1 Aints ainau iin pachitmasar: Nuka pengke aintsuitai tiartinka

kurin tura kuikian nangkamasang timiá pengkeraitai.

2 Aints kuikiartin ainauncha tura kuikiartichu ainauncha mai metek Apu Yuska najanamiayi.

3 Aints paan nintimua nuka itiurchatnaka wári nekaa kiishmaktinuitai.

Antsu aints nintinchauka itiurchatnaka nekaatsuk wait wajaktinuitai.

4 Aints: Wikia mianchawaitjai tumaminauka Apu Yusen umirkar pujusar yumakchartin ainawai. Turinamtai chikich aints ainauka niin pachisar: Pengke aintsuitai tiartin ainawai.

Tura asaramtai untsuri musach pujusartin ainawai.

5 Pase aintsu nintinka jinta jangki irunmaunum tura ejatak untsuri ukusmauwa tumawaitai.

Antsu aints tuke Yusnum pujustas wakerakka nu jintanam wekaasatniunka arantak nakitawai.

6 Uchi pengker pujusti tusam nuiniarta. Tura nunia juunmar

ame chicharkamurmin pengké kajinmakchatnuitai.

7 Kuikiartin ainauka kuikiartichu ainau apuri ainawai. Tura aints tumaashmiaunka

niin tumaashin susamia nuna inatairi wajawai.

8 Aints pasen turauka ukunam itiurkachminnum jeatnuitai.

Tura tuke paseen takau asamtai, Apu Yus ni suirijai mengkaktinuitai.

9 Aints wait anengkratniuka yuuminak pujuinaun yurumkan ajamin asamtai, pengker awajsamu atinuitai.

10 Aints katsekminiun jiikiar awemaru asaramtai, katsumnaikiatniusha,

tura jiyaniktincha tura maaniktincha atsutnuitai.

11 Aints pengker nintiniuka yaitas chichau asamtai, ni apuri amikri atinuitai.

12 Apu Yus paan nintimniun wainui. Antsu anangkartinka antujachminun chichasti tusa nintimtikui.

13 Aints nakia nuka takatan nakitau asa: Juun yawaa jinta wajas yuruawai tusan jea pujajai, tu pujuwitai.

14 Kungkatip nuwa chichamengka waa kuna taurmawa tumawaitai.

Aints Yus yumingkramu ainauka nu waanam iyarartin ainawai.

15 Uchi nintimchau chichaman antutan nakitau asamtai, jumchik awatratnuitai.

Tura asamtai paan nintimiar tunau turutin inaisatnuitai.

16 Kuikiartin nukap kiauntumkataj tusa, kuikiartichu waririn atanta nuka tura aints

kuikiartiniun kuikian nangkami sua nusha mai metek kuikiartichu wajasartin ainawai.

17 Paan nintimin aina nuna chichame tenapkesam antukta.

Tura wi nuiniartatjame nuka nintimin ukusam tenapkesam nuimiarta.

18 Nu turakmeka pengker nintimtin atinuitme, tura nu chichama nintimin ukusu asam,

chichaakmesha nusha etserkatnuitme.

19 Tura Apu Yus timiatrusmek nintimtusta tusan, yamai amincha ujaktajme.

20 ¿Nuikiartin chichaman tura nekaatin chichamnasha nekas pengkera nuna treintan aatrachmakjam?

21 Nu nekas chicham ainaun pengker nekaamka, chikich aints ainau amin ininminamtaikia,

nu chichamsha ujaktinuitme.

22 Aints kuikiartichu asamtai, ni warinchurin pengké atankiip. Tura yamrumichu ainaun

chicham nekamtikniunam jukimka waitkasaip. 23 Kame, Apu Yus kuikiartichu ainaun

ayamrin asa, yamrumichu ainaun waitkina nunasha nunisang waitkatnuitai.

24 Aints suir nekapniujai tsaningkaip. Turasha aints kajeu aina nujaisha iruntsuk asata.

25 Tura ni turamurin jiisam, wisha nunisnak aitkataj tu nintimsaip. Turakmeka chapikjai jingkiamua nunismek wait wajaktinuitme.

26 Aints tumaashmiau wainkam: Wi tumaashrumnaka akimiatkatjame tiip. 27 Takumka

akimiaktin kinta jeamtai, akimiakchakminka apamrumnasha atantramkartinuitai.

28 Juuntrum ainau yanchuik nungka akankamunam:

Juka wina nungkaruitai tusar, painin jintawarmia nuka kuinkaip.

29 ¿Aints ni takatrin pengker takakmawa nu wainukitam? Nu aintska takatrin nekamtikin asa,

aints mianchau takarnuri wajaschatnuitai, antsu apu ainau takarniuri wajastinuitai.