28
1 ʻAe fai totongi ʻe he ʻOtua ki he tuʻi ʻo Taia ko e meʻa ʻi heʻene fielahi. 11 Ko e tangi mamahi koeʻuhi kuo fakalieliaʻi ʻi he angahala ʻa hono nāunau. 20 ʻAe tautea ki Saitone. 24 ʻAe toe fakamoʻui ʻo ʻIsileli.
1 Naʻe toe hoko foki ʻae folofola ʻa Sihova kiate au, ʻo pehē, 2 “Foha ʻoe tangata, ke ke lea ki he tuʻi ʻo Taia, ʻOku pehē ʻe Sihova ko e ʻOtua;
Koeʻuhi kuo hiki hake ho loto,
pea kuo ke pehē, ‘Ko e ʻotua au,’
ʻoku ou nofo ʻi he nofoʻanga ʻoe ʻOtua,
ʻi he loto tahi;
ka ko e tangata pe ʻa koe,
ka ʻoku ʻikai ko e ʻOtua,
neongo hoʻo ʻai ho loto ke ke hangē ko e ʻOtua:
3 Vakai, ʻoku ke poto hake ʻia Taniela; ʻoku ʻikai ha meʻa lilo te nau faʻa fufū meiate koe: 4 Ko e meʻa ʻi hoʻo poto mo hoʻo faʻa ʻilo, kuo ke maʻu ʻe koe ʻae koloa lahi,
pea kuo ke tānaki ʻae koula mo e siliva, ki he tukuʻanga koloa:
5 Ko e meʻa ʻi he lahi ʻo hoʻo poto,
pea mo hoʻo faʻa fakatau, kuo ke fakalahi ai ʻa hoʻo koloa,
pea kuo hiki hake ho loto koeʻuhi ko hoʻo koloaʻia.
6 Ko ia ʻoku pehē ʻe Sihova ko e ʻOtua koeʻuhi kuo ke ʻai ho loto ke ke hangē ko ha ʻOtua;
7 Vakai, ko ia te u ʻomi ai kiate koe ʻae kau muli,
ʻae kau mālohi mei he ngaahi puleʻanga:
pea te nau toho ʻenau heletā ki he toulekeleka ʻo hoʻo poto,
pea te nau fakaʻuliʻi hoʻo ngingila.
8 Te nau fakahifo koe ki lalo ki he luo,
pea te ke mate ʻi he mateʻanga ʻonautolu ʻoku mate tāmateʻi
ʻi loto tahi.
9 ʻIkai te ke pehē pe ʻi he ʻao ʻo ia te ne tāmateʻi koe, Ko e ʻOtua au?
Ka ko e tangata pe koe, ka ʻe ʻikai te ke ʻOtua,
ʻi he nima ʻo ia te ne tāmateʻi koe.
10 Te ke mate ʻi he mateʻanga ʻo ha taha taʻekamu,
ʻi he nima ʻoe kau muli:
he ʻoku pehē ʻe Sihova ko e ʻOtua, ko au ia, kuo lea ki ai.”
11 ¶ Naʻe hoko foki ʻae folofola ʻa Sihova kiate au, ʻo pehē, 12 “Foha ʻoe tangata, ke ke tangilāulau koeʻuhi ko e tuʻi ʻo Taia,
pea ke pehē ki ai, ʻOku pehē ʻe Sihova ko e ʻOtua;
kuo ke ngaohi ho fakatātā,
ʻi he poto,
mo e toulekeleka haohaoa.
13 Kuo ke ʻi ʻIteni
ko e ngoue ʻae ʻOtua
naʻe ʻuʻufi ʻaki koe ʻae maka koloa kotoa pē,
ʻae satiose, mo e topasi, mo e taiamoni,
mo e pelili, mo e onikisi, mo e sasipa,
mo e safaia, mo e ʻemalata, mo e kaponika,
pea mo e koula: ʻi he ʻaho naʻe fanauʻi ai koe,
naʻe teuteu ʻae teunga ʻo hoʻo ngaahi meʻatatangi
mo hoʻo ngaahi meʻaifi ʻiate koe.
14 ʻOku ke hangē koe ko e Selupi ʻoku fakamalumalu mei ʻolunga;
kuo u ʻai koe ʻeau ke ke pehē: naʻa ke ʻi he moʻunga tapu ʻoe ʻOtua;
kuo ke feʻaluʻaki ʻi he lotolotonga ʻoe ngaahi maka afi.
15 Naʻa ke haohaoa ʻi ho hala mei ho fanauʻi ʻo aʻu ki he ʻaho
naʻe ʻilo ai ʻiate koe ʻae angahala.
16 Ko e meʻa ʻi hono lahi ʻo hoʻo fai fakatau kuo nau fakapito koe ʻi he fakamālohi,
pea kuo ke fai hala:
ko ia ia te u liʻaki ai koe mei he moʻunga tapu ʻoe ʻOtua, ʻo hangē ko ha taha fakalielia:
pea te u fakaʻauha koe, ʻa koe ko e selupi ʻoku lolofa mai,
mei he lotolotonga ʻoe ngaahi maka afi.
17 Naʻe hiki ho loto ko e meʻa ʻi ho toulekeleka,
pea kuo ke maumauʻi hoʻo poto ko e meʻa ʻi ho nāunauʻia:
te u lī hifo koe ki he kelekele,
te u fakatōkilalo koe ʻi he ʻao ʻoe ngaahi tuʻi,
koeʻuhi ke nau mamata kiate koe.
18 Kuo ke fakalieliaʻi ho ngaahi fale tapu
ʻi he lahi ʻo hoʻo fai hala,
mo e kovi ʻa hoʻo fai fakatau;
ko ia te u ʻomi ʻae afi mei loto ʻiate koe,
pea te ne fakaʻauha koe,
te u liliu koe ko e efuefu ʻi he funga ʻo māmani
ʻi he ʻao ʻonautolu kotoa pē ʻoku siofia koe.
19 ʻE ofo kiate koe ʻakinautolu kotoa pē ʻi he kakai ʻoku ʻiloʻi koe:
te ke hoko ko e meʻa fakailifia,
pea ʻe ʻikai te ke kei ʻi ai ʻo taʻengata.”
20 ¶ Naʻe toe hoko foki ʻae folofola ʻa Sihova kiate au, ʻo pehē, 21 “Foha ʻoe tangata, fakahanga ho mata ki Saitone, pea ke kikite ki ai, 22 Pea ke lea, ʻOku pehē ʻe Sihova ko e ʻOtua;
Vakai, ʻE Saitone, ʻoku ou tuʻu au kiate koe;
pea ʻe fakaongoongoleleiʻi au ʻiate koe,
pea te nau ʻilo ko au ko Sihova,
ʻo kau ka fai ʻae fakamaau kiate ia,
pea ka fakamāʻoniʻoniʻi au ʻiate ia.
23 He te u fekau atu kiate ia ʻae mahaki fakaʻauha,
pea ʻe tafe ʻae toto ʻi hono ngaahi hala;
pea ʻe tautea ʻaki ʻae heletā ʻi hono lotolotonga,
pea mei he potu kotoa pē, ʻakinautolu kuo lavea;
pea te nau ʻilo ai ko Sihova au.
24 Pea ʻe ʻikai kei ʻi ai ha tolounua ki he fale ʻo ʻIsileli, pe ha talaʻi ʻakau fakamamahi ʻiate kinautolu kotoa pē ʻoku nofo takatakai ʻiate ia, ʻakinautolu naʻe manuki kiate ia; pea te nau ʻilo au, ko au ko Sihova ko e ʻOtua.” 25 ʻOku pehē ʻe Sihova ko e ʻOtua; “ʻO kau ka tānaki mai ʻae fale ʻo ʻIsileli, mei he kakai kuo nau movetevete atu ki ai, pea ka fakamāʻoniʻoniʻi au ʻi he ʻao ʻoe hiteni, te nau toki nofo ki honau fonua, ʻaia naʻaku foaki ki heʻeku tamaioʻeiki ko Sēkope. 26 Pea te nau nofo lelei pe ʻi ai, pea te nau langa fale, pea tō ngoue vaine; ʻio, te nau nofo fiemālie, ʻo kau ka fai ʻeau ʻae tautea kiate kinautolu ʻoku manukiʻi ʻakinautolu, ʻakinautolu ʻoku nofo takatakai ʻi ai; pea te nau ʻilo au, ko Sihova ko honau ʻOtua.