8
Ri kꞌakꞌ tzij
1 Ekꞌu rukꞌuꞌxibꞌal wa kojtajin che ubꞌiꞌxikil e waꞌ: Kꞌo ri Jun kachꞌaw paqawiꞌ chwach ri Dios, waꞌ e ri Qajawal, ri xtzꞌuyiꞌ pa ri luwar lik kꞌo uwach puwikiqꞌabꞌ ri Dios, ri Nimalaj Taqanel chilaꞌ chikaj. 2 Kachꞌaw kꞌu paqawiꞌ chupa ri saqil Rocho Dios chilaꞌ chikaj; yey waꞌ e ri Dios Qajawxel xꞌanaw re, na juna achi taj.
3 Konoje kꞌu ri kajawal raj chakunel pa Rocho Dios xekojik chaꞌ kakiya chwach raltar ri qasaꞌn y rawaj kekamisaxik. Jekꞌulaꞌ chirajawaxik kꞌo kuya ri Qajawal chwach ri Dios. 4 We ta kꞌa kꞌo ri Jesús che ruwachulew, riꞌ na aj ta chakunel pa Rocho Dios, ma wara kꞌa e kꞌo aj chakunel kakiqꞌatisaj ri qasaꞌn chwach ri Dios pachaꞌ ri kubꞌiꞌij ri taqanik tzꞌibꞌital kan ruma ri Moisés. 5 Yey ri chak kakiꞌan rike, xa e ukꞌaxwach y kꞌutubꞌal re ri kaꞌan chilaꞌ chikaj. Ma echiriꞌ xtaq che ri Moisés kuyak ri Rocho Dios xa kakirik, jewaꞌ xubꞌiꞌij ri Dios che:
Chawilapeꞌ, ri wocho kayako, e chaꞌana ronoje che
jelaꞌ pachaꞌ ri xinkꞌut chawach chwa wa juyubꞌ Éx. 25:40
xchaꞌ.
6 Noꞌj woꞌora ruchak ri Qajawal más utz chwa ri kichak raj chakunel pa Rocho Dios, ma ruma Rire ri Dios xuꞌan jun kꞌakꞌ tzij qukꞌ riꞌoj. Yey chupa wa tzij kꞌo bꞌiꞌtisinik más chom chwa ri re ojertan. 7 We ta ekꞌu laꞌ lik tzꞌaqat xel ri nabꞌe tzij,* Wa nabꞌe tzij e ri xuꞌan ri Dios kukꞌ rutinamit Israel chwa ri juyubꞌ Sinaí. riꞌ paqatzij wi na kajawax tane juna kꞌakꞌ tzij. 8 Ma ri Dios xuya wa pixabꞌanik chike rutinamit, jewaꞌ xubꞌiꞌij:
¡Chitapeꞌ! kacha ri Dios Qajawxel.
Kopon na ri qꞌij echiriꞌ Riꞌin kanꞌan jun kꞌakꞌ tzij
kukꞌ ri tinamit e aj Israel y kukꞌ ri tinamit e aj Judá.† Chwi lo ri taqanik re ri Salomón, xkijach kibꞌ rutinamit ri Dios. Xebꞌuꞌan kebꞌ; jun kabꞌiꞌx “Israel” che y ri jun chik, “Judá”.
9 Yey waꞌ na je ta laꞌ pachaꞌ ri tzij xinꞌan kukꞌ ri kichu-kiqaw ojertan
echiriꞌ nuchapom che ri kiqꞌabꞌ, xebꞌenuwesaj lo Egipto.
Pero rike na xkitaqej ta ri tzij xinꞌan kukꞌ;
ruma kꞌu riꞌ, xebꞌenuya kanoq, kacha ri Dios Qajawxel.
10 Kꞌisbꞌal kꞌu re taq laꞌ la qꞌij,
e tzij waꞌ kanꞌan kukꞌ ri tinamit Israel, kubꞌiꞌij ri Dios Qajawxel:
Kankoj ri nutzijpixabꞌ pa kijolom
y kantzꞌibꞌaj pa kanimaꞌ.
Ekꞌu Riꞌin kinuꞌan in ki Dios y rike kebꞌuꞌan e nutinamit.
11 Yey na kajawax ta nenareꞌ kꞌo junoq kebꞌupixabꞌaj
ri rachbꞌiꞌil y ri ratz-uchaqꞌ,
jewaꞌ kubꞌiꞌij chike: “Chawetaꞌmaj uwach ri Dios Qajawxel.”
Ma chupa laꞌ la qꞌij konoje ketaꞌam nuwach Riꞌin,
chinimaꞌq chichꞌutiꞌq.
12 Kankuy kꞌu kimak
y na kakꞌun ta chi ne kꞌana chinukꞌuꞌx ri na utz taj xkiꞌano Jer. 31:31-34
xchaꞌ. 13 Echiriꞌ kabꞌiꞌx “kꞌakꞌ tzij”, e keꞌelawi kꞌo jun qꞌij ri nabꞌe xa kikꞌowik, ma janipa taq ri kuꞌan qꞌeꞌl y na jinta chi uchak, riꞌ katajin usachik uwach.