19
Tuisa tõ hnamotoh eremiatoh sero
1 Eremiatoh tyripose ya, Ritonõpo Kuesẽkomo a, Izyraeu tõ tuisary tõ asakorõkõ poko, toto hnamotohme:
2 Reão nohpory sã asa nexiase!
Imehnõ reão tõ maro toytose ynororo.
Typoenõ tuãtanohpose eya, imehnõ reão tõ rãnao.
3 Toiro mũkuru tuãtanohpose eya,
tamorepase eya urakanaketyme ehtohme.
Orẽpyra exiketyme toehse ynororo, ahno esekaneme.
4 Imehnõ nonory põkõ ipoko zuaro toehse,
tapoise ynororo eya xine oramao,
eunaserẽ tyripose eya xine, isyryhmatohme Ejitu pona.
5 Toraximase jeny a aepyry ropa repe,
yrome imũkuru eramara ropa tooehse,
morara exiryke tumũkuru akorõ tuãtanohpose eya.
Tuãtase ynororo, orẽpyra exiketyme, reão, zehno exiketyme.
6 Tuãtase ynororo ahtao toytoytose ynororo imehnõ reão tõ maro.
Zuaro toehse ynororo turakanary poko.
Orẽpyra exiketyme toehse ynororo, ahno esekaneme.
7 Soutatu tõ esary jamihme exiketõ tytohtohkapose eya, pata tõ roropa.
Moro nonory põkõ tykytyky tykase, enaromỹke toexirykõke, aryryãko ynororo ahtao.
8 Ahno tõ tõximõse etonatohme imaro.
Emero rokẽ pata tõ poe toehse toh nexiase.
Tarãpa panõ kõ tyrise eya xine urakanaketõ kyryry.
Tapoise ynororo eya xine apoitoh tao.
9 Eunaserẽ tyripose eya xine.
Tytywyhmase ynororo eya xine jarakapyhpyry aka tyritohme;
mame tarose ynororo eya xine Papironia tuisary a.
Tukurãkase ynororo eya xine ãpuruhpyry tao,
jũme aomiry onetara ropa ehtohme ypy tõ po, Izyraeu tõ nonory po.
Uwa zoko asaratyhpyry poko
10 Izyraeu tomo, uwa zoko sã asakõ mana,
tarykase iporiry ehpio.
Tamorihke tuhke toehse,
toperytase itamurume, uwa tomo, tuna itamurume nae exiryke.
11 Amoriry tõ jamihme nexiase kehko.
Ahtãko nexiase, tuisa myxiryme toehse kehko.
Tahtase ro moro uwa zoko,
amoriry tõ tõnuhse akuru tõ pona;
moino tonese imehnomo a, kae exikety, tamorihke tuhke.
12 Yrome zehno exiketomo a zoko imity tõ maro touse.
Nono pona tomase.
Tyryrykane a xixi tũtatoh winoino uwa epery tanorymase.
Amoriry tõ tytahkase; tasarahse, tyahkase kehko.
13 Seromaroro, ona tonorẽ po moro uwa zoko tarykase mana, nono tonorẽ po, tutunake pyra exikety po.
14 Zoko tyahkase apoto ke;
amoriry kehko tonahkase apoto a uwa tõkehko maro.
Jũme amoriry tõ jamihme pyra exĩko mã kehko.
Jũme tuisa myxiryme exipyra ropa mana.
Sero eremiatoh emynyhmatoh poko, tuhke toremianohse kyya xine.