104
Kak'e' kak'ajsbil tetz yi bnol tetz cyakil e'chk takle'n yi at
1 Kak'e' kak'ajsbil tetz Kataj tetz cu'n kalma'.
Ilu' Kataj, ilu' kaRyosil chin wutzile'n nin yi k'eju'.
Weko'n tibu' tu yi k'eju' tu jun chin pak'puchal.
2 Txowi'n jun xbu'k tanu' yi wi'nin na txekun.
Ja el lit'ulu' yi tcya'j chi ik jun chin mantial.
3 Ja je' xtxicbalu' yi ca'lu' wi a'.
Ja cu' yi tkan ca'lu' xe' yi a' yi at jalen tzi'n tcya'j.
Na xcon e'chk sbak' tetz xombilu', nin na xonu' tul cyek'ek'.
4 Yi cyek'ek'a'tz, ya'stzun ẍchakumu'.
Nin yi k'ak' ya'stzun xconsbe'tzu'.* Heb 1:7.
5 Ja bixe' yi wuxtx'otx' tanu' tibaj yi tetz c'olchbil.
Nin qui'c rmeril yi nink tx'ixpij yi tetz luwar.
6 Pi'lij yi a' tibaj tanu', chi ik jun chin xbu'k.
Je'nak pon yi a' tanu' tan jople'n yi wi'wtz.
7 Poro yi cawune'nu' te'j, lajke'l nin ma'j tanc'ul tib.
8 Ja xon wi'ak wutz. Ja xon tulak joco'j.
Nin ja opon le ama'l yi bixba'nt tanu'.
9 Ja bixe' cyen e'chk mojomil tanu', bantz qui saje'n kojxuj junt tir tan jople'n yi cojbil.
10 Ilu' nuc'ul cyen tetz yi e'chk ne'ẍ a' yi na xon lakak siwun.
Nin ilu' nuc'ul cyen tetz yi e'chk tzanla' yi na xon xo'lak wutz,
11 yi na xcon tetz quic'a' yi e' smaron txuc.
Nin ya'stzun na icy'san yi saktzi' scye'j yi e' smaron chej.
12 Nin stzi'ak yi e'chk tzanla'a'tz ya'stzun na ch'uye't yi e'chk lmak tze' tanu'.
Nin ya'stzun na jale't cyal yi e' ch'u'l.
Nin ya'stzun na cyak'wit chik'ajsbil teru'.
13 Ncha'tz ilu' na k'a'jan e'chk ju' wutz tan yi a'bal yi na saj tanu' jalen tcya'j kale najle'tu'.
Nin tan yi a'bala'tz na txa'xax cyakil wuxtx'otx'.
14 Ilu' na ch'uysan e'chk ch'im tetz chiwa' yi e' txuc.
Nin ilu' na ch'uysan cyakil jilwutz cyujul wunak yi na xcon tetz chiwa',
15 yi ixi'n, yi na ak'on chiwalor, nin yi ta'al uva yi na ak'on tzatzin scyetz, nin yi na xcye' tan litz'une'n mas chiwutz swutz yi aceitil oliw.
16 Tan yi a'bal yi na tak' tzaju', na k'a'xij e'chk tze', yi e'chk cedro yi na ch'uy Líbano, yi ilu' nin awal tetz.
17 Ej nin te yi e'chk tze'a'tz, ya'stzun na bnixe't chisoc yi e' ne'ẍ ch'u'l.
Nin xo'lak k'ab e'chk lmak tzaj, ya'stzun na bnixe't chisoc yi e' cigueña.† “Cigueña”, i'tz jun txuc sak te'j, yi mas nim swutz jun mam kol, nin ba'n na xicy'in.
18 Ej nin wi'ak e'chk ju' wutz, ya'stzun chinajbil e' smaron chiw.
Ej nin wutzak e'chk txakxla', ya'stzun kale na cyewit quib yi e' tal yac.
19 Ilu' bnol tetz yi xaw tan tajle'n tajlal xaw tul jun yob.
Nin ilu' bnol tetz yi k'ej, yi na el xtxum tetz yi mbi oril tan je'mule'n nin tan cwe'n.
20 Ilu' txumul tetz yi lak'bal.
Nin ilu' txumul tetz yi tz'o'tz, yi na che'lsan tzaj yi e' smaron txuc tan joyle'n chiwa'.
21 Yi e' balum, na chiẍch'in te yi na chijoy chiwa'.
Na chiẍch'in tan c'uche'n chiwa' teru'.
22 Ma yi na je'ul k'ej na chipakxij junt tir lakak chisoc tan watl.
23 Ma yi e' wunak, ya'stzun na che'l tzaj cyetz tan ak'un wi cojbil.
Na chak'uj jalen yi na cu' k'ej.
24 Wi'nin e'chk takle'n yi ja bnix tanu' Ta'.
Chin tz'aknak cu'n ntuleju' tircu'n.
Nojnak yi wuxtx'otx' tan e'chk takle'n balaj yi ja bnix tanu'.
25 Ncha'tz ilu' bnol tetz yi mar yi chin xe' nin.
Ya'stzun najlche't jun c'oloj jilwutz txuc.
At lmak, nin at co'chok xe' yi mara'tz.
26 Cho'n na chixon e'chk lmak barc tibaj.
Nin cho'n najlij yi jun chin wutzile'n txuc tul yi na bi'aj Leviatán, yi sa'chbil tu'wu' tane'n.
27 Ilu' ak'ol chiwa' cyakil yi e' txuca'tz.
Ch'iwa'n tu' na chiban cye'tz.
28 Na yi na tak'u', ntin bajse'n na chiban cyetz.
Nin na noj cu'n chic'u'l.
29 Ma kol quil tz'ocu' il scye'j, na oc xya'yil chiwi'.
Nin ko quil tak'u' chixew,
ẍchiquimok, nin chocopon junt tir tetz xk'ol.
30 Poro ilu' ak'ol tetz chixew, na ilu' bnol cyetz.
Cha'stzun te na puc'un chiwutz.
Nin na yub junt tir yi cojbilu'.
31 Yi teru' k'eju' quil sotz tera'tz.
Nin na tzatzinu' te cyakil yi bnixnak tanu'.
32 Yi na xmay tzaju', quenin na yucan yi wuxtx'otx'.
Yi na mac quenu' yi e'chk wutz, na je' pok' sib scye'j.
33 Jalen pe'k yi itz'ine't, swak'e' ink'ajsbil tetz Wajcaw yi inRyosil.
34 Na klo' waj yil tzatzin i' te intxumu'n.
Na ntin cu'n te i' na jale't tzatzin wa'n.
35 Lok chisotz yi e' juchul il yi ate' wi munt.
Che'lk cu'n yi e' mal naka'tz swutz.
Kak'e' bin kak'ajsbil tetz Kataj tetz cu'n kalma'.
Kak'e' bin kak'ajsbil tetz. ¡Aleluya!‡ “¡Aleluya!” Jun yol e' hebrey yi na elepont ¡Kak'e' kak'ajsbil tetz Kataj Ryos! Sal 105:45; 106:48; Ap 19:1, 3,4, 6.