto,
zae ehtoh poko exikehpyra aomirykõ mana.
31 Ritonõpo omiry ikurohtao xine mana
ikurãkahpyry samo.
Aomiry omipona exikehpyra mana.
32 Zae ehtoh poko exiketõ enẽko
popyra exiketõ mana. Toto etapary se mã toto.
33 Yrome typoetory tõ kurã onurumekara Kuesẽkõ
mana, zehno exiketõ emahpo ahtao;
mame apiakane ẽpataka tarose toto ahtao
toto anaorihmapopyra mana.
34 Ritonõpo enetupuhko Oesẽme,
aomiry omipona exiko.
Nono esẽme orĩko mana moroto tynekarohpyry po,
popyra aexityã enẽko mase tonahkase toto ahtao.
35 Popyra exikety enease tuisame toehse ahtao;
imehnõ ryhmãko kynexine, imehnõ motye tuisamehxo
tõsekarose ynororo repe,
apupari samo ypy Ripano tõ po.
36 Yrome imeĩpo esary kuroko toytose jahtao
onenepyra exiase;
upiase repe, yrome mokyro onenesaromepyra exiase.
37 Zae ehtoh poko exiketõ eneko,
ajohpe pyra exiketõ roropa; atatapoipyra exiketõ
typoenõke, typakõke roropa mã toto,
38 yrome Ritonõpo omiry omipona pyra exiketõ
osenahkãko mã toto,
ipakomotyã osenepyra exĩko, tonahkase.
39 Zae ehtoh poko exiketõ pynanohnõko Kuesẽkõ
mana, toto ewomãko mana popyra ehtoh toehse ahtao.
40 Toto akorehmãko mana,
toto pynanohnõko roropa mana;
tõsewomaporykõke roropa eya xine Ritonõpo a
toto ewomãko mana zehnotokõ poe.