27
1 Ko e lea ʻoku kau ki he fielahi, 5 Ko e ʻofa ʻoku moʻoni, 11 Ke ʻoua naʻa fakatupu kovi, 23 Ke faʻa ngāue ʻae tangata ʻi heʻene meʻa.
1 ʻOua naʻa ke polepole ki he ʻapongipongi;
he ʻoku ʻikai siʻi te ke faʻa ʻilo ʻae meʻa ʻe hoko ʻi ha ʻaho.
2 Tuku ke fakamālō kiate koe ʻe ha tangata kehe,
ka ʻe ʻikai ʻi ho ngutu ʻoʻou pe;
ko e taha kehe, ka ʻe ʻikai ʻi ho loungutu ʻoʻou.
3 ʻOku mamafa ʻae maka,
pea ko e meʻa mamafa mo e ʻoneʻone,
ka ko e ʻita ʻae vale ʻoku mamafa hake ia ʻi ai.
4 ʻOku fakamālohi ʻae houhau, pea ko e meʻa fakalili ʻae ʻita;
ka ko hai ʻoku faʻa kātakiʻi ʻae fuaʻa?
5 ʻOku lelei hake ʻae valoki ʻoku fai fakahā,
ʻi he ʻofa ʻoku fakalilolilo.
6 Ko e lavea mei he kāinga ko e angatonu ia;
ka ko e ngaahi ʻuma mei ha fili ko e kākā ia.
7 ʻOku fehiʻa ʻaia ʻoku mākona ki he ngeʻesi ʻoe honi;
ka ʻoku huʻamelie ʻae meʻa konā kotoa pē kiate ia ʻoku fiekaia.
8 ʻOku tatau mo e manupuna kuo hē mei hono pununga,
ʻae tangata ko ia kuo hē mei hono nofoʻanga.
9 ʻOku fakafiefiaʻi ʻae loto ʻaki ʻae lolo tākai mo e meʻa namu kakala:
ʻoku pehē ʻae lelei ʻoe kāinga ki ha tangata, ko e meʻa ʻi he akonakiʻi ʻoku fai mei he loto.
10 ʻOua naʻa ke siʻaki ho kāinga ʻoʻou, pe ko e kāinga ʻo hoʻo tamai;
pea ʻoua naʻa ke ʻalu ki he fale ʻo ho tokoua ʻi he ʻaho ʻo hoʻo mamahi:
he ʻoku lelei hake ho kaungāʻapi pe ʻoku ofi, ʻi ho tokoua ka ʻoku ne mamaʻo.
11 ʻE hoku foha, ke ke poto koe,
pea ke fakafiefiaʻi hoku loto,
koeʻuhi ke u faʻa tali ia ʻaia ʻoku manuki kiate au.
12 ʻOku sio mamaʻo atu ʻae tangata fakapotopoto ki he kovi, ʻo ne fufū ia mei ai:
ka ʻoku mole atu pe ʻae vale, pea tautea ia.
13 Ke toʻo pe ʻae kofu ʻoʻona ʻoku tongia ha taha ʻoku ʻikai ʻiloʻi,
pea ke maʻu mei ai ʻae tuku paʻanga ko e langomakiʻi ʻoe fefine muli.
14 Ko ia ʻoku fakamālō leʻo lahi ki hono kāinga ʻi heʻene tuʻu hake kei hengihengi,
ʻe lau ia ko e fakamalaʻia kiate ia.
15 Ko e tō maʻu pe ʻae ʻuha ʻi he ʻaho ʻoe ʻuha lahi,
ʻoku na tatau mo e fefine ʻoku faʻa kē.
16 Ko ia ʻoku ne fakafufū ia ʻoku tatau mo ʻene fakafufū ʻae matangi,
pē ko e meʻa nanamu ʻi hono nima toʻomataʻu ʻaia ʻoku fakahā ia.
17 ʻOku fakamāsila ʻe he ukamea ʻae ukamea;
ʻoku pehē ʻae fakalelei ʻe he tangata ʻae mata ʻo hono kāinga.
18 Ko ia ʻoku faʻa tauhi ki he ʻakau ko e fiki te ne kai ʻe ia hono fua:
pea pehē foki, ko ia ʻoku tauhi ki heʻene ʻeiki ʻe hakeakiʻi ia.
19 Hangē ko e sioʻata ʻae mata ki he mata ʻi he vai,
ʻoku pehē ʻae loto ʻoe tangata ki he tangata.
20 ʻOku ʻikai ke pito ʻa hētesi mo e fakaʻauha;
pea pehē, ʻoku ʻikai ʻaupito ke fiemālie ʻae mata ʻoe tangata.
21 Hangē ko e kulo fakamaʻa ki he siliva mo e afi kakaha ki he koula;
ʻoku pehē, ʻoku ʻiloʻi ʻae tangata mei hono ongoongo.
22 Naʻa mo hoʻo fakavolu ha vale ʻi he momosiʻanga fakataha mo e uite ʻaki ʻae meʻa momosi,
ʻe ʻikai mahuʻi ʻene vale meiate ia.
23 Ke ke tokanga lahi ke ʻiloʻi pe ʻoku fēfē hoʻo fanga sipi,
pea vakai lahi ki hoʻo fanga manu kehekehe.
24 He ʻoku ʻikai tolonga maʻuaipē ʻae koloa:
pea ʻoku tolonga koā ʻae tatāfakatuʻi ki he toʻutangata kotoa pē?
25 ʻOku hā mai ʻae mohuku mōmoa, mo e musie toki tupu ʻoku hā mai ia,
pea ʻoku tānaki ʻae ʻakau iiki ʻoe ngaahi moʻunga.
26 ʻOku ai ʻae fanga lami koeʻuhi ke ke maʻu ho kofu,
pea mo e fanga kosi ko e totongi ia ʻo hoʻo ngoue.
27 Pea ʻe lahi ʻae huʻa kosi ki hoʻo kai,
mo e kai ʻa hoʻo kau nofoʻanga,
pea ke moʻui ai ʻa hoʻo kau kaunanga.