23
1–35 Pea hokohoko atu ki he ngaahi vahe hoko...
1 ʻOka ke ka nofo ke keinanga mo ha taha ʻoku pule,
tokanga lahi ki he meʻa ʻoku ʻi ho ʻao:
2 Pea kapau ko e tangata faʻa kai koe,
ai ha hele ki ho kia.
3 ʻOua naʻa ke holi ki heʻene ngaahi meʻa lelei:
he ko e meʻakai kākā ia.
4 ʻOua naʻa fai feinga ke ke koloaʻia:
pea ʻoua naʻa falala ki ho poto ʻoʻou.
5 He te ke sio fakamamaʻu ki he meʻa ʻoku ʻikai?
He ko e moʻoni ʻoku ngaohi ʻe he koloa hono kapakau; ʻoku puna atu ia ʻo hangē ko e ʻikale ki he langi.
6 ʻOua naʻa ke kai ʻi he mā ʻaʻana ʻoku manumanu hono mata,
pea ʻoua naʻa ke holi ki heʻene ngaahi meʻakai lelei:
7 He ko e ngaahi mahalo ʻo hono loto, ko ia ai pe ia:
ʻoku ne pehē kiate koe, “Ke ke kai mo inu;”
ka ʻoku ʻikai ʻiate koe hono loto.
8 Ko e momoʻi meʻa kuo ke kai te ke toe lua ʻaki,
pea mole mo hoʻo ngaahi lea lelei.
9 ʻOua naʻa ke lea ʻi he telinga ʻoe vale,
he te ne manukiʻi ʻae poto ʻo hoʻo ngaahi lea.
10 ʻOua naʻa hiki ʻae kauʻā motuʻa;
pea ʻoua naʻa faʻao ʻae potu ngoue ʻae tamai mate:
11 He ʻoku māfimafi ʻa honau huhuʻi,
pea te ne fai mo koe ʻi heʻenau meʻa.
12 Fakatokangaʻi ho loto ki he akonaki,
pea mo ho telinga ki he ngaahi lea ʻae ʻilo.
13 ʻOua naʻa taʻofi ʻae tauteʻi mei he tamasiʻi:
he kapau te ke taaʻi ia ʻaki ʻae meʻa tā, ʻe ʻikai mate ia.
14 He te ke tauteʻi ʻaki ia ʻae meʻa tā,
ʻo fakahaofi ai hono laumālie mei heli.
15 ʻE hoku foha, kapau ʻe poto ho loto,
ʻe fiefia ai hoku loto, ʻio, te u fiefia au.
16 Ko e moʻoni ʻe fiefia hoku loto,
ʻoka lea ʻaki ʻe ho loungutu ʻae ngaahi meʻa totonu.
17 ʻOua naʻa meheka ho loto ki he angahala:
ka ke manavahē koe kia Sihova ʻi he ʻaho kotoa pē.
18 He ko e moʻoni ʻoku ai ha ngataʻanga;
pea ʻe ʻikai motuhi hoʻo ʻamanaki.
19 Ke ke fanongo, ʻE hoku foha, pea ke poto,
pea fakahinohino ho loto ʻi he hala.
20 ʻOua naʻa ke kau mo e kakai faʻa inu ke konā,
mo kinautolu ʻoku ʻuakai ki heʻenau meʻakai:
21 Koeʻuhi ʻe iku ki he masiva ʻaia ʻoku faʻa konā mo faʻa ʻuakai:
pea ko ia ʻoku faʻa mohe ʻe kofu mahaehae pe ia.
22 Fakaongo ki hoʻo tamai naʻa ke tupu ai,
pea ʻoua naʻa ke taʻeʻofa ki hoʻo faʻē ʻoka motuʻa ia.
23 Fakatau mai ʻae moʻoni, pea ʻoua naʻa toe fakatau atu;
ʻae poto, mo e akonaki, pea mo e faʻa fakakaukau.
24 ʻE fiefia lahi ʻae tamai ʻaʻana ʻoku māʻoniʻoni:
pea ko ia ʻoku ne maʻu ʻae tamasiʻi ʻoku poto ʻe fiefia ia ʻiate ia.
25 ʻE fiefia ʻa hoʻo tamai mo hoʻo faʻē,
pea ʻe fiefia ia naʻa ne fanauʻi koe.
26 ʻE hoku foha, foaki mai ho loto,
pea ke tokangaʻi ʻe ho mata ʻa hoku ngaahi hala.
27 He ʻoku tatau mo e luo taumamaʻo ʻae fefine faʻa feʻauaki;
pea ko e fefine anga kehe ʻoku tatau mo e luo ʻapiʻapi.
28 ʻOku ne toʻi foki ʻo hangē ha kaihaʻa,
pea ʻoku ne fakatokolahi ʻae kau angahala ʻi he kakai.
29 Ko hai ia ʻoku malaʻia?
Ko hai ia ʻoku mamahi?
Ko hai ia ʻoku ʻi he feʻiteʻitani?
Ko hai ʻoku papūnoa?
Ko hai ʻoku lavea noa pe?
Ko hai ʻoku kulokula hono mata?
30 Ko kinautolu ʻoku nofo fuoloa ke inu ke konā;
ʻakinautolu ʻoku ʻalu ke kumi ʻae uaine kuo felingiʻaki.
31 ʻOua naʻa ke sio ki he uaine ʻi heʻene kulokula,
ʻi heʻene tuku hono lanu ʻi he ipu,
pea ʻoku mālie hono inu.
32 Koeʻuhi ʻe uʻu ia ʻamui ʻo hangē ha ngata,
pea huhu foki ʻo hangē ko e ngata kona.
33 ʻE sio ho mata ki he kau fefine anga kehe,
pea ʻe fakahā mei ho loto ʻae ngaahi meʻa fakafufū.
34 ʻIo, te ke hangē ha taha ʻoku tokoto hifo ʻi loto tahi,
pe ha taha ʻoku mohe ʻi ha funga fanā.
35 Te ke pehē ʻe koe, “Kuo nau taaʻi au, ka ʻoku ʻikai te u mamahi;
pea kuo nau haha au, ka ʻoku ʻikai te u ongoʻi ia:
te u ʻā ʻafē?
Te u toe kumi pe ki ai.”