15
1–33 Pea hokohoko atu ki he ngaahi vahe hoko...
1 ʻOku tekeʻi atu ʻae houhau ʻe he tali fakavaivai:
ka ʻoku fakatupu ʻae ʻita ʻi he lea fakamamahi.
2 ʻOku ngāue totonu ʻaki ʻae ʻilo ʻe he ʻelelo ʻoe poto:
ka ʻoku malingi ʻae vale mei he ngutu ʻoe vale.
3 ʻOku ʻi he potu kotoa pē ʻae fofonga ʻo Sihova,
ʻo ne ʻafioʻi ʻae kovi mo e lelei.
4 Ko e ʻelelo fakamoʻui ko e ʻakau ia ʻoe moʻui:
pea ka talangataʻa ia ko e maumau ia ʻoe laumālie.
5 ʻOku fehiʻa ʻae vale ki he akonaki ʻa ʻene tamai:
ka ʻoku fakapotopoto ia ʻaia ʻoku tokanga ki he valoki.
6 ʻOku ai ʻae koloa lahi ʻi he fale ʻoe māʻoniʻoni:
ka ʻoku ai ʻae mamahi ʻi he koloa ʻae angahala.
7 ʻOku tufa atu ʻae poto ʻe he loungutu ʻoe poto:
ka ʻoku ʻikai ke fai pehē ʻe he loto ʻoe vale.
8 Ko e meʻa fakalielia kia Sihova ʻae feilaulau ʻae angahala:
ka ko e lotu ʻae angatonu ʻoku ne fiemālie ai.
9 Ko e meʻa fakalielia kia Sihova ʻae hala ʻoe angakovi:
ka ʻoku ne ʻofa kiate ia ʻoku muimui ki he māʻoniʻoni.
10 Ko e meʻa fakamamahi ʻae tautea kiate ia kuo liʻaki ʻae hala:
pea ko ia ʻoku fehiʻa ki he valoki ʻe mate ia.
11 ʻOku ʻi he ʻao ʻo Sihova ʻa hētesi pea mo e fakaʻauha:
kae muʻa hake ʻae loto ʻoe fānau ʻae tangata!
12 ʻOku ʻikai ʻofa ʻae tangata manuki kiate ia ʻoku valokiʻi ia:
pea ʻoku ʻikai fie ʻalu atu ia ki he poto.
13 ʻOku fakafiefiaʻi ʻae mata ʻe he loto ʻoku fiemālie:
ka ʻoku maumauʻi ʻae laumālie ʻe he mamahi ʻoe loto.
14 ʻOku kumi ki he poto ʻe he loto ʻoʻona ʻoku faʻa ʻilo:
ka ʻoku kai ʻae vale ʻe he ngutu ʻoe kakai vale.
15 ʻOku kovi ʻae ʻaho kotoa pē ʻonautolu ʻoku mamahi:
ka ʻoku fai kātoanga maʻuaipē ia ʻaia ʻoku loto fiemālie.
16 ʻOku lelei lahi hake ʻae meʻa siʻi mo e manavahē kia Sihova,
ʻi he koloa lahi ʻoku maʻu mo e kovi.
17 ʻOku lelei hake ʻae meʻakai ʻaki ʻae louʻakau pea ai mo e ʻofa,
ʻi he kai ha pulu kuo fafanga, kae maʻu mo e fehiʻa.
18 ʻOku fakatupu ʻe he tangata faʻa ʻita ʻae feʻiteʻitani:
ka ʻoku lolomi ʻae feʻiteʻitani ʻe ia ʻoku fakatotoka ki he ʻita.
19 ʻOku tatau ʻae hala ʻoe tangata fakapikopiko mo e ʻā ʻakau talatala:
ka ʻoku hangamālie ʻae hala ʻoe māʻoniʻoni.
20 ʻOku fakafiefiaʻi ʻae tamai ʻe he foha ʻoku poto:
ka ʻoku fehiʻa ʻae tangata vale ki heʻene faʻē.
21 Ko e vale ko e fakafiefia ia kiate ia ʻoku taʻemaʻu ʻae poto:
ka ʻoku ʻeveʻeva ʻi he angatonu ʻae tangata ʻoku faʻa ʻilo.
22 ʻOku ʻikai hoko ʻae ngaahi meʻa kuo tuʻutuʻuni, ko e meʻa ʻi he masiva fakakaukau:
ka ʻi he tokolahi hono kau fakakaukauʻi ʻoku toki maʻu ai ia.
23 ʻOku maʻu ʻe he tangata ʻae fiefia ʻi he lea ʻa hono ngutu:
pea ko e lea ʻoku fai ʻi hono kuonga totonu, hono ʻikai lelei fau ia!
24 ʻOku māʻolunga ʻae hala ʻoe moʻui kiate kinautolu ʻoku poto,
koeʻuhi ke nau hao mei heli ʻoku ʻi lalo.
25 ʻE fakaʻauha ʻe Sihova ʻae fale ʻoe fielahi:
ka ʻe fokotuʻumaʻu ʻe ia ʻae kauhala ʻoe fefine kuo mate hono ʻunoho.
26 Ko e meʻa fakalielia kia Sihova ʻae ngaahi mahalo ʻae angakovi:
ka ko e ngaahi lea ʻae māʻoniʻoni ko e ngaahi lea ia ʻoku lelei.
27 Ko ia ʻoku manumanu ki he koloa, ʻoku fakafiuʻi ʻe ia hono fale ʻoʻona;
ka ko ia ʻoku fehiʻa ki he ngaahi meʻa foaki ʻe moʻui ia.
28 ʻOku fakakaukau ʻe he loto ʻoe māʻoniʻoni ʻae lea te ne tali ʻaki:
ka ʻoku malingi mei he ngutu ʻoe angahala ʻae ngaahi meʻa kovi.
29 ʻOku mamaʻo ʻaupito ʻa Sihova mei he angahala:
ka ʻoku ne ongoʻi ʻae lotu ʻae māʻoniʻoni.
30 ʻOku fiefia ʻae loto ʻi he maama ʻoe mata:
pea ʻoku tupu ʻi he ongoongolelei ʻae huhuʻa ʻoe hui.
31 Ko e telinga ʻoku fakafanongo ki he valoki fakamoʻui,
ʻe nofomaʻu ia ʻi he haʻohaʻonga ʻoe poto.
32 Ko ia ʻoku manuki ki he akonaki, ʻoku ne fehiʻa ki hono laumālie ʻoʻona:
ka ko ia ʻoku fanongo ki he valoki, ʻoku maʻu ʻe ia ʻae loto poto.
33 Ko e manavahē kia Sihova, ko e akonaki ia ʻoe poto;
pea ʻoku muʻomuʻa ʻae angavaivai ʻi he hakeakiʻi.