4
1 Ko e nāunau, 3 Mo e melino, 8 Mo e pule; 11 Pea mo e ikuna ʻae siasi.
1 Ka ʻe hoko ʻo pehē ʻi he ngaahi ʻaho ʻamui,
ʻe fokotuʻumaʻu ʻae moʻunga ʻoe fale ʻo Sihova ʻi he tumutumu ʻoe ngaahi moʻunga,
pea ʻe hakeakiʻi ia ke māʻolunga ʻi he ngaahi tafungofunga;
pea ʻe tafe atu ki ai ʻae kakai.
2 Pea ʻe haʻu ʻae kakai tokolahi mo nau pehē,
“Haʻu ke tau ʻalu hake ki he moʻunga ʻo Sihova,
pea ki he fale ʻoe ʻOtua ʻo Sēkope;
pea te ne akonakiʻi ʻakitautolu ʻi hono ngaahi hala,
pea te tau ʻeveʻeva ʻi hono ngaahi hala.”
He ko e fono ʻe ʻalu atu mei Saione,
mo e folofola ʻa Sihova mei Selūsalema.
3 Pea te ne fakamaau ʻi he lotolotonga ʻoe ngaahi kakai,
mo valokiʻi ʻae ngaahi puleʻanga mālohi ʻoku mamaʻo atu;
pea te nau tuki ʻenau ngaahi heletā, ko e ngaahi huo toho,
pea mo ʻenau ngaahi tao, ko e ngaahi hele ʻauhani:
ʻe ʻikai hiki ʻe ha puleʻanga ʻae heletā ki ha puleʻanga,
pea ʻe ʻikai te nau toe ako ki he tau.
4 Ka te nau nofo taki taha ʻae tangata ʻi he malumalu ʻo hono vaine, mo e malumalu ʻo hono fiki;
pea ʻe ʻikai ha niʻihi ke fakamanavahēʻi ʻakinautolu:
he ko e fofonga ʻo Sihova ʻoe ngaahi kautau kuo ne folofola ai. 5 He ko e kakai kotoa pē ʻe ʻeveʻeva taki taha ʻi he hingoa ʻo hono ʻOtua,
pea te mau ʻeveʻeva ʻi he huafa ʻo Sihova ko homau ʻOtua ʻo lauikuonga mo taʻengata.
6 ʻOku pehē ʻe Sihova, “ʻI he ʻaho ko ia,
te u tānaki ʻaia naʻe lotolotoua,
pea te u fakataha ʻaia naʻe kapusi kituʻa,
pea mo ia kuo u fakamamahi;
7 Pea te u ngaohi ia ko e toenga ʻaia naʻe lotolotoua,
pea ko e puleʻanga mālohi ʻaia naʻe siʻaki ki he mamaʻo:
pea ʻe pule ʻa Sihova kiate kinautolu ʻi he moʻunga ko Saione, ʻo ngata mei heni, ʻo aʻu ʻo taʻengata.”
8 Pea ko koe, ʻe fale leʻo ʻo Iteli, ko e potu mālohi ʻoe ʻofefine ʻo Saione,
ʻe hoko kiate koe,
ʻio, ʻae ʻuluaki pule:
ʻe hoko ʻae puleʻanga ki he ʻofefine ʻo Selūsalema.
9 Ko eni, ko e hā ʻoku ke tangi kalanga ai?
ʻOku ʻikai ha tuʻi kiate koe?
Kuo ʻauha hoʻo tangata ako fono?
He ko e mamahi kuo ne maʻu koe, ʻo hangē ha fefine langā.
10 ʻIo, te ke mamahi, pea ke feinga ke fāʻeleʻi, ʻe ʻofefine ʻo Saione,
ʻo hangē ha fefine ʻoku langā:
he ko eni, te ke toki ʻalu atu ʻi he kolo,
pea te ke nofo ʻi he ngoue,
pea te ke ʻalu, ʻio, ki Papilone;
ʻe fakahaofi koe ʻi ai;
ʻe huhuʻi koe ʻi ai ʻe Sihova, mei he nima ʻo ho ngaahi fili.
11 Kuo fakataha ni foki ʻae ngaahi puleʻanga kiate koe, ʻaia ʻoku nau pehē,
“Ke fakaʻuliʻi ia,
pea ke sio hotau mata ki Saione.”
12 Ka ʻoku ʻikai te nau ʻilo ʻae ngaahi fakakaukau ʻa Sihova,
pea ʻoku ʻikai te nau poto ʻi heʻene ngaahi filioʻi:
he te ne tānaki ʻakinautolu ʻo hangē ko e ngaahi ū koane ki he feleoko.
13 Tuʻu, pea ke haha, ʻe ʻofefine ʻo Saione:
he te u ngaohi ho nifo, ko e ukamea,
mo ho ngeesivaʻe, ko e palasa;
pea te ke laiki ʻae ngaahi kakai tokolahi:
pea te u fakatapui ki he ʻOtua, ʻenau koloa tupu,
mo ʻenau koloa, kia Sihova ʻo māmani kotoa pē.