1 Ingwer-inger Jesus kwaty alay Galilee-angkwarr alhek, artempel ingwer-ampeny-warl rtnwel artarnpenhek. Kwaty alay itnan ingweran Tiberias. 2 Akngerrel Jesus renh arek, rarl akngerr mwerrilek, rernem renh apentenh-anem. 3 Jesus apwert irrwerl-warl nganenhek, kwertengerl ikwerenh-rnem-akert. Rernem aney-alhek apwert irrwerl ikwerel. 4 Arlta kel arrerirrek-anem, tyenkerr Anperarl Alhek “Passover” rernem arlkwetyek. 5 Jesus-el arnarek, akngerrarl ikwer-warl-athek apetyenh. Ra Philip ayernek, “Nthenh-itwek anwantherr amern ineman, artwa akngerr wantetyek?” 6 Jesus-el arrwekel-antey iterl-arenh, ra ingkerrenh wantetyek, ra Philip arwa ayernek, renh arrkernetyek.

7 Philip angkek ikwer, “Manan anwekantherrenh akelyarl amern payemeletyek anwantherr nthakenh ingkerrenh amernel wantey-angenh.”

8 Kwertengerl ingwer angkek Jesus-ek. Ra Andrew Simon Peter-kenh ayteyikw. 9 “Awey nhenhan amern akely ntang-penh 5-pel-akert, irrpeng akely atherr-then. Nthakenh akngerr wantey-angenh.”

10 Jesus-el kwertengerl-rnem ilek, “Ingwer-rnem ilenherr-arey, rernem ahernel anetyek.” Kel rernem arrernelhek-anem ahern-warl, ahern atherrk-angketyarrel. Artwa akngerr anew-anenh 5,000 ampernem-then arelh-rnem-then. 11 Jesus-el amern inek, rap Akngey-warl angkek, “Anwantherr inkwerelheyel amern nhenh-rnemek, ntwarl anthekek.” Jesus-el amern-rnem kwertengerl-rnemek anthek, rernem arlperrty antheynetyek. Ra kwertengerl ikwerenh-rnem anthek aker irrpeng-rnem-anem, rernem arlperrty antheynetyek. Alakenh Jesus-el amern akngerrilek, irrpeng-rnem-then. Ingkerrenh wantelhek-anem amern-rnem-then aker irrpeng-rnem-then.

12 Rernem amern arlkwek-penh, Jesus-el kwertengerl-rnem ilek, “Amern ampety ilenh-rnem aker-rnem-then akwetyenherr-arey arimpey-angenh.” 13 Rernem amern ampety akwetyeynek, rtnwa 12-warl arrerneynemel. Ampety akngerr-antey ayntenh ahernel, amern akely 5-penh.

14-15 Ingkerrenhel arek-penh, rernemap angkerrenh, “Nhenhey-antey ra, Moses-elarl awank-akerr weth arrwekeleny-rnem ilek, ‘Akngeyel artwa angkakert impen ahern nhenh-warl thwenem.’ Anwantherr renh antwerrkey, atyetyart ilkwa anwekantherr arrernetyek.” Jesus-el iterl-arenh, rernemarl ikwer angkerrenh. Jesus ament-anem apwert irrwerl-warl nganenhek, ikwer-rnem-kety.

16 Atwerrp-atwerrp Jesus-kenh kwertengerl-rnem kwaty alay Galilee-warl alhek. 17 Rernem rtnwewarl nganek, anperl-alhek Capernaum-warl-athek kwaty-angkwarr artarnpenhek. Kel ingwanem irrenhek. Jesus ra ikwer-rnem-warl apetyey-angenh-antey. Ra apwertel-antey anenh. 18 Alherrp ilkwel kwaty renh akngenhelhilek. 19 Kwertengerl-rnem artempel-they 5 kilometre-ek-atwety alhenh. Rernem artewentyel arwerl arlpenty-akert warrkirrenh, kwaty-angkwarr alyarnp alhetyek. Ikwer-they rernem artwa arnarek, kwaty irrwerl-angkwarr ingkel ikwer-rnem-warl apetyenharl, renh-rnem rlwatetyek. Rernem renh alhengk-areyangarl, ikwerety aterirrek. 20 Jesus ilelhek, “Atyengety aterirrey-angenh, ayengan Jesus-arl.” 21 Rernem iterrenh, renh rtnwewarl tywenetyek. Jesus ra rtnwewarl nganenhetyek irrek-anem. Rtnwa kel anamerl-antey artempel-warl irrenhek.

22 Arlta ingwerel, artempel anthenayn-ampeny akngerrakw anenh-rnem, rernem rtnwa anyentant arek. Rernem iterl-arek Jesus ra nganey-angenh-antey kwertengerl ikwerenh-rnem-akert. 23 Rtnwa irrpety ingwer-rnem-anem Tiberias tawen-they apetyek aterterr-warl, rernem amern arlkwek-penh-warl, Jesus amernek inkwerelhemel angkek-penh-warl. 24 Rernem arek, Jesus-arl kwertengerl ikwerenh-rnem-akert alpek. Rernem rtnwewarl nganemel, Capernaum tawen-warl artarnpenhek, Jesus-ek nthwetyek.

25 Jesus renh arek-penh, rernem renh ayernek, “Ingkartay, ilenger nga apetyek?”

26 Jesus-el renh-rnem ilek, “Arrantherr atnerteng innganem, amernekant iterreyel, atyeng iterrey-angenh. 27 Amernek intem-antey iterrey-angenh, ahern-areny-rnem amernekant iterreyel-apeny. Amern ahern-arenyekant iterrey-angenh anayntetyek. Amern ahern-areny arwek amern apmwa, anamerl-antey apmwirrey-angker. Nthakenh itethirrey-angenh amern ahern-areny-angkwarr. Ingkart Akngeyel ayenh arrernek, arrenhantherr itethiletyek, amern anthetyek, itethiley-angker. Arrantherr atyeng-angkwarrant iterretyek.”

28 Rernem renh ayernek, “Nthakenh anwantherr irreman, Akngeyek awelh-ayntetyek?”

29 Jesus-el renh-rnem ilek, “Akngey-kenh-angkwarr alakenh aynteyel, arrantherr ayenh tnaketyek, rarl ayenh thwenek ahern nhewarl.”

30 Rernem renh ilek, “Mwerr-angker nga lwewarrernelha, ilek-ilek mpwara, anwantherr ngenh iterl-aretyek, Akngeyelarl ngenh thwenek ahern nhewarl. 31 Awank-akerr arrwekeleny-rnem alherlewenh apmer aherretyel. Akngeyel renh-rnem amern alker-arenyel wantenh Moses-angkwarr. Ntwa anwenhantherr amern antherl-aynta arlta arrpanenhel, amern alker-areny. Akngey-kenh pipel aynteyel, arrwekeleny-rnemel arlkwenh amern alker-areny.”

32 Jesus-el renh-rnem ilek arrpemarl, “Atha arrenhantherr arraty innga ilem, Moses-el arrwekeleny-rnem amern alker-areny anthey-angenh. Akngey atyenhelant amern anthey-angker.” 33 Jesus ranemarl ilelhek ikwer-rnem, “Akngeyel thwenek amern irrwerl-areny innga artwapeny. Akngeyelarl thwenek ahern nhewarl.”

34 Rernem angkek, “Amern intem-antey antherl-aynta!”

35 Jesus ilelhek, “Ayengarl ran amern arrenhantherr itethiley-angker. Atyeng-angkwarr arrantherr apententy, atha arrenhantherr itethiletyek angka atyenhel. Arrantherr atnerteng-apeny anayntetyek. Angka atyenhel atha arrenhantherr itethilem, atnerteng-anem-apeny, amernel itethilem-apeny, kwatyel itethilem-apeny. 36 Arrantherr ayenh anngetherr areyel, arrantherr ayenh tnakey-angenh. 37 Akngeyel akngerr atyeng-warl atnwenhem. Atha renh-rnem ayerrpilem, nthakenh renh-rnem irrentey-angenh.

38 Akngey atyenhel ayenh thwenek ahern nhewarl. Ayeng ikwer awelheyel. 39-40 Akngey atyenh ilkelheyel-angkwarr, atha renh-rnem ayerrpiletyek. Atha renh-rnem ipmepenh akwentelhileyenh arlta ingkernel. Akngey atyenh ilkelheyel-angkwarr, rernem alerikw ikwerenh ayenh tnaketyek. Rernem ayenh tnakenty, rernem intem iteth aneyenh. Arlta ingkernel atha renh-rnem ipmepenh akwentelhileyenh.”

41 Ra ikwer-rnem ilelhek, “Ayeng amern itethiley-angker, amern irrwerl-areny.” Ikwer-penh rernem renh ayntarrp-ilek irrpelthirremel.

42 Rernem angkerrenh, “Alerikw Joseph-kenh nhenhan! Anantherr aynikw-then amikw-then iterl-areyel, ahern-areny atherr. Ra irrtywerremel ilelheyel ra alker-they apetyenty-arrpantey!”

43 Jesus-el renh-rnem ilek, “Arrantherr atyeng irrpelthirrey-angenh! 44 Akngey rant ingkerrenh atnwenhey-alhem atyeng-warl! Akngey rantey ayenh thwenek ahern nhenh-warl. Rernem atyeng-angkwarr apententy, atha renh-rnem ipmepenh akemelhileyenh arlta ingkernel. 45 Awank-akerr, Akngey-kenh angkakert arrwekelenyel ilek, ‘Akngeyel ingkerrenh akalty-antheyenh.’ Alakenh-anyem rarl Akngeyek awelhem ikwer inkwerelhemel ra atyeng-angkwarr apentem. 46 Artwa ahern-arenyel nthakenh Akngey renh arey-angenh. Artwa rarl Akngey-they apetyek, rant Akngey arek. 47 Atha arrenhantherr arraty innga ilem, artwa anyentel ayenh tnakenty, atyeng irrpelthirrey-angenh, ra iteth intem-antey aneyenh. 48 Ayeng aneyel amern itethiley-angker, ingkerrenh itethileyel intem-antey. 49 Awank-akerr, apmer arlpaw-itwek arrwekelenyel-rnem amern alker-areny arlkwenh. Ikwer-penh rernem intem-antey itethirrey-angenh, amern-angkwarr, amern apmwirrey-angker. 50 Amern nhenh alker-theyarl apetyek. Amern renh arlkwenty, rernem nthakenh ilwey-angenh.”

51 Jesus ranem ilelhek, “Ayeng amern intem-antey itethiley-angker, ayeng alker-they apetyek. Amern nhenh arlkwenty, ra iteth intem anetyek. Amern nhenhan arlka atyenh. Ayeng arlka menty anthelhem, ahern-areny ingkerrenh itethiletyek.”

52 Jew-rnemel awek-penh rernem angkerrenh, “Nthakenh ra anwekantherr arlka anthelhetyek, anwantherr renh arlkwetyek?”

53 Jesus-el renh-rnem akalty-anthenh Jew-kenh tyaty akely-itwek, apmer Capernaum-itwek. “Aray, atha arrenhantherr arraty ileyel. Akngey-kenh Artwa Impen arlka arlkwey-angenh, arrkngethen antywey-angenh, arrantherr nthakenh iteth intem-antey aney-angenh. 54 Arlka atyenh arlkwenty, arrknga atyenh antywenty, rap iteth intemarl aneman. Arlta ingkernel atha renh ipmepenh akwentelhileyenh. 55 Arlka ayeng amern innga, arrknga ayeng antywey-angker inngan. 56 Arlka ayenh arlkwenty, arrknga ayenh antwenty, ayeng ikwer-itwek anem, ra atyeng-itwel anem arrpemarl. 57 Akngeyel ayenh thwenek, ran inngarl aneyel. Ran ayenh itethilek arrpemarl. Atha ingwer-rnem itethilem arrpemarl arlka ayenh arlkwenty. 58-59 Amern alker-they apetyek. Amern nhan arrwekelenyel-rnem arlkwek, rernem ilwekarl. Amern atharl anthem ra intem iteth aneyenh. Amern itethiley-angker ran. Akngeyel amern ikwer-rnem-warl thwenek, rernem arlkwetyek, amern apmwamwam.”

60 Rernem awek-penh rernem ywarn iterrek. Kwertengerl ikwerenh-rnem angkerrenh, “Angka rlterrk innga, nthakenh akaltyirrey-angenh”.

61 Jesus-el renh-rnem iterl-arek, rernemarl angka rlterrk ikwer angkerrenh. Jesus rap angkek-anem ikwer-rnem, “Arrantherr angka atyenh-they ilterreyel, atyeng irrpeltherremel? 62 Ayeng artwa Akngey-kenh innga. Arrantherr ayenh areyenh, irrwerl-warl ayeng alpeyenh innga, arrantherr ayenh tnaketyek, ayengarl arraty angkeyel. 63 Itnwengelant ingkerrenh itethilem, ahern-arenyel nthakenh itethiley-angenh. Itnweng itethiley-angker. Angka atyenh-angkwarr, Itnweng irrkaty-they apetyek, itethiley-angker rantey. 64 Ingwer-rnemel ayenh tnakey-angenh.” Jesus-el iterl-arek arrwekel-antey ingwer-rnemarl ikwer awelhey-angenh. Jesus-el arrwekel iterl-arek artwa weth renh, rarl renh ahayiweyenh ahelengkw-rnem-warl. 65 Jesus angkek arrpemarl, “Alakenh-anyem atha arrenhantherr arrwekel ilek, arrantherr ament atyeng-warl apetyey-angenh arrangkw. Akngey atyenhel arrenhantherr atnwenheyelant.”

66 Ikwer-penh kwertengerl ingwer-rnem Jesus ikwerety intwemelirrek, renh apentey-angenh-anem. 67 Jesus-el kwertengerl 12-pel-anem ayernek, “Arrantherr-alew? Arrantherr atyengety intwemelirrem arrpemarl? Nthakenh arrantherr irrem?”

68 Simon Peter-el renh tyernek, “Ingkartay! Angwenh-warl anwantherr alheman? Angka ngkwenh arraty innga, ingkerrenh itethiley-angker. 69 Anantherr ngenhant iterl-areyel, nga Akngey-kenh Impen Innga aneyel.”

70 Jesus angkek, “Atha arrenhantherr 12-pel arrernek, arrantherr ayenh apenterl-ayntetyek. Artwa anyentel arrenty-angkwarr apenteyel.” 71 Ran angkek Judas ikwer, alerikw Simon Iscariot-kenh. Jesus-el kel renh arrernek, kwertengerl anetyek. Ingwer-inger ra Jesus renh ahayiweyenh ahelengkw-rnem-warl.