1 Jesus-el akngerran akalty-anthenh-antey, ingwer-rneman apetyew ikwer-warl angka apmwakert. Rernemap ikwer-warl angkey-alhew, “Anantherran ngwampant apetyew Jerusalem-they. Nhakan akngerr Galilee-areny-rnem aylpew tyaty ilkwewarl Jew-rnem-wenh-warl, Akngeyew kwenerr-aynteyew. Atnwenth-rnem-then rernem Akngeyew atwew arrtyemel. Rernemarl alakenh irrenhewarl, Atyetyart Pilate-wenh ahawarr-rnem rernem alhew, aylpenhew-anem tyaty ilkwewarl. Rernemap Galilee-areny-rnem ingkerrenh atwey-alhew ipmew-antey!”

2 Jesus-el awew, rap ayernew, “Nthakenharl arrantherran iterreyel? Ilek-wety akngerr Galilee-areny-rnem ilwew? Rerneman irrwernelhew, apmwel-ayetharl apek anenh? Akngeyelap apek renh-rnem irrwampenh-antheyew? Ingwer-rnem Galilee-arenyan mwerr-angkwarr apek anenh? 3 Awelhenh-arey atyeng arrantherr! Arrantherr nyerrerremel apmwewety angkeperremer Akngey-warl, arrantherran ilwewerr arrpemarl. 4 Arrantherr apek angka awew, artwa 18 weth-rnem tawen Siloam-areny-akert? Warl arlpenty ilkwa atakelhew, aytnemel ikwer-rnem-warl, lthwew-anem renh-rnem ipmew-antey. Rernem-alew? Arrantherr apek iterreyel, Siloam-areny-rneman apmwel-ayetharl anenh? Akngeyan ikwer-rnem iterrey-angenh apek, renh-rnem arntarnt-arey-angenh, ingkerrenh-anemarl ilwew? Arrangkw, alakenh-weny. Rerneman apmwelhelew, arrantherr-apeny. 5 Arrantherr apmwewety angkeperremer Akngey-warl, arrantherrap ilwewerr arrpemarl.”

6 Jesus-el renh-rnem akalty-antheyew, Akngeyan akngerrew mpwelheyel, rernem angkeperrenhey-alpeyew apmwethey, ra renh-rnem irrwampenh-anthewerr. Rap ilenh-anem angka ikwer-rnem. “Artwa ilkwelan katen atnyenenh, rap arwerl tywerrk-apeny lyapelhelenh katen ikwer-itwew. Rap arerlenty-akngenh amern anentyew arwerl ikwer-itwew ywarn-antey. 7 Rap angkew warrkenh ikwerenhew, ‘Aherrety irrpetyew-anem atha arenh arwerl nhenh amern anentyew. Arrangkwarl! Arwerl nhenhelan ahern arrngelem arrangkwew. Arterney-anem, arwerl ingwerant-anem lyapelheley-alkenh.’ 8 Artwa warrkenh angkew, ‘Artwa ilkway, aherrety anyentew-anem alerl mpwelhey. Alerl atha angerney ahern itwelhelemel, atna pwelek-wenh-anem arrernemel. 9 Aherrety anyent-penhel mwerr-anem apek lyapem. Kel mwerr. Amern aney-angenhan, athap arternemarl.’ ”

Alakenh-anyem Jesus-elan ilenh ikwer-rnem.

10 Ikwer-penh, Saturday-el, arlta ikwerel ltyerrey-angkerel, Jesus aylpenhew tyaty ilkwewarl Jew-rnem-wenh-warl. Rap akngerr innga akalty-anthenh. 11 Arelh arntety anyent anenh. Ran artep apmwa alhenh, nthekwern arratyerrey-angenh, arrangkw. Arrenty anyentel renh arntetyelew awank-akerr, aherrety 18-el. 12 Jesus-el renh arew, rap arlkew-anem, ra apetyeyew. Rap angkew, “Irrepern ngan arelhampw! Atha arrenty ngkweng-wety irrentem.” 13 Rap arelh arnew itepel, rap anamerl-antey arratyerrenhey-alpew-anem. Arelh rap artewentyel inkwerelhew, Akngey nakemel.

14 Artwa rltwa tyatyew-arteyel arew, ra ahelerrew Jesus-ew. Rap ingkerrenh iltew alakenh, “Arlta 6-ant warrkerreyew-arelh. Rlengkan Saturday-el, arlta ltyerrey-angker. Saturday-el anantherr Akngey-warl-athek angkem. Arlta ingwer-rnemel arrantherr apetyemer mwerrel-aynteyewan.”

15 Jesus-el alakenh tyernew, “Arrantherr artwa rltwernem apmwel-ayeth iterreyel, Akngey apenterl-anenty-arrpantey arraty! Arlta arrpanenhel arrantherr atnwenth-rnem tyarlewem, kwaty antywaynteyew, atherrk-then arlkwaynteyew. Nthakenh arrantherr angkethakw iwerl-alhey-angenh, rtnaynteyew parrikel kwen. Saturday-el arrantherran alakenh-anyem iwerl-alhey-angenh arrpemarl. 16 Arrantherranap atnwenthew ilek-ilekew amperrngerrem. Alakenh ayengan amperrngerrew arrpemarl arelhampw nhenhew, atha Saturday-el mwerrelemel.”

17 Artwa rltwernemel awew, rernemap apatew, Jesus-elarl nyerrel-anthew. Ingwer-rneman inkwerelhewarl, Jesus-elarl ilek-ilek mwerr-angker mpwarenhew arawerrng rlterrk-akertel.

18 Ingwer-ingwer Jesus-elan akngerr akalty-anthenh angka Akngey-akertew, rarl atyetyart aneyenh ingkerrenhew. Rap ayernew, “Nthakenharlap Akngey-wenh-rneman akngerrerrem? Ilek-apenyarlap rerneman? 19 Rernemanap arwerl akely-apenyarl. Thip anyent arrernelhem, atharlkw arwerl ikwer-itwew mpwareyew. Arwerlarl ilkwerrem-warl thip akngerr-anem akarrerrem, atharlkw arwerl ikwer-itwew mpwareyew. Alakenh-anyem akngerr-anem akarrerrem Akngey-warl.”

20 Jesus-elap renh-rnem ayernew arrpemarl, “Nthakenharlap Akngey-wenh-rnem akngerrerrem? Ilek-apenyarlap rerneman? 21 Arelhel apek amern rtamp akely atherr-tangkwel ampernem. Rap amperneyneyel akngerrerreyew-atety, ingkerrenhel arlkweyew. Alakenh-anyem Akngey-wenh-rneman irrpetyap-tangkwel, ikwer-they akngerr-anem akngerr-anem irrem.”

22 Jesus alhenh-antey Jerusalem-warl. Rap apmer arrpanenh-warl alhenh, akalty-antherl-apenh akngerr. 23 Ingwerelan renh ayernew, “Atyetyartay! Akngeyel irrpetyap apekant akngeyneyenh, ikwer-itwel aney-alpeyew, akngerr-weny apek arrangkw?”

Jesus-el angkanem ikwer-rnem ilenh. 24 “Arrantherran arraty anemer. Mwanty atyeng iterrenh-arey, irrwerl Akngey-itwel aney-alpeyew. Ranap arriw tyet-angkwarr aylperl-anenty-apeny. Akngerran akethelarl rtnerl-aneyenh warl-itwew. Rernemap twetiwerrerl-aneyenh, kwen aylpeyew-anem. 25 Warlew-arteyelarl arriw akenteyenh, ingwerenty nthakenh kwen aylpenhey-angenh, arrangkw. Arrantherr Akngey-warl-athek arraty aney-angenh-rnem, arrantherrap akethel rtnayntem. Arrantherrap arriwan rltar-atwerl-aneyenh ywarn-antey, ayernerl-aneyenh alakenh-anyem, ‘Atyetyartay! Arriw anewantherr altywerela!’

Warlew-arteyelan tyerneyenh, ‘Arrangkwaw! Athan arrenhantherrenh iterl-arey-angenh! Nthek-arenyarl arrantherran?’

26 Arrantherrap angkeyenh, ‘Iterl-areyelanap ntwa anenhantherr! Anantherrarlap anenh, amern arlkwenh ingkerrel-antey! Ntwa apmer anewantherrenh-itwew akalty-anthenh!’

27 Ranap tyerneyenh arrpemarl, ‘Rwengk, athan arrenhantherrenh iterl-arey-angenh, ayenh apentey-angenharl! Atha apmer arrewantherrenh iterl-arey-angenh! Arrantherr irrtywerremel ayenh apentenh, apmwel-ayeth anemel! Alpenh-arey atyeng-wety!’

28 Ikwer-penhan arrantherr areyenh Abraham, Isaac, Jacob, angkakert Akngey-wenh-rnem-akert. Rernem ingkerr anerl-aneyenh Akngey-itwel. Nthakenh arrantherran ikwer-rnemel-arleng aney-alpey-angenh, arrangkw. Arrantherr ahelerremel artnerl-aneyenh, Akngeyarl arrewantherr-wety intwemelerreyenh. 29 Akngey-wenh-rneman anew-anerl-aneyenh, inkwerelhemel amern kwenty arlkwerl-anemel. Jew-rnem alethang-rnem-then pweyterreyenh anerl-anemel arrpemarl. Rerneman akngerrakw-areny, altwerl-areny, ayerrer-areny, antekerr-areny-akerr. Akngeyelanap renh-rnem ingkerrenh arntarnt-arerl-aneyenh. 30 Akngeyan ilkelhew, Jew-rnem-tangkwel ikwer iterreyew rlterrk. Rernemap ampep-they ipmelhew. Aleyan ingwer-rnemant-anem iterrem ikwer rlterrk. Rernem-tangkwel Akngey-itwel aney-alpeyenh.”

31 Jesus-arl angkenhewarl, artwa Pharisee-rnem apetyew ikwer-warl angkey-alhew, “Artwa atyetyart apmer Galilee nhenh-areny, artwa Herod, ra ilanthew, ngenh ipmew-antey atweyew! Ngan alpeyew apmer nhenh-wety!”

32 Ra tyernew, “Herod ra atyetyart apmwa. Ayengan atererrey-angenh ikwer-wety. Arrantherr iley-alpenh-arey renh, athan arrenty-rnem irrent-ayntem alerl-antey, arntety-rnem-then mwerrel-ayntem. Ayengan warrkerr-ayntem, warrk atyenh atha ywerrelheleyew-atety. 33 Ayengap anperl-alheyenh Jerusalem-warl-anem. Arlta irrpetyel ayeng alpayntem iwerr ikwerel-antey apmer ikwer-warl. Akngeyelan ayenh ilew, apmer ikwer-warl alpeyew. Herod-el nthakenh ayenh ipmew atwey-angenh apmer nhenh-itwew Galilee-itwew, arrangkw. Jerusalem-itwewant ayenh ipmew atweyenhan, angkakert-rnem atwew-apeny ikwer-itwew. Rernemap ingkerr ilwew Jerusalem-itwew.”

34 Jesus-an amperrngerreyelpew Jerusalem-areny-rnemew. “Ayengan ikwer-rnem amperrngerreyel Jerusalem-areny-rnemew! Rernem atwew Akngey-wenh angkakert-rnem, Akngeyelarl ikwer-rnem thwenew. Rernem apwertel wemel, ipmew-antey atwew renh-rnem. Ayenganap ilkelhew, renh-rnem ingkerrenh-antey arntarnt-araynteyew. Ayengan ilkelhew, renh-rnem ingkerrenh akarreleyew, tywek-tywekelarl akely-rnem akarrelem-apeny, aympelhel artemel. Alakenh-anyem. Arrangkwarl! Rernemanap ayenh ingkerrenhel artepelant arew! 35 Alakenh-anyem Akngeyelan apmer ikwer-rnem-wenh Jerusalem arntarnt-arey-angenh. Apmer yanhan alkey-anem aynteyenh. Tyaty ilkwa renhanap atep-atakeyenh, ahernel-anem ayntey-alheyenh. Rernem nthakenh ayenh arey-angenh arleng-alenty apmer yanh-itwew. Ingwer-ingwer ayeng angkep apetyeyenh. Rernemap ayenh areyenh-anem, alakenh-anem angkemel, ‘Artwa nhanyem mwerr-angker! Akngeyelan renh thwenew arawerrng rlterrk-akertel!’ ” Angka nhanyeman Jesus-elan ilenh Jerusalem-areny-rnem-akert.