4
1 ʻOku fakahā ʻe Kalaisi ʻae hoihoifua ʻoe siasi. 8 ʻOku ne fakahā ʻa ʻene ʻofa ki ai. 16 ʻOku kole ʻae siasi ke ne teuteu ki hono ʻao.
1 Vakai, ʻoku ke hoihoifua, ʻE hoku ʻofaʻanga;
vakai, ʻoku ke hoihoifua;
ʻoku tatau ho mata mo e mata ʻoe lupe ʻoku fakalilo ʻaki ho louʻulu:
pea ko ho louʻulu ʻoku hangē ko e louʻulu ʻoe fanga kosi,
ʻoku fafanga ʻi he moʻunga ko Kiliati.
2 ʻOku tatau ho kaunifo mo e fanga sipi kuo kosikosi,
pea ʻoku ʻalu hake mei he kaukauʻi;
he ʻoku taki ʻuhiua ʻa honau ʻuhiki,
pea ʻoku ʻikai ke paʻa ha taha ʻi ai.
3 ʻOku tatau mo e afo kulokula ho loungutu;
pea ʻoku mālie ho leʻo;
pea ʻoku tatau mo e konga pomikanite ʻa ho manifinifihanga ʻoku fakalilo ʻaki ho louʻulu.
4 ʻOku tatau ho kia mo e fale māʻolunga naʻe langa ʻe Tevita ko e tukuʻanga ʻoe mahafutau,
ʻaia ʻoku tautau ai ʻae fakaū ʻe afe,
ʻae pā kotoa pē ʻoe kau tangata toʻa.
5 ʻOku tatau ho ongo huhu mo e ongo kāseli mui ʻoku na tatau,
ʻaia ʻoku kai ʻi he potu ʻoe ngaahi lile.
6 Te u ʻalu au ki he moʻunga ʻoe mula,
mo e moʻunga ʻoe laipeno,
pea te u ʻi ai ʻo aʻu ki he maʻa hake ʻae ʻaho,
mo e puna atu ʻoe fakapoʻuli.
7 ʻE hoku ʻofaʻanga, ʻoku ke hoihoifua haohaoa;
ʻoku ʻikai ha mele ʻiate koe.
8 Haʻu mo au mei Lepanoni, ʻE hoku ʻunoho,
haʻu mo au mei Lepanoni;
sio hifo mei he tumutumu ʻo ʻAmana,
mei he tumutumu ʻo Senila mo Heamoni,
mei he ʻana ʻoe fanga laione,
mei he ngaahi moʻunga ʻoe fanga lēpati.
9 ʻE hoku tuofefine mo hoku ʻunoho,
kuo kavea hoku loto kiate koe; kuo mole hoku loto ʻi he sio mai tuʻo taha pe ʻa ho mata,
mo e kahoa pe taha ʻi ho kia.
10 Hono ʻikai matamatalelei ʻa hoʻo ʻofa, ʻE hoku tuofefine mo hoku ʻunoho!
Hono ʻikai lelei hake hoʻo ʻofa ʻi he uaine,
mo e nanamu ʻo hoʻo ngaahi meʻa tākai ʻi he meʻa namu kakala kotoa pē.
11 ʻE hoku ʻunoho, ʻoku toʻi ho loungutu ʻo hangē ko e hone mei hono ngeʻesi:
ʻoku ʻi lalo ʻi ho ʻelelo ʻae hone mo e huʻahuhu;
pea ko e nanamu ʻo ho ngaahi kofu ʻoku tatau mo e nanamu ʻo Lepanoni.
12 ʻOku tatau mo e ngoue kuo ʻāʻi, ʻa hoku tuofefine mo hoku ʻunoho;
ko e vai mapunopuna ia kuo taʻofia,
ko e matavai ia kuo tāpuni ke maʻu.
13 Ko ia ʻoku tupu ʻiate koe ʻoku tatau mo e ngoue pomikanite mo hono ngaahi fua lelei;
ko e saipalesi mo e naatosi,
14 Ko e naatosi mo e kakosi;
ko e kalamusi mo e sinamoni, mo e ʻakau kotoa pē ʻoku namu lelei;
ko e mula mo e ʻalosi, mo e fungani hake ʻoe ngaahi kakala kotoa pē:
15 Ko e matavai ʻi he ngaahi ngoue,
ko e matavai ʻoe ngaahi vai moʻui,
mo e ngaahi vaitafe mei Lepanoni.
16 ʻE matangi tokelau, ke ke ʻaa pea haʻu mo e tonga;
ʻo havilivili ki heʻeku ngoue, koeʻuhi ke ngangatu mei ai ʻae ngaahi namu kakala.
Tuku ke haʻu ʻa hoku ʻofaʻanga ki heʻene ngoue,
mo ne kai ai hono ngaahi fua lelei.