60
1 ʻOku hanu ʻa Tevita ki he ʻOtua ʻi he fakamaau ʻi muʻa. 4 ʻOku ne lotu ke moʻui, pea ʻamanaki lelei ki ai. 6 ʻOku ne fakafiemālieʻi ia ʻi he ngaahi talaʻofa ʻae ʻOtua, ʻaia ʻoku ne falala ki ai.
Ki he Takimuʻa ʻi he Susani-Etuta, ko e Saame mahuʻinga ʻa Tevita, ke ako ʻaki; ʻi heʻene tauʻi ʻa ʻElama-Nahalaimi mo ʻElama-Sopa, pea liu mai ʻa Soape, ʻo ne tāmateʻi ʻi he luo ʻoe māsima ʻae tokotaha mano ma toko ua afe ʻoe kakai ʻItomi.
1 ʻE ʻOtua, kuo ke liʻaki ʻakimautolu;
kuo ke veteki ʻakimautolu;
naʻa ke houhau;
ke ke toe tafoki mai kiate kimautolu.
2 Kuo ke lulu ʻae fonua ke tetetete;
kuo mafahifahi ia:
ke ke fakalelei hono ngaahi maumau;
he ʻoku ngalulu ia.
3 Kuo ke fakahā ʻae ngaahi meʻa faingataʻa ki hoʻo kakai;
kuo ke fakainu ʻaki ʻakimautolu ʻae uaine fakaofo.
4 Kuo ke foaki ʻae fuka kiate kinautolu naʻe manavahē kiate koe,
ke fakahā ia koeʻuhi ko e moʻoni.
Sila.
5 Koeʻuhi ke hao ʻaia ʻoku ke ʻofa ai;
ke ke fakamoʻui ʻaki ho nima toʻomataʻu,
ʻo fanongo kiate au.
6 Kuo folofola ʻae ʻOtua ʻi heʻene māʻoniʻoni;
“Te u fiefia, te u vaeua ʻa Sikemi,
ʻo fuofua ʻae luo ʻo Sukote.
7 ʻOku ʻoʻoku ʻa Kiliati, pea ʻoʻoku mo Manase;
ko e mālohi foki ʻo hoku ʻulu ʻa ʻIfalemi;
ko ʻeku fai fono ʻa Siuta;
8 Ko ʻeku ipu kaukauʻanga ʻa Moape;
te u lī hoku topuvaʻe ki ʻolunga ki ʻItomi:
Filisitia, ke ke vikiviki koe koeʻuhi ko au.”
9 Ko hai te ne ʻomi au ki he kolo mālohi?
Ko hai te ne aʻutaki au ki ʻItomi?
10 ʻE ʻOtua, ʻe ʻikai te ke fai ia, ʻa koe kuo ke liʻaki ʻakimautolu?
ʻA koe, ʻE ʻOtua, naʻe ʻikai te ke ʻalu mo ʻemau ngaahi kautau?
11 Ke ke tuku kiate kimautolu ʻae tokoni mei he mamahi:
he ʻoku taʻeʻaonga ʻae tokoni ʻae tangata.
12 Ko e meʻa ʻi he ʻOtua te tau fai mālohi ai:
he ko ia ia te ne malaki hifo hotau ngaahi fili.