36
Popyra ahno ehtopo
Sero saumu tymerose Tawi a.
1 Ynara enetupuhnõko ase ukurohtao
popyra exiketõ iirypyryme ehtoh poko:
Ritonõpo zuno pyra mã toto,
turumekase ynororo eya xine.
2 Orẽpyrahxo osekarõko mana.
Tyyrypyry onenepyra Ritonõpo mana ekarõko,
tuãnohpyra roropa ekarõko mana.
3 Mokyro otururu popyra mana,
ajohpe itamurume mana; tuaro nymyry pyra mana,
zae ehtoh riry se pyra roropa mana.
4 Tãtaxikase tahtao tynyhtoh po,
osenetupuhnõko mana popyra ehtoh riry poko.
Zae pyra ehtoh esemary ae ytoytõko mana.
Popyra ehtoh poko: “Moro se pyra ase,”
kapitopyra mana.
Kure Ritonõpo ehtopo
5 Ritonõpo Jesemy, yna pyno oehtoh kaetoko
exikety sã mana kapu pona exikety samo.
Anamonohpyra oehtoh yna ewomary poko
itamurume mana, akurũ pona exikety samo.
6 Zae ehtoh poko oehtoh onytyoromara mana,
ypy tõ konõto samo, yna apiakary oya zae mana,
zueme tuna konõto ehtoh samo.
Ritonõpo yna Esemy, ahno pyno mase,
onokyro tõ roropa.
7 Kure kuhse yna pyno oehtoh mana!
Ãporiry tõ zopino jerutumã po osewomãko ynanase.
8 Tuesapare ynanase onekarohpyry ke yna napyryme,
itamurume mekaroase yna a exiryke;
kure oehtoh tuna enahpỹme exikety sã mana,
moro ẽpõko mase yna a.
9 Tuna enatyry sã mase, opoe isene ynanase.
Saerehkaneme oehtoh poe, saerehkatoh enẽko ynanase.
10 Ritonõpo awaro exiketõ pyno exikehpyra exiko.
Kure rokẽ mokaro tyriko
ajohpe pyra exiketõ tukurohtao xine!
11 Epyrypaketomo a, popyra exiketomo a roropa
onutũtũmapopyra exiko.
Jepary se pyra ase mokaro winoino.
12 Moroto mã toto, toepukase; typoremãkase toh
nexiase, owõsaromepyra ropa mã toto.