21
1 ʻOku fakahā ʻe Siope ʻoku totonu ʻene mamahi ʻi he fakamaau ki ai ʻae kakai. 7 ʻOku monūʻia ʻae angahala ʻi he ʻaho niʻihi, ka ʻoku nau manuki ki he ʻOtua. 16 Ka ʻoku ʻilongofua ʻenau malaʻia ʻi he ʻaho niʻihi. 22 ʻOku tatau ʻi he mate ʻae kakai fiemālie mo e taʻefiemālie. 27 ʻE fakamaau ʻae angahala ʻi he maama ʻe haʻu.
1 Ka naʻe tali ʻe Siope, ʻo ne pehē,
2 “Fakafanongo lelei ki heʻeku lea,
pea ko hoʻomou fakafiemālie eni.
3 Mou kātaki, kau lea atu;
pea hili ʻeku lea, fai pe hoʻomou manuki.
4 ʻOiauē, he ʻoku ou liunga ki he tangata?
Pea ka ne ko ia, ko e hā nai ʻe ʻikai mamahi ai hoku laumālie?
5 Tokanga mai, pea mou ofo,
pea ʻai homou nima ki homou ngutu.
6 ʻIo, ʻi heʻeku fakamanatu ʻoku ou manavahē ʻaupito,
pea ʻoku puke ʻa hoku kakano ʻe he tetetete.
7 “Ko e hā ʻoku moʻui ai ʻae angakovi,
ʻo hoko ʻo motuʻa, ʻio, pea lahi ʻi he mālohi?
8 Kuo fakatuʻumaʻu honau hako fakataha mo kinautolu,
pea mo ʻenau fānau ʻi honau ʻao.
9 ʻOku malu honau fale mei he manavahē,
pea ʻoku ʻikai ʻiate kinautolu ʻae meʻa tā ʻae ʻOtua.
10 ʻOku fakatauʻi ʻe heʻenau pulu tangata ʻo touʻia taʻehala;
ʻoku fānau ʻenau pulu fefine ʻo taʻetōhonoʻuhiki.
11 ʻOku nau tuku atu ʻenau fānau ʻo hangē ko e fanga sipi,
pea ʻoku meʻe hopohopo ʻenau fānau.
12 ʻOku nau toʻo hake ʻae kihiʻi lali mo e haʻape,
pea nau fiefia ʻi he leʻo ʻoe meʻa ifi.
13 ʻOku nau fakaʻosi honau ngaahi ʻaho ʻi he fakafiemālie,
pea fakafokifā pe ʻoku nau ʻalu hifo ki he faʻitoka.
14 Ko ia ʻoku nau pehē ai ki he ʻOtua, ‘ʻAlu ʻiate kimautolu,
he ʻoku ʻikai te mau holi ke ʻilo ho ngaahi hala.
15 Ko hai ʻae Māfimafi, ke pehē ke mau tauhi ia?
Pea ko e hā ʻae totongi te mau maʻu, ʻo kapau te mau lotu ki ai?’
16 Vakai, ʻoku ʻikai ʻi honau nima ʻenau monūʻia:
ʻoku mamaʻo ʻiate au ʻae fakakaukau ʻoe angahala.
17 “ʻOku liunga fiha ʻae tāmateʻi ʻoe maama ʻae angahala?
Mo e hoko ʻenau fakaʻauha kiate kinautolu?
ʻoku tufaki ʻe he ʻOtua ʻae ngaahi mamahi ʻi hono houhau.
18 ʻOku nau tatau mo e tefitoʻi kaho ʻi he mata ʻoe matangi,
pea hangē ko e kafukafu ʻoku ʻave ʻe he afi.
19 ‘ʻOku hili ʻe he ʻOtua ʻa ʻene angahala ki heʻene fānau:’
ʻoku ne totongi kiate ia, pea te ne ʻilo ia.
20 ʻE mamata ʻe hono mata ki hono fakaʻauha,
pea ʻe inu ia ʻi he houhau ʻoe Māfimafi.
21 He ko e hā ʻene fiemālie ʻi hono fale ʻamui ʻiate ia,
ʻoka tuʻu ua mālie ʻae lau ʻo hono ngaahi māhina?
22 “ʻE akonakiʻi ʻe ha taha ʻae ʻOtua ke ʻilo?
He ʻoku ne fakamaau ʻe ia ʻakinautolu ʻoku māʻolunga.
23 ʻOku mate ha tokotaha lolotonga ʻene mālohi lahi,
mo ʻene nofo tofu pe mo fiemālie.
24 ʻOku fonu hono sino ʻi he ngako,
pea lolololo hono ngaahi hui ʻi he uho.
25 Pea ʻoku mate ha tokotaha ʻi he mamahi lahi ʻo hono laumālie,
pea ʻikai ʻaupito haʻane kai ʻe fiemālie ai.
26 Te na tokoto tatau pe ʻi he efu,
pea ʻe ʻuʻufi ʻakinaua ʻe he fanga kelemutu.
27 “Vakai, ʻoku ou ʻilo hoʻomou ngaahi mahalo,
mo e ngaahi filioʻi kovi ʻoku mou mahalo ʻaki kiate au.
28 He ʻoku mou pehē, ‘Kofaʻā ʻae fale ʻoe ʻeiki?
Pea kofaʻā ʻae ngaahi nofoʻanga ʻoe kakai angahala?’
29 ʻIkai kuo mou ʻeke kiate kinautolu ʻoku feʻaluʻaki ʻi he hala?
Pea ʻikai ʻoku mou ʻilo ʻenau ngaahi tala,
30 ʻAia kuo tuku tolonga ʻae angahala ki he ʻaho ʻoe fakaʻauha?
ʻE taki atu ʻakinautolu ki he ʻaho ʻoe houhau.
31 Ko hai te ne fakahā hono hala ki hono mata?
Pea ʻe totongi ʻe hai kiate ia ʻae meʻa kuo ne fai?
32 Ka ʻe ʻomi ia ki he faʻitoka,
ʻe nofomaʻu ia ʻi he fonualoto.
33 ʻE melie kiate ia ʻae ngaahi tutuʻanga kelekele ʻoe luo,
pea ʻe fusi kiate ia ʻae kakai kotoa pē,
ʻo hangē ko e taʻefaʻalaua ʻae kakai naʻe muʻa ʻiate ia.
34 Pea ka kuo pehē, pea ko e hā ʻoku mou fakafiemālie taʻeʻaonga kiate au,
kae vakai ʻoku ai ʻae loi ʻi hoʻomou ngaahi lea?”