8
1 Ko e ʻofa ʻae siasi kia Kalaisi. 6 Ko e fakamātoato ʻoe ʻofa. 8 Ko e ui ʻoe kakai Senitaile. 14 ʻOku kole ʻae siasi ke hāʻele mai ʻa Kalaisi.
1 ʻAmusiaange ʻeau kuo ke tatau mo ha tuongaʻane kiate au,
ʻaia naʻe fakahuhu ʻi he ongo huhu ʻo ʻeku faʻē! Koeʻuhi ʻo kau ka ʻilo koe ʻituʻa.
ke u ʻuma kiate koe, ʻo ʻikai mā ai.
2 Ka ne pehē, te u tataki koe mo ʻomi koe ki he fale ʻo ʻeku faʻē,
pea te ne ako kiate au:
te u fakainu koe ʻi he uaine namu lelei,
kuo hui ʻaki ʻeau ʻae huhuʻa melie ʻoe pomikanite.
3 Pea ʻe ʻi lalo ʻi hoku ʻulu ʻa hono nima toʻohema,
pea fāʻufua au ʻe hono nima toʻomataʻu.
4 ʻE ngaahi ʻofefine ʻo Selūsalema,
ʻoku ou fekau kiate kimoutolu, ke ʻoua naʻa mou ueʻi pe fafangu ʻa hoku ʻofaʻanga,
kaeʻoua ke faʻiteliha pe ia.
5 Ko hai eni ʻoku haʻu mei he toafa,
ʻoku faʻaki kiate ia ʻoku ne ʻofa ai?
Naʻaku hiki hake koe ʻi he lolo moli:
naʻe fanauʻi koe ʻi ai ʻe hoʻo faʻē,
naʻe fanauʻi ʻi ai koe ʻe ia naʻa ne fāʻeleʻi koe.
6 ʻAi au ki ho loto ʻo hangē ko e fakamaʻu ʻo ha tohi,
pea hangē ko e mama ki ho nima;
he ʻoku mālohi ʻae ʻofa ʻo tatau mo e mate;
ʻoku ongongataʻa ʻae fuaʻa ʻo hangē ko e faʻitoka:
ko hono malala ʻoku hangē ko e malalaʻi afi,
ʻaia ʻoku ulo kakaha.
7 ʻOku ʻikai faʻa tāmateʻi ʻae ʻofa ʻaki ʻae vai lahi,
pea ʻe ʻikai mate ia ʻi he ngaahi vaitafe ʻoku lahi:
pea kapau ʻe foaki ʻe ha tangata ʻae koloa kotoa pē ʻi hono fale ka ne maʻu ai ʻae ʻofa,
ʻe lau pe ia ko e meʻa vaʻinga.
8 ʻOku ai homau tehina,
pea ʻoku teʻeki hunuki hono huhu:
pea ko e hā te mau fai
ʻoka hoko ʻae ʻaho ke alea ki ai?
9 Kapau ko e ʻā ia,
te mau fokotuʻu ki ai ha fale siliva:
pea kapau ko e matapā ia,
te mau teuteu ʻaki ia ʻae laupapa ko e sita.
10 Ko au ko e ʻā, pea tatau mo e fale māʻolunga ʻa hoku huhu:
ko ia ia naʻaku tatau ai ʻi hono ʻao mo ha taha kuo maʻu ʻae fiemālie.
11 Naʻe ia Solomone ʻae ngoue vaine ʻi Peali-Hamone:
pea naʻa ne tuku ʻene ngoue vaine ki he kau tauhi:
pea naʻe fekau ke ʻomi taki taha ʻae konga siliva ʻe afe,
ko e totongi ki hono ngaahi fua.
12 ʻOku ʻi hoku ʻao ʻa ʻeku ngoue vaine ʻaʻaku:
pea ko koe ʻe Solomone, te ke maʻu mei ai ʻae konga siliva ʻe afe,
kae tuku kiate kinautolu ʻoku tauhi hono fua ʻae uangeau.
13 ʻA koe ʻoku nofo ʻi he ngaahi ngoue,
pea ʻoku ongoʻi ho leʻo ʻe ho kāinga:
tuku au foki ke u fanongo ai.
14 Fai vave ʻa hoku ʻofaʻanga,
pea ke tatau koe mo e kāseli pe ko e hainite mui he ngaahi moʻunga ʻoe kakala.