105
Yi banl Kataj Ryos squibaj yi e' xonl Israel
(1 Cr 16.7-22)
1 Katyoẍink tetz Kataj. Katxole' yi tetz bi'.
Katxole' scyetz cyakil wunak yi e'chk takle'n balaj yi na ban.
2 Kabitzink tan tak'le'n k'ej i'.
Katxole' yi e'chk milawr yi bnix ta'n.
3 Ba'n kocsaj kib nim tan tu' yi ato' tcwent i'.
Katzatzink bin yi o' yi k'uklij kac'u'l te'j.
4 Kajake' ẍch'eybil ketz tetz na at tetz porer.
Kajake' ẍch'eybil ketz tetz cyakil nin tiemp.
5 Ulk tx'akx tkac'u'l, yi e'chk milawr yi bnixnak ta'n, tu cyakil yi e'chk ca'wl yi talnak i'.
6 Ulk tx'akx tkac'u'l te'j, yi o', yi o' xonl k'ajtzun Abraham, yi ẍchakum Ryos, yi o' xonl Jacow, yi jun yi je'nak xtxa'ol i'.
7 Na i' yi Kataj, i' kaRyosil, nin na cawun bene'n tzi'n wi munt.
8 Poro yi i' tetz, quil tz'el yi yol i' te c'u'l yi suknak tetz Abraham.
Mpe nink chicy' jun mil wekl wunak, ilenin tz'elepon k'ab i' te yi jun yola'tz.
9 Iẍnin nachij yi yola'tz ta'n yi suknak tetz Abraham,* Gn 12:7; 7:8. na ite'n nin yola'tz talnak tetz Isaac.
10 Ncha'tz ite'n nin yola'tz talnak tetz Jacow, tan chixome'n yi e' xonl Israel te'j.
Na ja bixe' yi jun trata'tz ta'n tetz ben k'ej ben sak.
11 Na je yol i'e'j:
“Swak'e' yi e'chk ama'l cwent Canaán tzitetz.
Ya'stzun yi herens swak'e' tzitetz,” stzun Ryos bantz.
12 Te yi tiempa'tz, qui'c mas chixone'n yi e' kamam kate', nin e' cu'n awer nak ban.
13 Na ja cha'tij coboxintzi' k'ej tulak e'chk ama'l nin tulak e'chk nación.
14 Poro quinin tak' Ryos ama'l scyetz chicontr tan cyoque'n tan chibuchle'n, ma na nin oc i' tan makle'n chiwutz yi e' rey yi taw yi e'chk ama'la'tz.
15 Na je yol i'e'j:
“Qui'c tzitaj quen scyetz yi e' wetz intanum yi txa'ij che't wa'n. Nin qui'c tzitaj quen tan chibuchle'n yi e' wetz elsanl intzi',” stzun Ryos bantz.
16 Cu' jun chin we'j le cyetz chi'ama'la'tz tan Kataj. Qui't ntak' i' chiwa'.
17 Poro te yi ntaxk ul yi we'ja'tz ẍchiwutz yi e' kamam kate', nsken bajx pon Ẍep ta'n jalen Egipto.
Na cho'n bene'n c'ayi'n Ẍep scyetz aj Egipto, tetz jun esclaw.
18 Lo'on yi tkan i' tan c'albe'n tetz tan caren, nin oc jopij i' xetze'.
19 Nin oc Kataj tan pile'n jalen cu'n yi tele'n cu'n te yi yol yi sken tal Ẍep scyetz yi e' taj xtxu', scyuch' yi e' stzicy.
20 Poro yi rey yi na cawun te yi tiempa'tz le ama'l Egipto nin tak' ama'l tetz Ẍep tan tele'n liwr.
21 Nin oc i'-tz tetz jun martoma' tan q'uicy'le'n cyakil yi at tu yi rey.
22 Nin oc i' tan tak'le'n cyajtza'kl yi e' mas ajcaw nin tijlc'u'lal yi ate' tan cawu'n jak' ca'wl yi rey.
23 Cyopone'n tzun kamam Israel, yi na a'lchij Jacow tetz, le ama'l Egipto.
Cho'n tzun chinajewe'ntz chi awer nak le jun ama'la'tz, yi ncha'tz na bi'aj Cam.
24 Poro ja je' puc'sal Ryos chiwutz. Nin mast cunin chichamil bantz ẍchiwutz yi e' aj Egiptoja'tz.
25 Nintzun tak' Ryos ama'l scyetz yi e' aj Egiptoja'tz tan contri'n scye'j.
Nin e' octz tan chisuble'n klo' yi e' ẍchakum Ryos.
26 Cha'stzun te je'n xtxa'ol Ryos Moisés tu Aarón tetz ẍchakum i' tan chibene'n tan cyelse'n tzaj yi e' tetz tanum le ama'l Egipto.
27 Bnix wi'nin e'chk milawr tetz Ryos cya'n le ama'la'tz yi na bi'aj Cam, nin ncha'tz le ama'l tz'inunin tu'.
28 Na, oc tz'o'tz tan Ryos swutz k'ej.
Nin tz'o'tz nin tunin bantz bene'n tzi'n.
Poro yi e' aj Egipto quinin nquibit yi yol Ryos.
29 Nin oc cyakil a' ta'n tetz chich', nin cyakil yi cay yi ate', e' baj quim.
30 Ej nin je' puc'sal chiwutz yi e' wo' tul cyakil ama'l.
Ncha'tz e' baj ocpon xe ca'l yi rey.
31 Jilone'n tzun Ryos junt tir, nintzun e' saj jun c'oloj usil wacẍ scyuch' e' ne'ẍ us ta'n.
Nin e' ben lo'on bene'n tzi'n Egipto.
32 Nin tetz xel a'bal, ja saj jun chin wutzile'n c'ub a'bal ta'n, yi cy'a'n k'ak' ta'n, bene'n tzi'n Egipto.
33 Nin tircu'n lo'one'n e'chk wi' uva tu wi' ibẍ yi awij cya'n, tu cyakil e'chk tze' yi at Egipto.
34 Jilone'n tzun Ryos junt tir, nin e' saj jun c'oloj sac' tan bajse'n yi cyujul.
Quinin ajlbe'n tetz yi jun c'oloj sac'a'tz.
35 Tircu'n baje'n yi e'chk ujul cya'n yi at wi'ak cojbil nin qui'c nin jun xtze' ban cyentz cya'n.
36 Ncha'tz tircu'n chiquime'n yi e' bajx chicy'ajl yi e' aj Egipto ta'n.
37 Cyele'n tzaj tzuntz tan Ryos le jun ama'la'tz.
Cy'a'n jun c'oloj oro tu sakal cyak'un.
Nin qui'c nin jun yabi'ẍ ẍchixo'l.
38 Wi'nin chitzatzine'n yi e' aj Egipto yi cyele'n tzaj, na wi'nin chixobe'n scyetz.
39 Ja tak' Ryos jun boc'oj sbak' tan bajxe'n cu'n ẍchiwutz, nin jun boc'oj k'ak' tan chitxeke'n lak'bal.
40 Ja chijak chiwa' tetz, nin ja tak' i' tz'ichin scyetz.
Ja noj chic'u'l tan yi waj yi cho'n saje'n tcya'j.
41 Ja pax yi wutz c'ub ta'n, nin ja el tzaj a'.
Nin ja xon yi a'a'tz le ama'l tz'inunin tu', chi jun wutzile'n tzanla'.
42 Na, nin ul tx'akx tc'u'l yi yol i' yi suknak tetz Abraham yi ẍchakum, jun yol yi chin xan nin, yi qui'c rmeril tan qui tele'n cu'n te'j.
43 Ya'stzun tulej Ryos yi tele'n tzaj tcy'al yi e' tetz tanum yi txa'ij che' ta'n.
Nternin na chiẍch'in tan yi tzatzin yi ate' cu'nt yi cyele'n tzaj.
44 Nin ja tak' i' chi'ama'l yi e' mas wunak scyetz, tuml cyakil yi chime'bi'l yi at scyuch'.
45 Ya'stzun banak i', bantz chixome'n te yi tetz ca'wl tu yi tetz tajbil.
Kak'e' bin kak'ajsbil tetz Kataj Ryos. ¡Aleluya!