19
1 ʻOku lāunga ʻa Siope ki he angakovi ʻa hono kāinga, pea fakahā ʻoku lahi ʻae meʻa mamahi ʻiate ia ke fakatupu ai ʻenau angakovi. 21 ʻOku ne kole ʻae ʻaloʻofa. 25 ʻOku ne tui ki he toetuʻu.
1 Pea naʻe toki tali ʻe Siope, ʻo ne pehē,
2 ʻE fēfē hono fuoloa mo hoʻomou fakafiuʻi hoku laumālie,
mo lailaiki ʻaki au ʻae ngaahi lea.
3 Ko hono liunga hongofulu eni mo hoʻomou manukiʻi au:
pea ʻoku ʻikai te mou mā ʻi hoʻomou fai ʻo hangē ko e kau muli kiate au.
4 Pea kapau moʻoni kuo u hē,
ʻoku ʻiate au pe ʻeku hē.
5 Pea kapau moʻoni te mou fai fielahi kiate au,
pea talatalaakiʻi au ʻaki hoku manukiaʻanga:
6 Mou ʻilo eni, kuo fulihi au ʻe he ʻOtua,
pea ne kāpui au ʻaki hono kupenga.
7 “Vakai, ʻoku ou tangi koeʻuhi ko e fakamālohi, ka ʻoku ʻikai ongoʻi au:
ʻoku ou tangi kalanga ka ʻoku ʻikai ha fakamaau.
8 Kuo ne feleʻi hoku hala ke ʻoua naʻaku ʻalu,
pea kuo ne ʻai ʻae fakapoʻuli ʻi hoku ngaahi hala.
9 Kuo ne fakamasivaʻi au ʻi hoku nāunau,
pea kuo ne toʻo ʻae tatā mei hoku ʻulu.
10 Kuo ne fakaʻauhaʻi au mei he potu kotoa pē, pea kuo u mole:
pea kuo ne taʻaki ʻeku ʻamanaki ʻo hangē ha ʻakau.
11 Kuo ne tutu foki ʻa hono houhau kiate au,
pea ʻoku ne lauʻi au ko e taha ʻo hono ngaahi fili.
12 ʻOku fakataha ʻene ngaahi kautau,
ʻonau keli takatakai ʻiate au,
pea nofo fakatakamilo ʻi hoku fale.
13 “Kuo ne fakamamaʻo atu hoku kāinga ʻiate au,
pea ko ʻeku ngaahi kaumeʻa ʻoku mahuʻi ʻaupito meiate au.
14 Kuo mahuʻi hoku ngaahi kāinga ʻiate au,
pea kuo fakangalongaloʻi au ʻe hoku ngaahi kāinga feʻofoʻofani.
15 Ko kinautolu ʻoku nofo ʻi hoku fale, mo ʻeku kau kaunanga, ʻoku nau lau au ko e muli,
ko e taha kehe au ʻi honau ʻao.
16 Naʻaku ui ki heʻeku tamaioʻeiki, ka naʻe ʻikai te ne tali;
ne u fakakolekole ʻaki hoku ngutu ki ai.
17 Kuo fakalielia ʻa ʻeku mānava ki hoku ʻunoho,
neongo ʻa ʻeku fakakolekole koeʻuhi ko e fānau ʻa hoku sino ʻoʻoku.
18 ʻIo, naʻe manukiʻi au ʻe he fānau iiki,
ʻoku ou tuʻu hake pea nau lauʻikoviʻi au.
19 Kuo fehiʻa kiate au ʻa hoku ngaahi kāinga feʻofoʻofani kotoa pē,
pea ko kinautolu ne u ʻofa ki ai kuo liliu ʻo angatuʻu kiate au.
20 ʻOku piki hoku ngaahi hui ki hoku kili ʻo hangē ko hoku kakano,
pea kuo u hao mo e kili ʻo hoku kau nifo.
21 “ʻOfa mai kiate au, ʻofa mai kiate au, ʻakimoutolu ko hoku kāinga;
he kuo ala kiate au ʻae nima ʻoe ʻOtua.
22 Ko e hā ʻoku mou fakatanga ai au ʻo hangē ko e ʻOtua,
pea mou taʻefiu ʻi hoku kakano?
23 “Taumaiā kuo tohi ʻa ʻeku ngaahi lea!
Taumaiā kuo tohi ia ʻi ha tohi!
24 Koeʻuhi ke tohi tongi ia ʻaki ʻae peni ukamea mo e pulu,
ʻi he maka ke taʻengata!
25 He ʻoku ou ʻilo ʻoku moʻui ʻa hoku Huhuʻi,
pea ʻe tuʻu ia ʻi māmani ʻi he ʻaho fakamui.
26 Pea ka ʻosi hoku kili pea maumau hoku sino,
ka te u mamata ʻi hoku kakano ki he ʻOtua:
27 ʻAia te u mamata ki ai maʻaku,
pea ʻe vakai ki ai ʻa hoku mata, pea ʻikai ha taha kehe;
“Neongo ʻae ʻauha ʻa hoku ngaahi kupuʻi sino ʻiate au.
28 Ka ʻe lelei hoʻomou pehē, ‘Ko e hā ʻoku tau fakatanga ai ia?’
He ʻoku ʻiate au ʻae tefito ʻoe meʻa lelei.
29 Ke manavahē ʻakimoutolu ki he heletā:
he ʻoku ʻomi ʻe he ʻita ʻae ngaahi tautea ʻoe heletā,
koeʻuhi ke mou ʻilo ʻoku ai ʻae fakamaau.”