12
1 Ko e lāunga ʻa Selemaia koeʻuhi ko e monūʻia ʻae kau angahala, pea ʻoku hā kiate ia ʻenau tuʻutāmaki. 5 Ko e fakahā kiate ia ʻe he ʻOtua ʻae kākā ʻa hono kāinga. 7 ʻOku mamahi ia koeʻuhi ko hono tofiʻa. 14 Ko e talaʻofa ki he fakatomala ke nau tafoki mei he fakapōpula.
1 “ʻE Sihova, ʻoku ke angatonu,
ʻo kau ka tāpafua kiate koe:
tuku ke u lea kiate koe ʻi hoʻo ngaahi fakamaau:
ko e hā ʻoku monūʻia ai ʻae hala ʻoe angahala?
Ko e hā ʻoku fiefia lahi ai ʻakinautolu ʻoku fai kākā lahi?
2 Kuo ke tō ʻakinautolu, pea kuo nau aka:
ʻoku nau tupu, ʻio, ʻoku nau fua;
ʻoku ke ofi ʻi honau ngutu,
kae mamaʻo ʻi honau loto.
3 Ka ko koe, ʻE Sihova, ʻoku ke ʻiloʻi au;
kuo ke ʻafioʻi au, pea ʻahiʻahi hoku loto kiate koe:
toho kituaʻā kinautolu ʻo hangē ko e fanga sipi ke tāmateʻi,
pea teuteu ʻakinautolu ki he ʻaho ʻoe tāmateʻi.
4 ʻE fēfē hono fuoloa ʻoe tangi ʻae kelekele,
pea mae ʻae mohuku ʻoe ngoue,
koeʻuhi ko e angahala ʻanautolu ʻoku nofo ai?
Kuo fakaʻauha ʻae ngaahi manu veʻe fā,
mo e ngaahi manupuna;
koeʻuhi naʻa nau pehē,
‘ʻE ʻikai te ne ʻafioʻi hotau ikuʻanga.’ ”
5 “Kapau kuo ke lele mo e kau tangata,
pea kuo nau fakaongosiaʻi koe,
te ke fakapuepue fēfē mo e fanga hoosi?
Pea kapau kuo nau fakaongosiaʻi koe ʻi he fonua fiemālie, ʻaia naʻa ke falala ki ai,
ko e hā te ke fai ʻi he lōmaki mai ʻa Sioatani?
6 He ko ho kāinga, mo e fale ʻo hoʻo tamai,
ʻio, naʻa mo kinautolu kuo nau fai kākā kiate koe;
kuo nau kalanga mo tuli kiate koe:
kaeʻoua naʻa ke tui kiate kinautolu ʻi heʻenau lea fakafiemālie kiate koe.”
7 “Kuo u liʻaki hoku fale,
kuo u tukuange hoku tofiʻa;
kuo u tuku ki he nima ʻo hono ngaahi fili ʻaia naʻe ʻofa ki ai hoku laumālie.
8 Ko hoku tofiʻa ʻoku hangē ko e laione ʻi he vao kiate au;
ʻoku ne kalou mai kiate au:
ko ia ʻoku ou fehiʻa ai kiate ia.
9 Ko hoku tofiʻa ʻoku hangē ko e manupuna ʻoku pulepule hono fulufulu,
ʻoku tauʻi ia ʻe he manupuna kotoa pē;
haʻu ʻakimoutolu ʻae fanga manu ʻoe vao,
ke mou fakataha mai ʻo kai.
10 Kuo maumauʻi ʻeku ngoue vaine ʻe he kau tauhi tokolahi,
kuo nau malamalaki ʻa hoku ʻapi,
kuo nau ngaohi hoku tofiʻa lelei ko e vao lala.
11 Kuo nau fakalala ia,
pea ʻi heʻene lala ʻoku ne tangi kiate au;
kuo fakalala ʻae fonua kotoa pē,
koeʻuhi ʻoku ʻikai tokanga ki ai ʻe ha tangata.
12 Kuo haʻu ʻae kau fakaʻauha ki he ngaahi potu māʻolunga kotoa pē ʻi he toafa:
koeʻuhi ʻe fakaʻauha ʻaki ʻae heletā ʻa Sihova mei he ngataʻanga ʻe taha ʻoe fonua,
ʻio, ʻo aʻu ki he ngataʻanga ʻe taha ʻoe fonua:
pea ʻe ʻikai ha fiemālie ki ha taha.
13 Kuo nau tūtuuʻi ʻae uite,
ka te nau utu ʻae ʻakau talatala:
ʻoku nau feinga,
ka ʻe ʻikai ʻaonga ia kiate kinautolu:
pea te mou mā ʻi hoʻomou koloa,
koeʻuhi ko e houhau kakaha ʻo Sihova.”
14 ¶ ʻOku pehē ʻe Sihova, “Ki hoku kaungāʻapi kovi kotoa pē, ʻakinautolu ʻoku ala ki he tofiʻa kuo u fakanofo ai ʻa hoku kakai ko ʻIsileli; vakai te u taʻaki ʻakinautolu ʻi honau fonua, pea taʻaki ʻae fale ʻo Siuta ʻiate kinautolu. 15 Pea ʻe hoko ʻo pehē, hili ʻeku taʻaki ʻakinautolu, te u foki pea ʻaloʻofa kiate kinautolu, pea te u toe ʻomi ʻakinautolu ko e tangata taki taha ki hono ʻapi, pea ko e tangata taki taha ki hono fonua. 16 Pea ʻe hoko ʻo pehē, kapau te nau hangahanga ako ki he ngaahi hala ʻo hoku kakai, ke fuakava ʻi hoku huafa, ‘ʻOku moʻui ʻa Sihova;’ ʻo hangē ko ʻenau ako ki hoku kakai ke fuakava kia Peali; pehē ʻe langa hake ʻakinautolu ʻi he lotolotonga ʻo hoku kakai.” 17 Ka ʻoku pehē ʻe Sihova, “Kapau ʻe ʻikai te nau talangofua, te u taʻaki moʻoni pea fakaʻauha ʻae puleʻanga ko ia.”