3
1–8 Ko e hūfanga malu ʻa Sihova.
Ko e Saame ʻa Tevita, ʻi heʻene hola meia ʻApisalomi ko hono foha.
1 ʻE Sihova, kuo tupu ʻo tokolahi ʻakinautolu ʻoku fakamamahiʻi au!
ʻOku tokolahi ʻakinautolu ʻaia ʻoku tuʻu hake ʻo angatuʻu kiate au.
2 ʻOku tokolahi ʻakinautolu ʻaia ʻoku pehē ki hoku laumālie,
“ʻOku ʻikai ha tokoni kiate ia ʻi he ʻOtua.”
Sila.
3 Ka ko koe, ʻE Sihova, ko e fakaū kiate au;
ko hoku nāunau, mo e hiki hake ʻa hoku ʻulu.
4 Naʻaku tangi kia Sihova ʻaki hoku leʻo,
pea naʻa ne ongoʻi au mei hono moʻunga māʻoniʻoni.
Sila.
5 Ne u tokoto hifo ʻo mohe; pea u ʻā hake;
he ko Sihova naʻa ne tokoniʻi au.
6 ʻE ʻikai te u manavahē ʻi he ngaahi toko mano ʻoe kakai,
ʻaia ʻoku angatuʻu ʻo kāpui au.
7 Tuʻu hake, ʻE Sihova;
fakamoʻui au, ʻE hoku ʻOtua:
he kuo ke taaʻi hoku ngaahi fili kotoa pē ʻi honau hui kouʻahe
kuo ke fesiʻi ʻae kau nifo ʻoe angakovi.
8 ʻOku ʻia Sihova ʻae fakamoʻui:
ko hoʻo tāpuaki ʻoku ʻi hoʻo kakai.
Sila.