1 Jesus ra apmer arrpanenh-warl alhenh ahern Galilee-ampenyel. Ra nthakenh Judea-el aney-angenh, Jew-kenh atyetyart-rnemarl ikwer angkerrenh-kety, rernem renh ipmek atwetyek. Alakenh-kety ra Galilee-el-antey anenh. 2 Arlta ra arrer-anem irrek ingkerrenh Jew-rnem anyentirretyek, rernem amern tyenkerr arlkwetyek, Judea-ampeny-itwek, tawen Jerusalem-itwek. Apmelerr-angkwarr rernem akarrirrenh tyenkerr arlkwetyek, itna Rtakw-angketyarr ikwer-itwek. 3 Jesus-kenh ayteyikw-rnem ikwer-warl angkek, “Ilek-kety nga Judea-ampeny-warl alhey-angenh? Nga Judea-ampeny-warl alhenty, ilek-ilek ntwa anngetherr ingkerrenh-itwek mpwarem, kwertengerl ngkwenhel-rnem anaynt aretyek-awaty, rernemap ngkweng inkwerelhem-anem ngenharl arek-penh, ilek-ilek ntwa mpwarek ikwer-rnem-itwek anngetherr. 4 Nthakenh anyelkel mpwarey-angenh ingkerrenhelap ngenh iterl-arayntetyek anaynt. Ahern nhareny ingkerrenhel ngenh tnaketyek ntwa ilek-ilek mpwarey-angker. Ntwa ingkerrenh-itwek anngetherr mpwaretyek!” 5 Alakenh rernem apal angkek. Rernem ikwer irrpelthirrenh apal.

6-8 Ikwer-penh Jesus-el renh-rnem tyernek, “Ayengan mpwelheyel, Akngey rant ayenh Jerusalem-warl thwenetyek. Ahern nhareny-rnem arrekantherrety arlkarirrey-angenharl, mwerrarl aneyel arrekantherr. Atyengety rernem arlkarirreyel, atharl renh-rnem ileyel, rernemarl apmwangkwarrant apenteyel. Menty arrantherr alhenherr-arey, tyenkerr arlkwetyek. Ayeng artenyarl mpwelheyel-kety.” 9 Alakenh ra arteny anenh Galilee-ampeny-itwek. Ayteyikwant-rnem alhek.

10 Ingkern-they ra ingwer-rnemek ilelhey-angenh anyelkel-antey alhek Jerusalem-warl. 11 Atyetyart Jew-rnem-kenh angkerrenh Jesus renh antwerrketyek. Rernem ingwer-rnem ayernek, “Nthenh artwa Jesus wethan?”

12 Rernem angkerrenh ikwer. Ingwer-rnem angkerrenh “Jesus ra mwerrarl”. Ingwer-rneman tyel-angkerrenh, “Jesus ra irrtywaltharl”. 13 Rernem anyelkel arreytemel angkerrenh. Rernem atyetyart-rnem-kety aterirrek.

14 Arlta irrpety-penh kwentyarl rernem arlkwerrenh-angkwarr-antey, Jesus ra Jerusalem-warl aremirrey-alhek. Jesus-el renh-rnem Akngey-kenh angka akalty-anthek tyaty ilkwitwek. 15 Artwamp-rnemel awek-penh, rernem Jesus ikwer apatemel angkerrenh, “Akalty inngey yanhey! Nthakenh artwa yanhel ingkerrenh-angkwarr iterl-areyel? Ingwer-rnemel renh akalty-anthey-angenh, ra ament apek akaltyirrek!”

16 Jesus-el tyernek, “Angka atyenh-wenyarl nhanyem, atharl akalty-antheyel. Akngeyel ayenh thwenek, angka ikwerenh-akert. Angka atyenhel amenterrpel akalty-anthey-angenh. 17 Arrantherr Ingkart-kenh-angkwarr apententy, arrantherrap ayenh iterl-arem-anem, atharl angka Akngey-kenh angka akalty-antheyel, angka atyenh-weny. 18 Ingwerentyel angka amenterrpel akalty-anthenty, ra tnakelhem ingwer-rnemek. Atha anyent renh tnakeyel, rarl ayenh thwenek, arrantherr renh tnaketyek arrpemarl. Alakenh-anyem atha arraty ileyel, irrtywerremel iley-angenh. 19 Moses-el Akngey-kenh angka rlterrk arrernek arrekantherr arrwekel. Arrantherr apentey-angenharl! Arrantherr ayenh atwetyek angkerreyel, Moses-kenh-angkwarr arrantherr apmwelhileyel.”

20 Ingkerrenhel tyernek, “Ngan arwengkarl! Ilekek nga ilelheyel ngenh atwetyekan?”

21 Jesus-el renh-rnem tyernek, “Arrantherr ayenh arek, atharl artwa lerrp-penh mwerrilek arlta Saturday-el. Arrantherr aremel apateyelpek. Arrantherr angkerrenh, ‘Ran arntety mwerriley-angenh arlta nhel. 22-23 Arrantherr awey akely-rnem artwa mpwaretyek arlta 8-penh. Angka nhenhan Moses-kenh ayntey-angenharl, angka nhenh-rneman arrwekeleny-kenh aynteyel. Alakenh-they arrantherr arlta Kel mwerr. Mwerr atha arntety-rnem mwerrilem arlta Saturday-el arrpemarl Ingkart-kenh-angkwarr.’ ” 24 Jesus-el renh-rnem ilek, “Ingwer-rnem apentey-angenh. Arraty-angkwarrant ntwa apent-ayntetyek, Ingkart-kenh-angkwarrant.”

25 Ingwer-rnem Jerusalem-areny-rnem ayernerrenh, “Artwa nhenh rernem atwetyekarl arrkernelheyel? 26 Nhak renh arenherr-arey! rarl akngerrarl akalty-antheyel, ingkerrenhel renh awetyek! Ingwer-rnemel ahelirrey-angenharl, ikwer arrngert angkey-angenh. Atyetyart-rnemel apek renh iterl-areyel, ra artwa Christ, Akngeyelarl renh thwenek ahern nhenh-warl! 27 Nthakenharlap ran? Anwantherr renh iterl-areyel, ran Christ-wenyarl. Artwa nhenh anwantherr iterl-areyelarl. Ra Nazareth-arenyarl, anwantherr apmer ikwerenh iterl-areyel. Nthakenh Christ-kenh apmer iterl-arey-angenh ahern-arenyel.” Alakenh rernem angkerrenh Jesus ikwer.

28 Jesus-el tyaty ilkwitwek akalty-anthek-antey, ra artewentyel arlkek, “Arrantherr ayenh iterl-areyel nthek-arenyarl ayengan. Ayeng ament arwa apetyey-angenh. Ra ayenh thwenek angka ikwerenh arraty-akert. Arrantherranap renh iterl-arey-angenharl, rarl ayenh thwenek, ra arraty innga. 29 Athant renh iterl-areyel, rarl ayenh thwenek, ayengarl ikwer-they apetyek.”

30 Ingwer-rnemelan angwarenh, Jesus renh antwerrketyek. Akngeyel renh arntarnt-arenh-antey, nthakenh rernem ikwer-warl arrerirrey-angenh-antey antwerrketyek. Rernem renh antwerrkey-angenh, arlta ikwerenh arrerirrey-angenh-antey ra ilwetyek. 31 Akngerrel Jesus renh apentek-anem. Rernem angkerrenh, “Artwa nhenhel ilek-ilek-angkwarr mpwareyel arawerrng ilkwakertel. Artwa Christ nhenhey!”

32 Pharisee-el-rnem awek, rernemarl Jesus ikwer angkerrenh. Rernem ingkart priest, atyetyart-rnem-then anyentirrek. Atyetyartel-rnem iltyemwerney-rnem thwenek, Jesus antwerrketyek. 33 Jesus-el ahelengkw-rnem arnarek, rarl ingkerrenhek ilelhek, “Ayeng arrekantherr-itwek intem-antey nhel aney-angenh. Ayeng ikwer-warl angkep alpeyenh, rarl ayenh thwenek-warl. 34 Arrantherr atyeng nthweyenh, arrantherr nthakenh ayenh arey-angenh. Apmer ikwer-warl ayeng alpeyenh, ikwer-warl arrantherr ywarn-antey alheyenh.

35-36 Artwamp Jew-rnem apatemel ayernerrenh, “Apmer nthek-warlarl alpetyek ran ilelheyel anwekantherr? Apmer nthenh inpa ywerreyelarl? Apmer arleng-warl alpetyek, Jew-rnem akalty-anthetyek, apmer Greece-itwek anew-aneyel-rnem-warl?”

37 Arlta 7-penh, arlta ingkern impen ikwerel rernem tyenkerr arlkwenh-antey, Jesus rtnerl-alhek atayel arlkemel, “Arrantherr angkethakw irrenty, atyeng-warl apetyenherr-arey! 38 Akngey-kenh angka alakenh aynteyel: arrantherr atyeng-angkwarr apententy, arrantherr itethirretyek, angkethakwel kwaty antywem-apeny. 39 Kwaty itethiley-angker-apeny Itnweng Rlwart ran, itethiley-angker arrpemarl ran.” Jesus-el Itnweng Rlwart thwenetyek renharl apenteyel-rnem-warl. Ranap Itnweng Rlwart ikwer-rnem-warl thweney-angenh-antey, arrangkw-antey. Jesus ra ipmepenh itethirrentyel, ra Itnweng Rlwart thweney-alpeyenh ikwer-rnem-warl.

40 Ingwerel-rnem Jesus renh awek-penh, rernem angkerrenh, “Angkakert impen ingwer apek, Nhenhey-antey apetyek, Moses-elarl awank-akerr anwekantherr weth ilenh.”

41 Ingwer-rneman angkerrenh, “Ra Christ apek.” Ingwer-rneman angkerrenh, “Christ ra apmer ingwer-they apey-alheyenh Galilee apmer ikwerenh arrangkw. 42 Akngey-kenh angka alakenh aynteyel: ‘Christ ra atyetyart David-they apetyem. Christ ra ilkwerrey-areny David-kenh apmer-itwek Bethlehem-itwek.’ Bethlehem-itwek atyetyart David anenh awank-akerr.” 43 Alakenh rernem ilterrenh, ament-rnem. Ingwer-rnem Jesus-ek awelhenh, ingwer-rnem awelhey-angenh. 44 Ingwer-rnemel Jesus renh angwarenh, renh anterrkwetyek. Arrangkw-antey, rernem renh antwerrkey-angenh-antey.

45 Ikwer-penhan iltyemwerney-rnem arrangkw-antey alpek-anem tyaty-areny ilkwernem-warl Pharisee-rnem-warl-then, anterrkwey-angenh-antey. Atyetyart-rnemel renh-rnem ayernek. “Arrantherr Jesus nhenh-warl akngetyey-angenh?”

46 Iltyemwerney rernem tyernek, “Nthakenh anwantherr renh antwerrkey-angenh, rarl arraty-angkwarr angkenh. Aleyant anwantherr awek! Artwa ingwerenty ikwer-apeny angkey-angenh.”

47 Pharisee-el-rnem renh-rnem ilek, “Ra arrenhantherr ilpertelhilek angka apmwewarl, ingwer-rnem ilpertelhilek-apeny! 48 Pharisee-rnem atyetyart-rnem-then anwernantherr ikwer awelhey-angenharl, renh tnakey-angenh, mentyaw!” 49 Apal rernem angkerrenh, “Renharl tnakeyel-rnem, rernem Akngey-kenh angka arrwekeleny apentey-angenh akwerrp. Rernem apmwelhileyel Akngey-kenh-angkwarr. Akngeyel renh-rnem ikwerety irrenteyenh.”

50 Nicodemus-el renh-rnem angarek. Artwa wethey arrwekel-antey alhek Jesus-warl ingwel. Ra atyetyart arrpemarl anenh. Ra angkek, 51 “Angka anwekantherrenh aynteyel. Ra ilelhem-tangkwel, anwantherr awetyek, renh atwey-alenty.”

52 Ikwer-they rernem tyernek, “Nicodemus-ay! Galilee-areny apek nga rapeny? Akngey-kenh pip reytemila, ntwa angka renh iterl-aretyek, ‘Angkakert Akngey-kenh Galilee-areny arrangkwarl, apmer ingwer-arenyarl!’ ”

53 [Ingkerrenh apmer-warl alpek.