1 Akngerr-anem akngerr-anem akarrerrenh Jesus-warl, interrenty rtnenherrenh ankertewerrenhanap. Rap kwertengerl ikwerenh-rnemew-tangkwel angkenh. “Mwanty anayntenh-arey, artwa Pharisee-rnem-apeny irrewerr. Rernem aney-angenh, rernemarl angkem-angkwarr. 2 Rernem nthakenh irrtyertel apmwel-ayeth mpwarey-angenh, Akngeyelarl arem-wety. Ra arem, rap apmwan anayntelenhey-alpem angkeparl, akngerrel iterl-areyewan. Arrantherran nthakenh irrtyertel apmwel-ayeth mpwarey-angenh arrpemarl. 3 Kel mwanty angkayntenh-arey. Arrantherr apek ingwerew irrtyertel ingwel angkem. Ingwerentyakel awemarl, rap ingwepenh akngerrew iley-ayntem. Arrantherr apek warl kwen-itwew arreytemel angkem. Ingwerentyakel awemarl, rap atayel angka arrewantherrenh ilem, akngerrel aweyew.”

4 Jesus angkew kwertengerl ikwerenh-rnemew, “Arrantherr atyeng apelty-rnem, athan arrenhantherrenh arraty ileyel. Atererrey-angenh artwa ahelengkw-rnem-wety. Rerneman arrenhantherrenh ipmew atwey-angker. Ipmew atwenty-penhan rernem nthakenh arrenhantherrenh irrwampenh-anthey-angenh-anem, arrangkw-anemarl. 5 Arrantherr Akngey anyent-wetyant atererremer. Ilkelhentyelan rap arrenhantherrenh-tangkwel atwewerr, rap iwewerr rwa ilkwewarl-anem, aletharl ampeyel-warl. Ikwer-wety arrantherr atererremeran. 6 Nyengk yanh-rnemew iterrenh-arey. Anantherran iterrem, nyengkew-rnem apmwewathen. Akngeyanap ikwer-rnem athamerrem, iylpelerlewey-angenh renh-rnem. 7 Arrewantherr Akngeyan athamerrem inngarl. Arrantherr akngerr innga alperr-apeny. Ranap kanper ingkerrenh anyentarl-anyentarl iterl-arem. Rarl thip-rnem arntarnt-arem-apeny, rap arrenhantherrenh mwanty inngarl arntarnt-arem.”

8 Jesus kwertengerl ikwerenh-rnemew angkew, “Ayengan Artwa Inngarl Akngey-wenh. Ayengan arraty arrewantherr angkeyel. Arrantherr ingwer-rnem ilenty, alhewer angkemel, ‘Athan Jesus apenteyel’, ayeng arrewantherr inkwerelhemarl. Athap ilem antyerl Akngey-wenh-rnem, ‘Inngarl rernem ayenh apenteyel!’ 9 Arrantherr apek ingwer-rnem ilem, ‘Athan Jesus-arl iterl-arey-angenh’, ayengap arrewantherr-wety intwemelerremarl. Athap ilem antyerl Akngey-wenh-rnem, ‘Renh-rnem atha iterl-arey-angenhaw!’ 10 Arrantherr apek atyeng apmwel-ayeth angkem, Artwa Akngey-wenh Innga ikwer. Arrantherrap Akngey-warl alakenh angkem, ‘Akngeyay! Apmwa atyeng-wety irrarlka.’ Rap apmwa renh irrarlkem arrewantherr-wety. Rap arrewantherr awakelhey-angenharl, arrenhantherrenh angkep atweyewan, arrangkwarl. Arrantherr apek apmwel-ayeth angkem Inweng Mwerr-angker Akngey-wenh ikwer. Akngeyelanap nthakenh apmwa renh irrarlkey-angenharl arrewantherr-wety, arrangkwarl. Arrantherrap apmwa ikwer-akert-antey anayntem intem-antey.

11 Arrantherr ayenh apententy, mwanty ingwer-rnemel arrenhantherrenh antwerrkewerran, tyaty Jew-rnem-wenh-warl akngewerr-anem. Rernem arrenhantherrenh court-warl apek akngewerr-anem. Artwa rltwernemel-then atyetyart ingwer-rnemel-then rernemap arrenhantherrenh arrkernem, ayern-ayntem-anem intem. Atererrey-angenh, rernemarl ayernem-wetyan. 12 Inweng Mwerr-angker Akngey-wenh ra akalty-anthem, angkeyew arraty, rernem ayernentyan.”

13 Akngerr ingwer-rnem anenh-antey, Jesus-ew awelherrenh. Artwa anyentan angkew ikwer, “Atyetyartay! Awayaty atyenhel-then ayla akngey aylewenh iylpelerlewew. Awayaty atyenhel akngew akngey-wenh ilek-ilek ingkerrenh. Ntwa renh ilemer, ampwal-rnem arlperrtyeleyew atyengarl ingwerentyan.”

14 Jesus-el tyernew, “Ayengan arla, mpwel-wenharl yanhan! Nthakenh atha iley-angenh. Mpwelarrp arlperrtyelenh-atherr!” 15 Rap ingkerrew-anem angkew, “Arternp anemel awelhenherr-arey. Anketyerrerl-aney-angenh! Nthakenh arrantherr ampwal akngerrew inkwerelhey-angenh. Nthakenh ilek-ilekel arrenhantherrenh akngey-angenh Akngey-warl, arrangkw.”

16 Jesus-el angkanem ilenh ikwer-rnem. “Artwa anyent anenh ampwal akngerr-akert. Ra apmer akngerrew-artey anem, rap amern akngerr lyapelhelenhan. 17 Warlan amern akwerneyew-arelh ingkerrenh arrngelew. Rap nthakenh amern lyerteny-rneman akwerney-angenh, ingwer-ingwer arlkwaynteyewan. Rap ywarn-anem iterrew. 18 Rarl ament iterrenh-penh, ra angkew, ‘Alakenh atha mpwarey. Atha warl akely-rnem atakey, ilkwernem-anem arteyneyew. Alakenhan mwerrarl, atha amern ingkerrenh akwerneyew ampwal-rnem-then. 19 Kel ilek-ilek atha atnyeneyel-anem, ayeng ltyerreyew-anem, warrkerrey-angenh-anem. Atha inkwerelhemel amern-then arlkwaynteyew, ngkwarl-then antywaynteyew.’

20 Akngeyel ranap renh arew, angkew-anem ikwer, ‘Ngan apmwel-ayeth iterreyel! Rlengkan ingwel nga ilwem! Amern yanh-rnem-alew, ngkwengarl ntwa amentew akarrelenh? Rernemap ingwer-rnemewant-anem aynteman.’ ”

21 Jesus-el angka ilenh-penh, rap angkew ikwer-rnem, “Alakenh-anyem irrem artwa anketyewan, ampwal mwerr-angker-rnemarl akarreleyel amentew, ingwer-rnem anthey-angenh. Ran Akngeyew iterrey-angenh. Ra iterreyel, rant ilek-ilek atnyenerl-anenty-arrpantey, Akngey-angkwarran arrangkwarl.”

22 Ikwer-penh Jesus angkew kwertengerl ikwerenh-rnemew, “Nthakenh arrantherr intem artewenty iterrey-angenh amernew-then arnkwew-then. Akngeyel arrenhantherrenh arntarnt-aremarl. 23 Mwerrarlap amern-then arnkwethen atnyeneyew. Iteth aneyew mwerr inngarl. 24 Angerl yanh-rnem arenh-arey. Rernem-alew? Rernem irrngwa ilkanthey-angenharl, amern atherrkeny lyapeyewan, arrangkw. Amern ampengerrenty, rernemap akalthemel iney-angenh, arrangkw. Rernem amern warl-warl-anem akwerney-angenh, ingwer-ingwer-anem arlkwaynteyew. Arrangkwarl! Akngey rant renh-rnem wantem, rarl ikwer-rnem athamerreman. Arrewantherranap ran athamerrem inngarl, nthakenh iwerl-alhey-angenh! 25-26 Arrantherr ilkelheyel, arleng-alenty anaynteyew, ampwerreyew-atety. Nthakenh arrantherr iterrey-angenh, arleng-alenty anaynteyew, arrangkw. Arleng-alenty apek arrantherr anem, arrangkw apek. Alakenh artewenty iterrey-angenh, amern akngerr ineyew, arrantherr arlkwaynteyew.

27 Arnkwewan artewenty iterrey-angenh arrpemarl. Alpeyt yanh-rnem arenh-arey. Rernem-alew? Rernem warrkerrey-angenh. Arnkwethen atanthey-angenh, rernem aylpeyew, arrangkw. Mwerr-angkerarl rernem rtnew-rtnem. Atyetyart Solomon, awank-akerrarl anenh, arnkwa mwerr-angker arlkeny-arlkenyelarl ra aylpenh. Arnkwa Solomon-wenh mwerr-angker, alpeyt-rnemanap mwerr-angker inngarl! 28 Akngeyel arnwarnew ilek-ilek alpeyt-rnem atherrk-rnem-then. Aherretyel rernem arlenyerrem, anantherrap arrtyem-anem. Ra ingkerr arntarnt-arem, arrewantherr Akngey artewenty athamerrem, nthakenh iwerl-alhey-angenh! Artewenty iterrey-angenh, arnkwa akngerrel aylpaynteyew. Arrantherran Akngeyewan awelh-aynteyew. Irrtywerremel renh apentey-angenh!

29 Kel iterrey-angenh alakenh, ‘Amern-then aker-then-alew? Kwaty-then teylip-then-alew?’ Alakenh artewenty iterrey-angenh! 30 Ingwer-rnem Akngey iterl-arey-angenh-rnemel rernem alakenh intem iterrem. Akngey irrwerl-arenyel arrenhantherrenh iterl-aremarl, nthakenh iwerl-alhey-angenh. Ra iterl-arem, arrantherrarl amern-weny arnkweweny-thenan aneyelan, rarlap antheman arrewantherr. 31 Akngeyan atyetyart ilkwa ingkerrew, rap arrenhantherrenh arntarnt-areyel. Ikwerew ament arrantherr iterrenty, rap anthem amern-then arnkwethen ampwal ingwer-rnem-thenan arrewantherr.”

32 Jesus angkew kwertengerl 12 ikwer-rnem, “Arrantherran irrpetyap. Atererrey-angenh. Arrantherr yep-yep-rnem-apeny, Akngeyan yep-yepew-artey-apenyarl. Rap arrenhantherrenh ayerrpelew, ikwer-itwel aney-alpeyew. 33 Ampwal-rnem arrantherrarl akarrelenh-rnem ahern nhenh-itwew, arrangkwarlap ikwer-angkwarran. Ampwal-rnem akngerr apwert-then akarrelenty, ingwerentyel irrtyert-inewerr apek, interrkel arlkwewerr apek. Ampwal-rnem tharlemelenh-arey, apwert-anem ingwer-rnemew anthemel arrangkwarl aneyel-rnemew. Arrantherrap alakenh-anyem Akngey-warl anthem. Rap arrernem arrewantherr ilek-ilek mwerr-angker irrwerl-itwew. Mwerr-angker ayntayntem intem-antey irrwerl-itwew, nthakenh ywerrey-angenh, arrangkw. Ingwerentyel irrtyert-iney-angenh, interrkel arlkwey-angenh, arrangkw. 34 Arrantherr iterl-arenty, Akngeyel ilek-ilek mwerr-angker arrewantherr irrwerl-itwew atnyeneyel, arrantherrap intem iterrem Akngeyew. Arrantherr ilek-ilekant atnyenem ahern nhenh-itwew, arrantherranap iterrem ampwal ikwer-rnemewant.”

35-37 Jesus angkew ikwer-rnem, “Mwanty arntarnt-arelh-ayntenh-arey atyeng, ayengarl angkep apey-alheyenh ahern nhenh-warl. Angka nhew awelhenh-arey.

Artwa ilkwa anyent anenh warrkenh akngerrew-artey. Atwerrpan ra angkew ikwerenh-rnemew, ‘Ayengarl alhem-wety atyeng apelty areyew, arrantherran warl atyenh arntarnt-arayntenh-arey. Mpwelherl-anemel, ayengant apey-alpeyew-atety, arntarnt-arelhemel atyeng.’ Rap anperl-alhew ikwer apelty-wenh apmer-warl-anem. Akngerr apmer ikwerel akarrerrenh, amern akngerr inkwerelhemel kwenty arlkwerrenh.

Ingwa ikwerel-antey artwa ilkwa ra alpew warl ikwerenh-warl. Warrkenh ikwerenh-rnem atyek-antey anenh, arntarnt-arelhenh ikwer lyenenty-akert. Rarl arlkey-alpew, rerneman arriw ikwer altywerelew. Artwa ilkwan inkwerelhew, warrkenh ikwerenh-rnemarl atyek-antey ikwer mpwelhemew, rarl ilanthew-angkwarr. Ra renh-rnem ilew arrernelheyew, rap amentel-antey amern-anem ampernew, rernem arlkweyew.

38 Mwerrang awelheyelay? Artwa ilkwa ingwer apek apey-alpew ampepenyel ingwel, aherrk-aherrkel apek. Warrkenh ikwerenh-rnem atyek-antey mpwelhenh ikwer, rernemap inkwerelhey-ayntem, artwa ilkwa ran inkwerelhew arrpemarl ikwer-rnem.”

39 Jesus-elan angka ingwer-anem ikwer-rnem ilenh. “Irrtyert-awarr alhew anyelkel-antey warl anyent-warl. Rap warlew-artey iley-angenh-antey, warlew-artey ra ikwer atyek-anteyarl arntarnt-arelherl-anewerr, alwernemel renh irrentewerrarl. Rap kwen aylpenhew, ilek-ilek-anem inew. 40 Ayengan Artwa Inngarl Akngey-wenh. Arrantherr atyeng arntarnt-arelheyewan, arrantherrarl iterl-arey-angenh, ayengarl angkep apey-alheyenhan. Arrantherr apal anerl-anewerr, ayengan arwapeny apey-alheyenh, aremerrey-alheyenh.” Alakenh-anyem Jesus ilelhenh kwertengerl ikwerenh-rnemew.

41 Peter-el Jesus ayernew, “Ingkartay, 12 anwernantherrant iterrem angka nhenhew? Ingkerrenh-antey apek iterrem angka ikwer?”

42 Jesus-elan tyernew alakenh: “Atha angka arrenhantherrenh artwa akalty-akert ileyew, rarl arraty intem Akngeyew anem. Artwa ilkwel artwa nhelkwer-anyem arew. Rap renh arrernew, atyetyart ampepel aneyew, rarl warrkenh ingwer-rnem arntarnt-araynteyew, amern antherl-aynteyew. 43 Artwa ilkwa alhew-tangkwel. Rarl apey-alpewel, warrkenh renh arey-alpew, mwerrarl warrkerrenh artewentyel. 44 Ra inkwerelhew, rap angkew warrkenhew, ‘Nga mwerr-angker innga warrkerrew. Nhepenh-anyem nga warlewant atyetyart aney-angenh. Ngan atyetyart aneyenh ilek-ilekew; warlew, pwelek-rnemew, atherrkew, ilek-ilek ingkerrenh atyenhew.’

45 Warrkenh ingweran arraty warrkerrey-angenh apek. Ra iterrew, ‘Atyengew-artey apey-alpey-angenh-antey, intem apek alhew.’ Ran iltemel atwenh warrkenh ingwer-rnem, artwernem-then arelh-rnem-akerr. Ran aynterlant-anenh, amernant akngerrarl arlkwemel, ngkwarl-then antywenh, terangkerreyew-atety. 46 Rap apal ayntem, ikwerew-arteyarl apey-alpewel. Artwa ikwerew-arteyel renh artewentyel atwew, irrentemel ingwer-rnemarl anenh-warl, Akngey apentey-angenh-rnem-warl-anem.” Alakenh-anyem Jesus ikwer-rnem angkenh.

47 Jesus-el angka warrkenh-akert anayntelew. “Mwerr arrantherr aweyel angka nhenhan? Warrkenhel iterl-areyel arraty-angkwarr, ikwerew-arteyelarl renh ilanthew-angkwarr, rap alakenh irremer. Ra apmwelhelenty, ikwerew-arteyel renh artewentyel irrwampenh-anthem. 48 Ikwerew-arteyel renh mwanty iley-angenh apek, alakenh ileyew. Warrkenh ra apmwelhelenty, ikwerew-arteyel renh alyepelant irrwampenh-anthem. Kel alakenhaym Akngeyelan anthem warrk akely ingwerenty anyentew. Akngey ilkelhem, ikwer arraty warrkerreyew. Rap renh ayerney-angenh warrk ingwerewan. Akngeyel apek warrk ilkwarl ingwerentyak anyentew anthem-anem. Akngey ilkelhem, ra ikwer arraty warrkerreyew arrpemarl. Nthekwern ra alakenh angkey-angenh, ‘Warrk nhayman ilkwarl, nthekwern atha arnwarney-angenh.’ ”

49 Jesus-elan kwertengerl ikwerenh-rnem akalty-anthenh-antey, rap ikwer-rnem angkew, “Ayeng apetyew ahern nhenh-warl, angka Akngey-wenh ilaynteyew. Ingwer-rnemelan iylparethel awey-angenh. Akngeyel renh-rnem rwewarl iweyenh, aletharl ampeyel-warl. Ayengan iterreyel, ‘Akngey alakenh anamerl irremer!’ 50 Ingwer-rnemel-tangkwel ayenh atweyenh, artewentyel irrwampenh-anthemel. Akngeyel ilew awank-akerr, alakenharl irreyenh. Ayengan artewenty iterreyel-anem mpwelheyel, ayenh rernem ywerrelhelemel ipmew atweyew-atety. 51 Arrantherr apmwel-ayeth iterreyel alakenh, ‘Jesus-ang apetyew ahern nhenh-warl, ingwer-rnem ileyew, akeleyt anaynteyew?’ Arrangkwarl! Akngerr ilterrerl-aneyenh arnerant-arey atyeng-they. 52 Ingwer-rnem altyernem anerl-aneyenh warl anyentel. Ingwer-rnemel ayenh apenteyenh, ingwer-rnemelan arrangkw apek. 53 Rernemap ingkerrenh ilterrerl-aneyenh, akeleyt aney-angenh, arrangkw. Aynenheng-rnem ilterrerl-aneyenh. Amenheng-rnem ilterrerl-aneyenh arrpemarl. Anherrenheng-rnem ilterrerl-aneyenh arrpemarl. Alakenhaym akngerran ilterrerl-aneyenh atyeng-they.”

54 Jesus angkew akngerrarl rtnenherrenhew, “Arrantherrarl akwerrkel-akwerrkel arem, alker-itwewarl artenhey-alpem, arrantherrap alakenh angkem, ‘Ya, rlengkan kwatyarl rntwem.’ Raw inngarl rntweman. 55 Arepal pwenty, arrantherr alakenh angkem, ‘Ya, aherrety-anem irrenhey-alpeyenh alerl-antey.’ Rap inngarl aherrety irreman. 56 Arrantherran arraty iterrey-angenh! Arrantherr arem akwerrkel-akwerrkel-then arepal-then, arrantherrap arem, nthakenh irreyenh. Arratyip! Arrantherr iterl-aremer, ran aynteyenh, ayengarl angkeyel-angkwarr. Rlengkan arrantherr anngel ilek-ilek areyel. Arrantherrap iterl-arey-angenh, nthakenh irreyenh arrwekel.

57 Arrantherr iterl-aremer, arraty aneyew. Kel arrantherr arraty anayntenh-arey! 58 Athan angka ilem, arraty-angkwarr aneyew-arelh. Mwanty innga iterrenh-arey! Ntwa apek ingwerenty iltenh. Ra apek artewenty ahelerrew ngkweng, ngenh court-emeleyew apek. Nga angkemer ikwer-warl, arternp ikwer awelhemel. Ra apek ngkweng angkem, ‘Menty-anem iylpelerrey’. Alakenhaym mwerrant-atherr-anem mpwelanth pweyterremarl. Ngetangkwel apek ikwer-warl ilelhey-angenh, ra ngenh inngarl court-emelewerr. Artwa court-ew-arteyel ngenh ilem, apwert akngerr ikwer antheyew. Ra ngenh ahayiwem-anem iltyemwerney-warl, akwernem-anem iltyemwerneyel ngenh. 59 Ngenhap arlengew-alenty tyayl-itwew atnyenem, ntwa apwert antheyew-atety, artwa court-ew-arteyelarl ilanthew-angkwarr.” Alakenh-anyem Jesus-el akngerr akalty-anthenh.