2
थमा सुइक्ब आन पुंइशो
1 आं के नेल्ल क्येङा ठेयब अरेशो लोव़ मार बाक्ब देंशा हना, परमप्रभु यावे नु बाक्शा, मेको नु लोव़ पचा नु नेल्ल मुर आन पर्बम पुंइना पुंइन बाक्चा माल्नय। मेको आन पर्बम “गे मेको आन कली रिम्शो पाइतीनी” दे परमप्रभु यावे कली ठेयब सेल्चा माल्नय।
2 पिप नु सरकार ङा ठेयब अधिकार पाइश्शो मुर आन पर्बम यो मोदेंशो पुंइतीक लोव़ पचा माल्नय। मो पा गो रिम्शो, थुं नाइश्शा, इं गेयमी परमप्रभु यावे कली मिम्चा, दाक्चा नु नेल्ल गेयमी ठीक दुम्शा बाक्य।
3 मोदेंशो मरिम्शो गेय प्रोंइब परमप्रभु यावे आ ङोंइती रिम्शो नु दाक्चा ङा बाक्ब।
4 परमप्रभु यावेमी नेल्ल मुर आन कली मरिम्शो गेय रे प्रोंइश्शा, थमा लोव़ तुइक्पाइक्चा दाक्ब। इजीकीएल १८:२३; रोमी ११:३२; २पत्रुस ३:९
5 परमप्रभु यावे का ला बाक्ब। मेको नु मुर आन कली गारपाइक्चा कली येसु ख्रीस्त रागीम जाक्शा, मुर दुम्शो यो का ला बाक्ब। हिब्रू ९:१५
6 मेकोमी मुर नेल्ल आन कली पाप रे प्रोंइचा, दे आंम कली जिम्मा गेप्तु। एको लोव़ मेना रे शेंचा गोम्तेक्म। गलाती १:४; गलाती २:२०; तीतस २:१४
7 मोपतीके परमप्रभु यावेमी एको लोव़ शेंब नु ख्रीस्त आ सोइश्शो सेल्ती। गो जोल मपथु, थमा लोव़ पाइनुङ। इस्राएली आन कली ममाइ, तन्न रागी रागी ङा मुर आन कली थमा सुइक्तीके आ पर्बम शेंब नु थमा लोव़ शेंब सेल्ती। २तिमोथी १:११; गलाती २:७-८
थमा सुइक्ब आन कली शेंशो
8 तेइ तेइ ङा वोंइश मुरपुकीमी प्रार्थना पचा माल्नीम। परमप्रभु यावे कली थुं नेल्लेम थमा सुइक्ब गे गुइ पोक्शा, मगाइक्ब नु मजीब दुम्शा, परमप्रभु यावे नु लोव़ पशो तचा दाक्नुङ।
9 मीश मुरपुकी यो ठीक पा फेक्शा, गेय पचा ङोंइती मिम्शा, रिम्शो बाक्चा माल्नीम। मोपा चांमी मार मार वोइश्शा लामा प्रोव़शा, सुन मोती नु शुश क्येट लाइब वामी मग्योम्समल। १पत्रुस ३:३-५
10 परमप्रभु यावे कली मिम्ब मीश मुर रिम्शो पतीकेमी “गो परमप्रभु यावे कली दाक्ब नङ” दे कोंइनीम। १तिमोथी ५:१०
11 मीश मुरपुकीमी टीब दुम्शा, रिम्शो पा नेंशा शेंसमल। एफिसी ५:२२
12 वोंइश मुर आन कली शेंतीक अधिकार मीश मुर आन कली मगेनुङमी। मेकोपुकी सिक्सी पा बाक्मल। १कोरिन्थी १४:३४; उत्पत्ती ३:१६
13 ङोंइती आदम, नोले हव्वा सेल्शो बाक्त।
14 आदम ङोंइती हेंथे मगाक्शो बाक्त। मीश मुर चहिं मिक्च सिल्चा पुंइसीशा, परमप्रभु यावे कली मटीब दुम्शो बाक्त। उत्पत्ती ३:६
15 मो हना यो मीश मुरपुकी रागीम आल जरमेसे ङा मेरे ब्रोंइचा ताइनीम। तन्न मेकोपुकी थमा सुइक्ब दुम्शा, दाक्मुशा, परमप्रभु यावे आ मुर दुम्शा नु ठेयब मलेत्थु बाक्चा माल्नीम। १तिमोथी ५:१४; तीतस २:४-५