23
- 6 -
1 Aintsu apurijai yuwatasam keemsamka, warí yutaina itainawa nu anearam yuwata. 2 Tura
nukap yaparayatmek jumchik yuwata. 3 Nu yutai kungkuram au wainiatum: Anangkruwartimpiash
tusam anearta.
- 7 -
4 Wikia kuikiartin wajastaj, tuuka nintimraip. 5 Antsu paan nintimsam: Kuikiartinu kuikiaringkia
nanamtin wári nanamina nunisang mengkawai tusam nekaamnawaitme.
- 8 -
6 Aints suria nuna yutairingka yuwaip. Turamka ni yutairi nekas pengker iwiaaramun au wainiatum nuka wakerukaip. 7 Nu aintska tuke yutai akikaitai tuu nintimui. Amin: Yuwata turasha murta tayat, suri asa
pengker nintimsangka nunaka turamtsui. 8 Tura asamtai yurumak yuwamame nuka arumak iniuktatme. Tura asam: Pengker yuwajai tayatum, nuka nangkami timiame.
- 9 -
9 Aints nintimchau antamunam chichakaip.
Ame paan nintimsam chichasume nuna antuk amin wishikramratnuitai.
- 10 -
10 Yanchuik juuntrum ainau nungkan akankamunam painin jintawarmia nuka kuinkaip. ✡ Prov 22.28 Tura mitaikia nungkarisha atankiip. 11 Warí, uchi mitaik aina nuna ayamrinka nekas kakarmaitai. Tura asa mitaik ainaun ayamruktas amin nepetamkatnuitai.
- 11 -
12 Amin nuitaminamtai nintimjai pengker nintimtusta. Tura paan nintimram,
nuikiartamu antukume nuka kajinmakiip.
- 12 -
13-14 Uchi chicharkatniuka inaisaip. Uchi jumchik awatramka jakashtatui. Kame, antukat tusam awatramka, Yusen umirak pujus tuke jakatniunam wetsuk uwemtikratnuitme.
- 13 -
15 Uchiru, ame paan nintimramka, winasha nukap waramtikrame.
16 Tura nekas pengker chichaakminkia, nuna antukan nukap warastinuitjai.
- 14 -
17 Tunaarintin ainauka nekasar pengker pujuinawai, tuuka nintimraip.
Antsu ami Apuram Yus tuke pengker awajsata. 18 Nu turakmeka ukunam
jakamin nekapeakmeka: Yusnumapi wetatja tu nintimratnuitme.
Nunia jakamsha nekasam Yusnum tuke iwiaaku pujustinuitme.
- 15 -
19 Uchiru, anturtukta turakum pengker nuimiarta. Tura jinta Yusnum jeatniunam tuke wekasata.✡ Juan 14.4-6 20 Antsu nampeu ainaujaingkia tura ushu yutancha nukap wakerin ainaujaisha
iruntsuk asata. 21 Nampeu ainauka tura ushu ainausha wait wajakartin ainawai. Tura naki ainau kuikiartichu asar, mamurar pujuinawai.
- 16 -
22 Aparam amin yajutmarmia nu anturkata. Tura nukuram juuntach wajasamtaisha nakitraip.
23 Chicham nekas aina nuka, tura paan nintimratniusha, tura nuimiartincha, tura pengker nekatniusha
nukap wakerukta. Antsu nunaka nakitajai tiip. 24 Aintsu uchiri pengker tura nintip pujakka aparin nukap waramtiksatnuitai. Tura ni yajutmaru asa: Maj, uchirka nekas pengkerapita titinuitai. 25 Tura asamtai aparam tura nukurmesha amin jeretmarmia nuka mai metek waramtiksarta.
- 17 -
26 Uchiru, wina tuke nintimtursata, tura wi turaja nu jiista. 27 Kungkatip nuwaka waa taimu nitak wangkarmachua nunisketai. 28 Nu nuwaka kasa aints aneachmau aintsu waririn kasamkatas
naka wajawa nunisketai. Tura asa aishmangkun untsurin mengkakatniunam juawai.
- 18 -
29 ¿Ya aintsua wait wajaktinuita? ¿Tura ya aintsua najaimiatnuita? ¿Turasha ya aintsua nangkami juutnuita? ¿Tura ya aintsua maanitan wakeruktinuita? ¿Turasha ya aintsua nangkami numpartinuita?
¿Tura ya aintsua mushatminun jiimsatnuita? 30 Nampetan pengke inaichau ainau tura umutain wainchatain timiá kariaun nekapin ainau tu pujuinawai. 31 Umutai nampetai ainaun tenapkesan jiistaj tiip.
¿Warí, yarakmasha timiá kapanniuchukai? ¿Tura shiirmachukai? ¿Nuna umuran suwerka nekas tsuwer jakchatpiash? tiip. 32 Antsu jumchik arus napi esatma nunisang najaimiakum wait wajaktinuitme.
33 Nu umutaingkia nekaachminun jiimtikramratnuitai. Tura nintinchau wajasam, natsanpiaku chichastinuitme. 34 Tura timiá nampekam karamramuram kanú tsakarin tepamin, ukantinua
nunismek tunau nekapratnuitme. 35 Tura shintaram chichaakum: Katsumrinaunak najaimiarchamjai.
Tura chapikjai awatinaunak nekaprachmajai. Turayatun tsaarnaka ataksha umuki wetatjai titinuitme.