7
Zae ehtoh ekaropõko Ritonõpo a
Sero saumu tymerose Tawi a.
1 Ritonõpo Jesemy, oya oehnõko ase jewomatohme;
kuanỹko, kypynanohko jekahmananõ winoino
emero porehme.
2 Reão sã jarory se mã toto ypynanohsaromepyra
imehnõ ehtoh pona, moroto yxihxihkatohme.
3 Ritonõpo, Jesemy, zae pyra ehtoh poko
toehse jahtao, imepỹ popyra tyrise ya ahtao,
4 jepeme exikety towokase ahtao ya te,
imepỹ jepekara popyra tyrise ya ahtao
5 moro sã toehse jahtao ah jepetõkara jekahmã
toto, ah japoĩ toto. Ah jemã toto nono pona
totapase, tynomose ekepyryme nono po.
6 Ritonõpo, owõko ty zehno oehtoh ke,
jepetõkara yzehno ipunaka, iporemãkapoko toto!
Xikihme exiko, kuakorehmako, zae ehtoh se oexiryke.
7 Oximõme imeimehnõ nonory põkõ enehpoko
õmye toto ehtohme, toto tuisaryme exiko kaino kapu poe.
8 Ritonõpo yna Esemy, yna apiakaneme mase,
ahno apiakane emero.
Kuapiakako zae exiketyme, Ritonõpo, zae ehtoh
poko rokẽ jexiryke, ajohpe pyra jexiryke.
9 Ajohpãme sã popyra exiketõ nyrihpyry xihpyry
enahkapoko, kurã ke zae ehtoh poko exiketõ
epehmako. Zae Ritonõpome oexiryke ipunaka, yna
osenetupuhtoh apiakãko mase, yna penetatoh roropa.
10 Ritonõpo, kuewomako osewomatoh samo;
ajohpe pyra nymyry exiketõ ipynanohko.
11 Zae rokẽ apiakaneme Ritonõpo mana;
kokoro rokẽ popyra exiketõ wãnohpõko mana.
12 Tyyrypyrykõ rumekary se pyra toto ahtao,
tytapemã aehtõko Ritonõpo mana.
Tytakỹ toaryhtose eya pyrou tõ ekomatohme.
13 Typyre tõ apoĩko mana toto wotohme,
pyrou ke tuõko mana apoto zukatoh tonõ samo.
14 Enetoko ke popyra exiketõ popyra ehtoh poko
osenetupuhnõko mã toto.
Atamorepãko mã toto popyra ehtoh riry poko,
ajohpe exikehpyra mã toto.
15 Ahno apoitoh rĩko mã toto,
yrome ynaroro omõnõko mã toto moro aka.
16 Moro sã tuãnohsẽme exĩko mã toto
popyra toehtohkomo a.
Tyyryhmasẽme exĩko mã toto,
imehnõ ryhmary se toexirykõke.
17 Yrome ywy: “Kure mase, Ritonõpo,”
ãko ase zae rokẽ oexiryke imehnõ apiakary poko.
Eremiãko ase oeahmaryme, Jesemy
Ritonõpo Imehxo Exikety.