1 Morarame 6me tõmehse ahtao typoetory tarose Jezu a oseruao rokene. Kaetokõ pona tarose toto, ypy pona. Peturu tõ tarose eya, Peturu, Tiaku, João, enara. 2 Mame tanyhtase ynororo, saeremã sã toehse ynororo toto neneryme. Ẽmyty zemimã sã toehse, xixi samo. Zupõ roropa karimutume toehse, saerehkane samo toto neneryme. 3 Mame Jezu maro Moeze tõ tonese eya xine, Eria maro. Oturũko toh kynexine Jezu maro. 4 Mame ynara tykase Peturu Jezu a,

—Jezu, kure sytatose taro. Ise awahtao tapyi pitiko amoxi oseruao, axĩtao rokene, toiro atapyĩme, toiro Moeze tapyĩme, toiro Eria tapyĩme, enara ehtohme, tykase Peturu.

5 Yrome autururuhtao ro akurũ tooehse, putokane. Mame omi totase toto a akuru htae. Ynara tykase,

—Umũkuru nymyry mosero, umũkuru kurano, yzamaro exikety. Mose omiry etatoko, tykase omi kaino.

6 Mame Ritonõpo omiry etaryke tyya xine tõserehse Jezu poetory tomo. Nono pona toepukase toto pohme. 7 Mame typoetory tomo a toytose Jezu. Tapose toto eya.

—Õwõtoko ropa ty. Oserehpyra ehtoko, tykase Jezu eya xine.

8 Morara exiryke tõsenuhmase ropa toh repe. Yrome mokaro onenepyra ropa toh kynexine. Jezu rokẽ tonese eya xine.

9 Mame toto yhtory ropahtao ypy poe ynara tykase Jezu typoetory tomo a,

—Imehnõ onurupyra ehtoko aporo onenehpyrykõ poko. Tõsemãse ropa jahtao rokẽ imehnõ zurutoko, tykase Jezu eya xine.

10 Mame ynara tykase toto Jezu a,

—Oty katoh ynara ãko Moeze omihpyry poko amorepatõkõ nae, “Eria oehnõko mana osemazuhme,” ãko? tykase toto, tõturupose Jezu a. Mame ynara tykase Jezu eya xine,

11 —Zae ro mã toto, Eria oepyry poko osemazuhme, seropõkõ tuarõtanohpose kapu ae aepyhpyry poko, tykase Jezu eya xine. 12 —Yrome ynara ãko ase oya xine, Eria tooehse mana pake. Yrome onenetupuhpyra seropõkõ nexiase. Tyyryhmase ynororo eya xine. Mokyro ryhmatopõpyry sã Kapu ae Ayhtohpyry roropa ryhmãko mã toto, tykase Jezu typoetory tomo a.

13 Mame morara kary etaryke tyya xine tonetupuhse toto a. João ahno ẽpurihkane poko Jezu otururu tonetupuhse eya xine.

14 Morarame imoihmãkomo a toytose ropa toto. Mame orutua toytose Jezu a. Tosekumuru po typorohse ynororo Jezu ẽpataka. 15 Ynara tykase ynororo Jezu a,

—Ajohpãme sã umũkuru poko oenupunakohxo. Epuepukãko mana. Tuhke toepukase ynororo apoto htaka, tuna kuaka, enara. 16 Mose enehno opoetory tomo a repe. Yrome onukurãkasaromepyra toh kynako, tykase ynororo Jezu a.

17 Ynara tykase Jezu eya,

—Onenetupuhpyra ro matose azahkuru oexirykõke. Okynã amaro xine ywy repe, yrome jenetupuhpyra ro matose. Typenekehse ywy opoko xine. Omũkuru enehko ya, tykase Jezu. 18 Mame zae joroko tutũtanohpose ropa Jezu a. Joroko tutũtase ahtao mokyro ae kure toehse ropa mõtoino rokene, joroko ke taõkemỹpo.

19 Morarame imoihmãkõ maro pyra Jezu ahtao ipoetory tõ toytose eya.

—Oty katoh yna omi poe joroko tũtara ropa kynako? tykase toto Jezu a.

20 Ynara tykase Jezu eya xine,

—Pitiko rokẽ jenetuputyryke oya xine tũtara joroko kynako, õmipona xine pyra kynako. Etatoko pahne, jenetuputyry oya xine pitiko repe, moxitatu puhturu sã repe. Yrome jenetuputyryhtao oya xine, ynara ãko matose sero ypy netaryme, “Ytoko esyryhmako mõtona,” ãko matose. Mame õmi poe xine esyryhmãko mana. Emero tyriry waro exĩko matose. 21 Yrome yronymyryme õtururukohtao rokẽ Ritonõpo maro otuhpyra roropa awahtao xine õtururukohtao, morara awahtao xine rokẽ mokarohne tũtanohpõko ropa matose. Mãpyra yronymyryme oturupyra awahtao xine Ritonõpo a joroko tõ onutũtanohpopyra ropa matose, tykase Jezu typoetory tomo a.

22 Morarame Karirea po tõximõse ropa toto, Jezu maro ipoetory tomo. Mame ynara tykase Jezu typoetory tomo a,

—Kapu ae Ayhtohpyry ekarõko mã toto imehnomo a. 23 Jetapãko mã toto. Yrome oseruao tõmehse ahtao jẽsemãkapõko ropa Ritonõpo mana, tykase.

Mame toemynyhmase toto, ipoetory tomo, yronymyryme.

24 Morarame Jezu toytose Kapanaũ pona typoetory tõ maro. Mame moroto tineru apoine toytose Peturu a tineru pitiko apoitohme Ritonõpo maro oturutoh tinerũme. Toipe juteu tomo, emero jeimamyryae tineru pitiko epehmãko tineru apoine a Ritonõpo maro oturutoh kurãkatohme. Mame ynara tykase tineru apoine Peturu a.

—Ritonõpo maro oturutoh kurãkatoh epehmãko oesẽkõ nae? tykase, tõturupose eya.

25 —Ỹ, tykase Peturu. —Epehmãko mana.

Mame tapyi taka tomõse ahtao ynara tykase Jezu Peturu a,

—Ximão, otara ãko ma? Onokãkomo a tineru epehmapõko seropõkõ tuisary tõ nae, tyekyry tomo a, imehnomo a? tykase Jezu, tõturupose.

26 —Imehnomo a, tykase Peturu. Ynara tykase Jezu,

—Morara ahtao jekyry onepehmara mana. Imũkuru tõ roropa onepehmara mana. Ritonõpo mũkurume ase. Naeroro ya tineru onepehmapopyra mã toto, tykase. 27 —Yrome tohne mokaro riry se pyra sytatose. Morara exiryke kana anỹse ytoko ikuhpo kuaka. Mame osemazuhme kana tanỹse oya ahtao, ĩtaka eneko. Tineru enẽko mase ĩtao. Moro tineru aroko tineru apoine a, Ritonõpo maro oturutoh tinerũme, onekaroryme ynekaroryme, enara, tykase Jezu eya.