15
1–5 ʻOku fakahā ʻe Tevita ʻae tangata totonu ʻoe kolo ko Saione.
Ko e Saame ʻa Tevita.
1 ʻE Sihova, ko hai te ne nofo ʻi ho fale fehikitaki?
Ko hai te ne nofomaʻu ʻi ho moʻunga māʻoniʻoni?
2 Ko ia ia ʻoku ʻeveʻeva ʻi he angatonu, pea ngāue ʻi he māʻoniʻoni,
mo lea ʻaki ʻae moʻoni ʻi hono loto.
3 Ko ia ʻoku ʻikai lauʻikovi ʻaki hono ʻelelo,
pe fai kovi ki hono kaungāʻapi,
pe toʻo hake ʻae lea kovi ki hono kaungāʻapi.
4 ʻAia ʻoku kovi ki hono mata ʻae tangata fai kovi;
ka ʻoku ne fakaʻapaʻapa kiate kinautolu ʻoku manavahē kia Sihova.
ʻOku ne fuakava, pea kovi ai ia, ka ʻe ʻikai liliu ai.
5 Ko ia ʻoku ʻikai ʻange ʻene ngaahi paʻanga koeʻuhi ko e totongi,
pe toʻo ʻe ia ʻae totongi ke fai kovi ki he māʻoniʻoni.
Ko ia ʻoku ne fai ʻae ngaahi meʻa ni ʻe ʻikai ueʻi ia ʻo taʻengata.