1 Yeiqsul aivq nail yaqlaol juq bhai ge bhiq-a nail: “Aq-u phao hulmeeq hulbhao teevq gaq, aivq nail phul heel yalkav bhai heldaiq nail yaqkav teevq gaq jaol laoq thaq nail ngaol. Teevq n neq, yalkav bhai heldaiq nail al gaq, ilheel gaq nail yalkav yuq ha thailthaiq nail ganl, yu ilheel gaq bhai ge bhiq lal-a nail ngaol. 2 Ilheel gaq aivq bhai khul khi, ‘Naoq nail ganl, ngaq-i mail ya gaiq-a nail khe-ai ngel naol laiq. Naoq-i mail yalkav bhai heldaiq thailthaiq nail gevq-ai thaq nail haoqgavq aqphul al, ngaq bhai bhiq heldaiq lavq yaoq. Niai nee pultavq neq, yalkav bhai heldaiq nail ganl niil, naoq bhai maq bhi nl yaoq-aol’ dai, aivq bhai ge bhiq-a nail ngaol.

3 Aq-u phao, yalkav bhai heldaiq nail gaq aivq nail neema lavqkhoel bhai niailhai noeq nail ngaol: ‘Ngal khalhai khi heeq meeq. Ngaq nail ilheel gaq, aivq nail yalkav bhai heldaiq nail ganl niil nail lavqkhoel nee ngaq bhai the dov lavq naol. Ngaq bhai neq, miltsaq-ai duq duq-ail maq nl maq hal tsaol-il. Yu bhai hal jaq hal daol-ail khi ngaol-aoq, haqsil lal-il. 4 Phul heel yalkav bhai heldaiq nail ganl niil nail lavqkhoel nee, ngal ya dov ail-u phao, yu nail ilkhaol-ai ngaq bhai hav lavq dai, ngal khalhai ya khi nail dai, noeq dov lal-aoq naol’ dai, aivq noeq nail ngaol.

5 Aivq aivq nail ilheel gaq bhai gailjiov bavq nail tsaol-aq teevq gaq khai-aq teevq gaq bhai, aivq khul-ail khi, iqmoeq khe gaq bhai, ‘Naol ngaq nail ilheel gaq bhai gailjiov khadai bavq nail-aiq’ dai, naldaiq bhiq-a nail ngaol.

6 ‘Saqloq aqbhaol nail aqtseel teevq yal bhun bavq naol’ dai ge kovq bhiq-a nail ngaol. ‘Naoq nail haoqgavq aqphul oil khi, lavqtsail mail jaoldeel khi, ngaq tsel bhun taivq-ail gevq thaq-ai yaoq’ dai, yalkav bhai heldaiq nail al gaq aivq bhai ge bhiq-a nail ngaol.

7 A bhai nee ngal-aq, aivq yaoq gaq yaoq bhai, ‘Naol gailjiov khadai bavq nail-aiq’ dai, naldaiq-u phao, ‘Gov teevq yal hav bavq naol’ dai, ge bhiq-a nail ngaol. ‘Naoq nail haoqgavq aqphul oil lavq khi, eivq tsel hav taivq-ail gevq thaq-ai yaoq’ dai, yalkav bhai heldaiq nail al gaq aivq bhai ge bhiq-a nail ngaol.

8 Phul heel yalkav bhai heldaiq nail maq see maq daol nail al gaq, neenoeq neekha yuq nia nail ngel-i mail, ilheel gaq aivq bhai tsiqeeq nail ngaol. Khul khi mail dai ngal-aq neq, miltsaq yaq juq neq, miltsaq kovtavq bhai doevq nail yeel lavqkhoel, aqbhaq nail yaq juq nee maqtsil neenoeq neekha yuq nia nail ngaol. 9 Alheel ngel-i mail, ngal nuljuq bhai ge lavq bhel. Phul heel yalkav neq, miltsaq kovtavq khe nlmaoq pevq khi ngaol-aoq, aqtsaoq bhao lal dai, al yuq yaoq. Phul heel yalkav al gil haq neq, nqmaq maqluv halyeel doevq nail jaol duq khe aqtsaoq al neq, naoq bhai hav lavq nail ngaol.

10 Ganl gal yaq phaq nl-u phao, saljial ivq nail tsaol-aq neq, ganl gal ma phaq nl-u phao iqsanl, saljial ivq naol. Ganl gal yaq phaq nl-u phao, saljial maq ivq nail tsaol-aq neq, ganl gal ma phaq nl-u phao iqsanl, maq see maq daol-ail. 11 Alheel ngel-i mail, nuljuq miltsaq niil nail phul heel yalkav yuq-u phao saljial maq ivq haq neq, nqtavq kovtavq khe phul heel yalkav khaq sil gaq nuljuq bhai av lavq nail-aiq. 12 Nuljuq yu nail phul heel yalkav yuq-u phao, saljial maq ivq haq neq, nuljuq bhai khaq sil gaq yalkav gaoq bivq lavq nail-aiq.

13 Yaqkav khul gaq maqkhaiq, heeqphaq nvq gaq nail yaqkav maq jiovq kivq-ail. Teevq gaq bhai neejiav jiav haq neq, teevq gaq bhai gaiq-a nail ngaol. Teevq gaq bhai ev haq neq, teevq gaq bhai khal ge movq-ail ge nail ngaol. Alheel ngel-i mail, nuljuq Miqyail nail yaqkav khi mail phul heel nail yaqkav teevq pov nee, maq jiovq kivq-ail” dai, ge bhiq-a nail ngaol.

14 Phaqliqsail juq neq, phul heel bhai maivjeel jeel nail tsaol-aq ngel-i mail, ganl al juq iqsanl mail ya gaiq-u phao, Yeiqsul bhai meelnaq meelnaq-ail helsil nail ngaol. 15 Yeiqsul aqyu juq bhai ge bhiq-a nail: “Nuljuq neq, tsaol-aq nail sivtavq bhai tsaq nail daol nail khe-ai tavq khi ngaol-aoq, Miqyail nuljuq nail neema bhai heeq nia nail ngaol. Khul khi mail dai ngal-aq neq, tsaol-aq-i mail thaqeeq nail phaq bhai, Miqyail maq heldaiq nul-ail” dai, ge bhiq-a nail ngaol.

16 Yeiqsul gaoq ge nail: “Aoldaoq kovqdaoq khi mail Miqyail nail haqbhoil gedan nail juq nail daoq neq, ulcuvq saol bhiq nail Yaolhaq nail yeel maq kev lee-u phao khe nail haqbhoil ngaol. A bhai nee ngal-aq, Miqyail Milkhaoq nail ganl lavqkhiq tsail nail geeqlaoq daoq cavq bhiq-a nail ngaol. Miqyail Milkhaoq neq, aqdoil nl bhiq-a nail mee nia phaq bhai daq jel lavq nail ngaol. Haqeiv nail tsaol-aq juq milkhaoq al khaoq bhai genl dev gaq nail dai khi laijai nail ngaol. 17 Nqtavq khi mail miltsaq peivq-ail nail haq nail nee maqtsil, aoldaoq kovqdaoq lavqkhoel khe, haoqgavq aqgevq gevq yaq teevq gevq peivq-ail nail neq, haq jaiq nail ngaol” dai, ge bhiq-a nail ngaol.

18 Yeiqsul gaoq ge nail: “Yovqgavq nail khaqma kovq khi yaoq gaq yaoq bhai hevq nail tsaol-aq yaoq gaq yaoq-ao nee, nl bheeq-a nail ngaol. Yu nail miqkovq hevq-a nail juq iqsanl, yu nail khaqma bhai nl bheeq-a nail ngaol” dai, ge bhiq-a nail ngaol.

19 Yeiqsul gaoq ge nail: “Aq-u phao, hulmeeq hulbhao teevq gaq jaol laoq thaq nail ngaol. Aivq neq, nel nav nav nail aqgaq aqdoi doi khi mail, mailma-ail meeq nail aqgaq aqdoi bhatsuq doi khi, yaoq n yaoq n nee lavqkhiq tsail nail lavqkhoel, jaq bov daol bov nail ngaol. 20 Hulmeeq hulbhao al gaq nail iqphaiq phao khe lolgov aqjail bhai, Laqyaqlul dai mil-ai thaq nail hal jaq hal daol nail teevq gaq bhai, yu bavq thaq-ai lal-a nail ngaol. Laqyaqlul al gaq, aqmaol maollao lao-ail malyal daol nail ngaol. 21 Aivq neq, hulmeeq hulbhao al gaq nail kovqkhail kov-uvq bhai jaq khal-ai thaq nail juq bhai jaq movq-ai bhiq nail ngaol. Thailhai ngaol-aoq, kheeq lal khi, aivq nail malyal bhai mevq-a nail ngaol.

22 Teevq n neq, haq nail aoq nail al gaq sil khi, nqtavq gaqkhoel aivq bhai Aqbhaqlaqhaq jaol nail bha hevq dal laivq-a nail ngaol. Hulmeeq hulbhao al gaq iqsanl sil khi, yu aivq bhai duqpheeq-a nail ngaol. 23 Hulmeeq hulbhao al gaq neq, sil nail milkhaoq lavqkhoel bhai, haq dee aoq deedee nail bhai ya daq-a nail ngaol. Aivq gaollel daiq-u phao, eqyal bha Aqbhaqlaqhaq bhai maqkhaiq, Aqbhaqlaqhaq nee mail Laqyaqlul jaol nail bhai maqkhaiq, ya moel-a nail ngaol. 24 Aq-u phao, aivq mailma-ail ge nail: ‘Aqbhu Aqbhaqlaqhaq-ol, ngaq bhai gaoqhaq lavq yaoq. Miqjaq niil nail lavqkhoel bhai, ngal ya daq deedee thailthaiq nail ngel-i mail, Laqyaqlul aivq nail lavqnoil ulcuvq bhai tsaoq deev khi, ngaq nail moeqlal jieiv lal dai, bhi jiav bhoel-aivq leevq lavq yaoq’ dai, hal nail ngaol.

25 Aq-u phao, Aqbhaqlaqhaq ge kovq bhiq-a nail: ‘Yaqyov-ol, naol miltsaq kovtavq bhai doevq-u phao, aqmeeq bhoil ya teiv khi, Laqyaqlul neq, aqdoil bhoil ya teiv-a nail bhai, thaq nioilpeivq dei-eiq. Niil aq-il, aivq niilniai neesal-ovq nail lavqkhoel ya jaol khi, naol neq, haq nail aoq nail lavqkhoel bhai, ya daq thailthaiq nail ngaol. 26 Al ovqtavq, nvjuq khi mail nuljuq nail gaiqlaq bhai gaqlaovq khoeq navq jiav nail ngaol. Alheel ngel-i mail, niilniai nee mail nuljuq jaol nail bha yu lee movq khi ngaol-aoq, maq lee nia-ail. Nuljuq jaol nail nee mail, nvjuq jaol nail bha yu lal movq khi ngaol-aoq, maq lal nia-ail’ dai, ge bhiq-a nail ngaol.

27-28 Hulmeeq hulbhao al gaq ge nail: ‘Thailhai phal-iq neq, ngal naoq bhai niailhai hal movq-ail nial, aqbhu-ol. Ngaq nail mailnail ngaq gaq doevq-ail ceevq-a nail ngel-i mail, aqyu juq iqsanl mail, haq dee aoq deedee nail niilniai maq ya kev lee dai, Laqyaqlul bhai ngaq nail aqbhu nail ilkhaol bhai khoel gai-aivq khi, aqyu juq bhai mailma-ail bhi cavq bhi cov-ail yaoq’ dai, aivq hal nail ngaol.

29 Aq-u phao, Aqbhaqlaqhaq ge kovq bhiq nail: ‘Aqyu juq jaol nail bhai Molseiq khi mail Miqyail nail haqbhoil gedan nail juq-i mail gevq-ai thaq nail haoqgavq jiav nail ngaol. Alheel ngel-i mail, aqyu juq, daoq al juq bhai ya naldaiq nail ngaol’ dai, ge bhiq-a nail ngaol.

30 Hulmeeq hulbhao al gaq ge nail: ‘Aqbhu Aqbhaqlaqhaq-ol, thailhai ngaol-aoq, al taivq-ail maq lovq-ai haq-al. Gaoq doevq kovq lal thaq nail teevq gaq ganav aqyu juq jaol nail bha ail haq neq, aqyu juq oeqbal noeq pov naol’ dai, ge bhiq-a nail ngaol.

31 Thailhai ngaol-aoq, ‘Aqyu juq Molseiq nail daoq khi mail, Miqyail nail haqbhoil gedan nail juq nail daoq maq naldaiq haq neq, teevq gaq ganav gaoq doevq kovq lal khi ngaol-aoq, aqyu juq neema maq thaqtsaol-ail dai, Aqbhaqlaqhaq ge kovq bhiq-a nail ngaol.’ ”