19
1 ʻOku fakahā ʻe he ngaahi ngāue ʻae ʻOtua hono nāunau, 7 Mo ʻene ʻofa ʻi heʻene folofola. 12 ʻOku lotu ʻa Tevita ke ne maʻu ʻae ʻofa.
Ki he Takimuʻa, ko e Saame ʻa Tevita.
1 ʻOku fakahā ʻe he ngaahi langi ʻae nāunau ʻoe ʻOtua;
pea ʻoku fakahā ʻe he ʻatā ʻae ngāue ʻa hono nima.
2 ʻOku lea ʻe he ʻaho ki he ʻaho,
pea fakahā ʻe he pō ki he pō ʻae ʻilo.
3 ʻOku ʻikai ha leʻo pe ha lea,
ʻoku taʻeongoʻi honau leʻo.
4 Kuo hoko ʻenau fua ki he fonua kotoa pē,
mo ʻenau ngaahi lea ki he ngataʻanga ʻo māmani.
Kuo fokotuʻu ʻe ia ʻi ai ʻae nofoʻanga ki he laʻā,
5 ʻAia ʻoku hangē ko e tangata taʻane ʻoku haʻu mei hono potu teuteu,
pea fiefia ʻo hangē ko e tangata mālohi ke fakapuepue.
6 Ko hono hopoʻanga ʻoku mei he ngataʻanga ʻoe langi,
mo hono ʻaluʻanga ki hono ngaahi ngataʻanga:
pea ʻoku ʻikai ha meʻa ʻe taha ʻe lilo ʻi hono mafana.
7 Ko e fono ʻa Sihova ʻoku haohaoa, ʻoku ne liliu ʻae laumālie:
ko e fakaʻilo ʻa Sihova ʻoku tuʻumaʻu, ʻoku ne fakapotoʻi ʻae vale.
8 Ko e ngaahi tuʻutuʻuni ʻa Sihova ʻoku totonu, ʻoku nau fakafiefiaʻi ʻae loto:
ko e fekau ʻa Sihova ʻoku māʻoniʻoni, ʻoku ne fakamaama ki he mata.
9 Ko e manavahē kia Sihova ʻoku maʻa, pea tolonga taʻengata:
ko e ngaahi fakamaau ʻa Sihova ʻoku moʻoni mo māʻoniʻoni kotoa pē.
10 ʻOku totonu ke lahi hake ʻae holi ki ai ʻi he holi ki he koula, ʻio, ʻi he koula lahi mo lelei:
ʻoku huʻamelie lahi hake ia ʻi he honi mo hono toʻi ʻae honi.
11 Pea kuo valokia ai foki ʻa ho tamaioʻeiki:
pea ʻi he tauhi ki ai ʻoku lahi hono totongi.
12 Ko hai te ne faʻa ʻilo ʻene ngaahi hē?
Ke ke fakamaʻa au mei he ngaahi angahala fufū.
13 Pea ke taʻofi hoʻo tamaioʻeiki foki mei he ngaahi angahala ʻoku fai ʻi he ʻilo;
ke ʻoua naʻa nau puleʻi au:
ko ia te u angatonu ai,
pea te u māʻoniʻoni mei he angahala lahi.
14 ʻE Sihova, ko hoku mālohi, mo hoku huhuʻi,
tuku ke lelei ʻi ho ʻao,
ʻae ngaahi lea ʻa hoku ngutu, mo e fakakaukau ʻa hoku loto.