1 Yeiqsul aivq nail yaqlaol juq bhai ge bhiq-a nail: “Yu bhai bhi nl laiq nail phaq jiav lal nail ngaol. Thailhai ngaol-aoq, yu bhai bhi nl laiq nail gaq neq, geeqlaoq aqdoil ya nail ngaol. 2 Tsaol-aq al gaq, yaqnoil niil juq nail lavqkhoel khe teevq gaq ganav bhai bhi nl laiq nail nee maqtsil, aivq nail leelkhaol bhai lovmav heeq ma pheethaiq khi iqyaq iqma bhai bavq puvq ail haq neq, aivq nail haqbhoil meeq jaiq nail ngaol.

3 Nuljuq aqmeeq-ai yaolphaol yaoq. Naoq nail aqivq jaqbheq naoq bhai nl laiq lavq haq neq, aivq bhai mailma-ail cavq bhiq cov bhiq yaoq. Aivq oeqbal noeq pov haq neq, aivq nail oeqbal phaiq bhiq yaoq. 4 Aivq teevq n nail lavqkhoel bhai taivq-ail sivq pov kev dai, naoq bhai nl laiq lavq khi, ‘Ngal oeqbal noeq pov naol’ dai, naoq bhai sivq pov kev daiq ge lal haq neq, naol aivq nail oeqbal ya phaiq bhiq nail ngaol” dai, ge bhiq-a nail ngaol.

5 Aq-u phao, gaqkhoel juq ge nail: “Nvjuq naoq bhai neema thaqtsaol nail phaq, mao lal dai nl lavq yaoq” dai, Heeqphaq Yeiqsul bhai hal nail ngaol. 6 Yeiqsul ge bhiq nail: “Nuljuq ngaq bhai neema thaqtsaol nail phaq gaoqpavq nail aqneev dai, eeq haq neq, heeqlaoq gaoqmaiq aqbhaol niil bhaol bhai, ‘Naol naoq nail daoqtsail gaol khi, iqyaq iqma bhai doevq-ail yaoq’ dai, ge bhiq-u phao, aqbhaol al bhaol nuljuq nail daoq naldaiq nail ngaol” dai, ge kovq bhiq-a nail ngaol.

7 Yeiqsul gaoq ge nail: “Naoq nail yaqkav teevq gaq, daiyal tseq-ail khi kovq lal-u phao maqkhaiq, yaol lovq-ail khi kovq lal-u phao maqkhaiq, ‘Lavqtsail mail jaoldeel khi jaq lal yaoq’ dai, nuljuq nail lavqkhoel khe teevq gaq ganav aivq bhai ge bhiq naol laiq. 8 Yaqkav al gaq bhai, ‘Ngaq nail haqbhoil aoq jal nl jaq lavq yaoq. Ngal jaq bov daol bov-u kev dai, aqmeeq meeq dai, lainq khi, aoqbhaol lav sav lavq yaoq. Ngal jaq bov daol bov gaq haq neq, naol ya jaq nail ngaol’ dai, ge bhiq nail, maq ngel-ail laiq. 9 Yaqkav al gaq ilheel gaq-i mail khoel nail khe-ai taivq-ail nl-a nail ngel-i mail, ilheel gaq aivq bhai maq tsiqeeq-ail. 10 Alhai dul dai, nuljuq iqsanl, nuljuq bhai khal khoel lavq-a nail phaq taivq-ail nuljuq nl gil-u phao, yovqgavq bhai yovqgavq niailhai ge yaoq: ‘Nvjuq neq, ganl maq tsoiq nail yaqkav juq ngaol. Nvjuq bhai dal nail ganl juq taivq-ail nvjuq nl gil-a nail ngaol’ dai, ge yaoq” dai, ge bhiq-a nail ngaol.

11 Yeiqsul Yeiqlulsaqlaiq meenq bha lai-u phao, Saqmaqliv milkhaoq khi Gaqliqlail milkhaoq nail milkhaiq bhai lai pav-a nail ngaol. 12-13 Aivq julgu teevq gu bhai aol lai thailthaiq-u phao, niaoqbhaoq daol nail tsel gaq micil eqyal bha jaol khi, Yeiqsul bhai moel-a nail ngaol. A bhai nee ngal-aq, aqyu juq “Heeqphaq Yeiqsul-ol, nvjuq bhai gaoqhaq lavq yaoq” dai, mailma-ail gul nail ngaol.

14 Yeiqsul aqyu juq bhai ya moel-u phao: “Nuljuq nail aqmaol Philyaq juq bhai bhi heldaiq ail yaoq” dai, ge bhiq-a nail ngaol. Aqyu juq ail thailthaiq-u phao, meeq lai-a nail ngaol.

15 Aqyu juq nail lavqkhoel khe teevq gaq, aivq meeq lal-a nail bhai heeq nia-u phao, kovq lal khi, Miqyail bhai tsiqeeq deedee-a nail ngaol. 16 Yeiqsul nail aqkhil daoqthaoq bhai miltsaq bhai gaolbeiv-ai thaq khi, Yeiqsul bhai tsiqeeq-a nail ngaol. Tsaol-aq al gaq neq, Saqmaqliv tsaol-aq ngaol.

17 Aq-u phao Yeiqsul ge nail: “Meeq lai-a nail tsaol-aq neq, tsel gaq maq ngel-ail laiq. Goiq gaq neq, khaq bha ail-a nail-aiq. 18 Yu nail jeq-e jaq-a maq ngel nail neq, Miqyail bhai tsiqeeq tsiqheel nail khi mail kovq lal-a nail teevq gaq iqsanl maq jaol-ail laiq” dai, naldaiq bhiq-a nail ngaol. 19 Yeiqsul gaoq ge nail: “Thul khi kovq ail yaoq. Naol ngaq bhai neema thaqtsaol nail ngel-i mail, meeq lai-a nail ngaol” dai, Yeiqsul al gaq bhai ge bhiq-a nail ngaol.

20 “Miqyail Milkhaoq khaq mao kev lee nail-aiq” dai, Phaqliqsail juq naldaiq-u phao, Yeiqsul ge kovq bhiq-a nail: “Miqyail Milkhaoq kev lee nail neq, maivneev moel kivq nail phaq maq ngel-ail. 21 ‘Heldaiq. Niai jiav-ail nial. A bhai jiav-ail nial’ dai, maq ge kivq-ail. Khul khi mail dai ngal-aq neq, Miqyail Milkhaoq neq, nuljuq nail neema lavqkhoel bhai aol nail ngaol” dai, aqyu juq bhai ge bhiq-a nail ngaol.

22 Yeiqsul aivq nail yaqlaol juq bhai ge bhiq-a nail: “Nuljuq tsaol-aq nail Yaqyov nail aqn bhai moel movq nail yanq kev lee nail ngaol. Thailhai ngaol-aoq, nuljuq maq ya moel-ail. 23 ‘Niai heldaiq lal yaoq! A bhai heldaiq ail yaoq’ dai, yu nuljuq bhai ge lal nail ngaol. Thailhai ngaol-aoq, thaq heldaiq ail. Aqyu juq nail haoqnao thaq tsaothel-aivq. 24 Khul khi mail daiq ngal-aq neq, nqtavq teevq phao bal-nvq bha nqmeivq meivq nail yaoq phao yaoq-ao bha kev dai, bhaq kev ail nail khe-ai, Tsaol-aq nail Yaqyov yavq kha lee-u phao, alhai pevq lal nail ngaol. 25 Thailhai ngaol-aoq, alhai maq pevq lal-u phao, tsaol-aq nail Yaqyov neq, haq nail aoq nail mee nia phaq bhai ya daq nail nee ovqtavq, niil yeel khe tsaol-aq-i mail khaonq nail bhai ya daq nail ngaol.

26 Nol-avq nail yeel bhai kev lee thel lee-a nail khe-ai, tsaol-aq nail Yaqyov nail yeel bhai iqsanl, kev lee thel lee nail ngaol. 27 Nol-avq laovq laovq ma nail lavqkhoel bhai aol lai-u n-gaol kev dai, aqyu juq jaq nail daol nail nee ovqtavq, hevq pheel maol pheeljaq-ai haq nail ngaol. Nol-avq laovq bhai aol lai gaq-u phao, ulcuvq deq bhee lal khi, tsaol-aq iqsanl mail luq-ail seil-ail gil-a nail ngaol.

28 Laoltavq nail yeel bhai iqsanl alhai dul dai, pevq lal-a nail ngaol. Aqyu juq jaq nail daol nail, yalkav gaoq, yalkav ul nail, kha jaq kha daol nail nee ovqtavq, ilkhaol cov nail ngaol. 29 Thailhai ngaol-aoq, Laoltavq Saoldoq meenq nee mail dov ail-u n-gaol nee, nqtavq nee mail miqjaq khi miqjal jalheel maoq-aol aol nail khe-ai aol lee khi, aqyu juq iqsanl bhai lav luq lav seil bhiq-a nail ngaol.

30 Tsaol-aq nail Yaqyov yavq kha lee-u n-gaol, alhai dul nail ngaol. 31 Aq-u n-gaol, khaolpoiv bha dav nail tsaol-aq, yovqgavq nail ilkhaol lavqkhoel bhai yalkav jiav haq neq, yavq kha lee khi yalkav oil ail nail khi ilkhaol bha thaq aol ail. Alhai dul dai, yalgaol bha jaol nail tsaol-aq juq iqsanl, thaq kovq lai. 32 Laoltavq nail khaqma bhai thaq nioilpeivq dei-eiq. 33 Khaq sil gaq maqkhaiq, yovqgavq nail doevq nail phaq yovqgavq bhi jel-ail dai, laijai haq neq, yovqgavq nail doevq nail phaq sunq-ail nail ngaol. Khaq sil gaq maqkhaiq, yovqgavq nail doevq nail phaq bhi sunq-ail haq neq, nqmaq maqluv halyeel doevq nail phaq ya nail ngaol. 34 Ngal nuljuq bhai ge lavq bhel. Aq-u nqkiv tsaol-aq nvq gaq iqjial teevq jial bhai taivq-ail iqthaiq-u phao, teevq gaq bhai hel-aivq khi, teevq gaq bhai bhi jaol-ail ceevq nail ngaol. 35 Yaqmai-aq nvq gaq gov thaoq thailthaiq-u phao, teevq gaq bhai hel-aivq khi teevq gaq bhai bhi jaol-ail ceevq nail ngaol. 36 [Yaqyov-aq nvq gaq yalgaol bhai jaol-u phao, teevq gaq bhai hel-aivq khi, teevq gaq bhai bhi jaol-ail ceevq nail ngaol]” dai, ge bhiq-a nail ngaol.

37 Aq-u phao yaqlaol juq: “Heeqphaq-ol, khul dao bhai niailhai pevq lal nail-aiq” dai, Yeiqsul bhai naldaiq-u phao, Yeiqsul daoqma uqhuq daoq nee mail niailhai ge kovq bhiq-a nail ngaol: “Sil-ai thaq nail aqmaol khal jiav nail bhai, joelma ga jil lee nail ngaol* 17.37 Joelma ga jil lee nail bhai ya moel-u phao, sil thaq nail aqmaol a bhai jiav nail ngaol dai, ngadao heeq kivq nail khe-ai, ganl niil juq pevq lal nail bhai ngadao ya moel-u phao, miltsaq niil daoq loi loi lai nail aqjail jail lal-aoq thaq nial dai, ya heeq kivq nail ngaol.” dai, ge bhiq-a nail ngaol.