१ तिमोथी
ब्रेक्ब मुर: एको चिठी पावलमी तिमोथी कली ङोंइती ब्रेक्शो बाक्त।
गेना ब्रेक्शो: तिमोथीम पावल नु गेय पवा बाक्त। मेकोमी थिस्सलोनिकी सहर ङा थमा सुइक्ब आन कली शेंशो बाक्त। पावलमी मेको कली अर्को सहरम यो शेंथ सोइक्ता बाक्त। पावलमी एको चिठी गेना ब्रेक्शो बाक्मे, मेको बर्स मदेंशो बाक्त।
मारदे ब्रेक्शो: शेंतीक लोव़ तिमोथी १:१-२
१. ठीक शेंतीके मार बाक्ब तिमोथी १:३-२०
२. ग्रुम्तीक खिं ङा मुर दोपा बाक्चा माल्नीम तिमोथी २:१ - तिमोथी ३:१६
३. रिम्शो थमा सुइक्तीके मार बाक्ब तिमोथी ४:१-११
४. मुर आन कली मार शेंचा माल्ब तिमोथी ४:१२ - ६:२
५. धर्म पतीके शोर गाक्शो बाक्ब तिमोथी ६:३-२१ नेल्ल जम्मा पा गे येसु ख्रीस्त आ पर्बम ला शेंदो। आंम पतीके होस पावो।
1
ङोंइती ङा लोव़
1 ख्रीस्त आ सोइश्शो गो पावल नङ। इं कली पाप रे प्रोंइब परमप्रभु यावेमी “ख्रीस्त येसु आ सोइश्शो दुमो” दे माइक्ती। इं कली ब्रोंइचा गेनुङ, दे कबल पाइब ख्रीस्त येसुमी यो मोन माइक्ती। कलस्सी १:२७
2 गे थमा सुइक्ब, आं दाक्शो तौ खोदेंशो तिमोथी, इ कली चिठी ब्रेक्ताक्ङ। इं आफ परमप्रभु यावे नु प्रभु येसु ख्रीस्त आस दाक्चा गे नु बाक्ल। आस शिशीमी इ कली थुं नाइश्शा बाक्चा गेम्सेक्ल। प्रेरित १६:१-२; तीतस १:४
दूली शेंब आन पर्बम ब्रेक्शो
3 गो मासीडोनीया रागी लङानु, गे एफिसस सहरम बाक्को। मेकेर मुर का निक्शीमी दूली लोव़ शेंनीम। मोदेंशो मशेंदीन, दे अरेवो। प्रेरित २०:३
4 मेकोपुकीमी मुरुमी सेल्शो लाइश्शो कथा नु किकी पिपी आन पर्बम शेंना शेंन बाक्नीम। मोदेंशो शेंतीके काम मलाप्चा ङा बाक्शा, परमप्रभु यावे आ शेंशो थमा सुइक्तीके मबारपाइक्ब। १तिमोथी ४:७
5 इं शेंतीके चहिं रिम्शो थुं, रिम्शो थुं ङा मिम्तीके नु रिम्शो थमा सुइक्तीके रे जाक्शो शुश दाक्मुचा आ पर्बम बाक्ब। मत्ती २२:३७-४०; रोमी १३:१०; गलाती ५:६
6 का निक्शीमी मेको शेंतीक प्रोंइशा, शोर गाक्शो लोव़ पाइनीम। १तिमोथी ६:४,२०
7 मेकोपुकीमी परमप्रभु यावे आ अरेशो लोव़ शेंब दुम्चा दाक्नीम, तन्न आंम देंशो लोव़ नु आंम शेंशो आंमान मरुप्ब बाक्नीम।
8 परमप्रभु यावे आ अरेशो लोव़ ठीक पाइब आन कली रिम्शो दुम्ब, दे गो तुइक्नय। रोमी ७:१२
9 ठीक पाइब आन कली मब्रेक्शो बाक्ब, दे यो तुइक्नय। तन्न परमप्रभु यावे आ अरेशो लोव़ मपाइब, मटीब, परमप्रभु कली ममिम्ब नु मरिम्शो पाइब आन कली ब्रेक्शो बाक्ब। परमप्रभु यावे रे ङोन बाक्ब, रागी कली ला मिम्ब, आम आफ कली साइक्ब, आंम ममा कली साइक्ब नु मुर आन कली साइक्ब आन कली ब्रेक्शो बाक्ब। १कोरिन्थी ६:९-११
10 तेल्लेम पाइब, ग्रांग्रा दिचा ङा गेय पाइब, मुर आन कली खुइ पा लेयब, जोल पाइब, जोल पा कसम जाइब नु आन गेय परमप्रभु यावे आ शेंशो नु मगारब मुर आन कली ब्रेक्शो बाक्ब।
11 मेको थमा शेंतीके नु नेल्ल आसीक पाइश्शो परमप्रभु यावे आ ग्येरपाइक्ब लोव़ शेंब सेल्ती।
परमप्रभु आ दाक्तीक ठेयब बाक्ब
12 एको लोव़ शेंचा कली बोल गेब इं प्रभु ख्रीस्त येसु कली “गे रिम्शो पाइब बाक्नीनी” देंनुङ। मारदे हना ख्रीस्त येसुमी आं पर्बम “थमा सुइक्चा ङा मुर बाक्ब” दे आ गेय पाइब सेल्ती। प्रेरित ९:१५; १कोरिन्थी १५:९-१०; गलाती १:१३-१६
13 ङोंइती गो मेको कली शुक्शी पाइब, श्येत गेब नु शुश मरिम्शो पाइब बाक्ती। तन्न मतुइक्ब नु थमा मसुइक्ब बाक्तीके परमप्रभु यावे आ शिशी ताता।
14 इं प्रभुमी आ दाक्शो थमा सुइक्तीके नु दाक्तीके थुं ब्रीशा, क्युप्चा ङा पा गेती। मेको निम्फा ख्रीस्त येसु नु बाक्नीस।
15 मरिम्शो पाइब आन कली नरक रे प्रोंइचा, दे ख्रीस्त येसु रागीम जाक्त। एको लोव़ थमा बाक्ब नु थमा सुइक्चा माल्शो बाक्ब। गो नेल्ल क्येङा मरिम्शो पाइब नङ। लूका १९:१०
16 गो परमप्रभु यावे आ शिशी मारदे ताता देंशा हना, गो नेल्ल क्येङा मरिम्शो पाइब दुम्ती हना यो, येसु ख्रीस्त आ फाल्तीक सक्ति कोंइचा, दे शिशी ताता। मेको कोंइतीके नोले थमा सुइक्ब नु गेना हना यो, परमप्रभु यावे नु बाक्चा ताइब आन कली बाक्ब।
17 गेना हना यो मबेक्थु बाक्ब पिप कली सुइमी तने मचाप्नीम। मेको कांइचीक परमप्रभु, परमप्रभु यावे बाक्ब। गेना हना यो मान ताक्चा नु छेङछेङ मेको केन बाक्ब। आमेन।
18 आं तौ तिमोथी, परमप्रभु यावेमी इ पर्बम पशो लोव़ तुइक्पाइक्ती। मेको लोव़ इ कली मिम्पाइक्नुङ। मेको लोव़ मिम्शा ग्राने चाप्नेवे। १तिमोथी ४:१४; १तिमोथी ६:१२; यहूदा ३
19 थमा सुइक्तीके नु इ थुं ङा रिम्शो मिम्तीके टिशा बाक्को। आन थुं ङा रिम्शो मिम्तीके कली मटीब का निक्शीमी थमा सुइक्चा प्रोंइतेक्म। १तिमोथी ३:९; १तिमोथी ६:१०
20 मेको आन दातेमी हीमेनेयस नु अलेक्जन्डर बाक्नीसी। परमप्रभु यावे आ पर्बम मरिम्शो लोव़ मपचा, दे शेंचा कली, गो मेको आस कली सैतान आ गुइमी जिम्मा गेतासी। २तिमोथी २:१७; १कोरिन्थी ५:५