26
Zae ehtoh poko exikety otururu Ritonõpo a
Tawi nymerohpyry.
1 Ritonõpo Jesemy, zae exiketyme kuekaroko
zae ehtoh poko jexiryke,
oenetuputyryke ya roropa yronymyryme.
2 Kueneko ukurohtao, ikuhko roropa, Ritonõpo;
ypenetatoh apiakako josenetupuhtoh roropa.
3 Ypyno exikehpyra oexiryke
zae osema ae jarõko mase;
anamonohpyra oexiryke jarokehpyra mase.
4 Ajohpãkõ maro ytoytopyra ase,
kurãkõ panõ ajohpe exiketõ maro osepeme pyra ase.
5 Popyra exiketõ maro oximomyry
se pyra ase ipunaka,
zae pyra exiketõ maro ytoytopyra ase.
6 Ritonõpo, osemahnõko ase
zae jehtoh waro imehnõ ehtohme.
Okyryry apoto apõ zomye ytoytõko ase
imehnõ oeahmananõ maro,
7 eremiãko opoko, “Kure mase,” ãko oya,
onyrityã kurã ekarõko.
8 Ritonõpo Jesemy, atapyĩ sehxo hano, oesary;
saereme oehtoh moroto mana.
9 Iirypyrymãkõ enahkaporyhtao oya jenahkara exiko;
kypynanohko imehnõ etapananõ wãnopyryhtao oya,
10 popyra ehtoh poko exikehpyra
mokaro mã toto; tineru apoiry sehxo
mã toto zae pyra toehtamitume.
11 Yrome ywy, zae ehtoh poko rokẽ ase,
kypynanohko, juãnohpyra exiko roropa.
12 Towomase ywy popyra ehtoh ypoko pyra ehtohme;
Ritonõpo poetory tõ oximomyryhtao
Ritonõpo eahmãko ase, Kuesẽkomo.