1 Ritonõpo Jesemy jezurume mana,

enaromyra exĩko ase.

Jewomãko Ritonõpo mana popyra ehtoh

imehnõ zuno pyra jyrĩko mana ipunaka.

2 Popyra exiketõ etonary se ahtao ymaro,

jetapary kukuruhtao roropa eya xine

3 Tapuruse jahtao soutatu tomo a,

zuno pyra jyrĩko mase;

ymaro jepetõkara etonaryhtao,

Ritonõpo onenetupuhkehpyra exĩko ase.

4 Toiro ekaropoase Ritonõpo a,

moro se rokẽ ase eya: Itapyĩ tao jexiry se ase jũme,

5 Mame popyra ehtoh toehse ahtao

Jukurãkãko mana Tytapyĩ kurã tao,

jewomãko mana kaetoko exikety ao, topu konõto po.

6 Moro sã jepetõkara poremãkapõko ase,

japuruhpõkomo. Kohtãko ase atãkyemaryme,

okyno tõ zahkãko ase ynekaroryme Itapyĩ tao;

eremiãko ase Ritonõpo Kuesẽkõ eahmaryme.

7 Ritonõpo, jomiry etako okohmaryhtao ya!

Ypyno exiko, kuezuhko roropa.

8 Ynara mase ya: “Osehko jeahmase.”

Kuezukuase: “Oehnõko ase oeahmase,

9 Otonẽpyra exiko ywinoino.

Yzehno pyra exiko; owinoino jaropopyra exiko.

Jakorehmahpono, jurumekara exiko, toiroro

10 Jurumekaryhtao papa tomo a, aja maro,

ypyno ro mase exĩko, Ritonõpo.

11 Ritonõpo Jesemy, kuamorepako zae ehtoh poko õmiry omipona jehtohme.

Kuaroko zae ehtoh poko jehtohme,

kuewomako jepetõkara tuhke exiryke.

12 Jekaropyra exiko jepetõkara a,

ajohpe jyhxirõko mã toto jenaroximãko mã toto.

13 Zuaro ase isene ro jahtao Ritonõpo Jesẽ

nyriry kurã enẽko ase orihpyra ro jahtao.

14 Ritonõpo enetupuhko. Wenikehpyra exiko

inyrihpyry poko, enaromyra roropa exiko.

Ritonõpo Kuesẽkõ enetupuhko.