2
1 Ko e houhau ʻae ʻOtua ki Moape; 4 Mo Siuta, 6 Pea mo ʻIsileli. 9 ʻOku lāunga ʻae ʻOtua ʻi heʻenau taʻefaʻafakafetaʻi.
1 ʻOku pehē ʻe Sihova,
“Koeʻuhi ko e talangataʻa ʻe tolu ʻa Moape, mo hono fā,
ʻe ʻikai te u fakaafe hono tautea ʻo ia;
he naʻa ne taʻo ʻae ngaahi hui ʻae tuʻi ʻo ʻItomi ke lahe:
2 Ka te u fekau ʻae afi ki Moape,
pea te ne kai ʻo ʻosi ʻae ngaahi fale fakaʻeiʻeiki ʻo Kiliote:
pea ʻe mate ʻa Moape ʻi he maveuveu, mo e kaila, pea mo e ongo ʻoe meʻalea:
3 Pea te u motuhi ʻae fakamaau mei honau haʻohaʻonga,
pea tāmateʻi ʻae houʻeiki kotoa pē mo ia:”
ʻoku pehē ʻe Sihova.”
4 ¶ ʻOku pehē ʻe Sihova;
“Koeʻuhi ko e talangataʻa ʻe tolu ʻa Siuta, pea mo hono fā,
ʻe ʻikai te u fakaafe hono tautea ʻo ia;
he kuo nau vaʻinga ʻaki ʻae fono ʻa Sihova,
pea naʻe ʻikai te nau tauhi ʻene ngaahi fekau,
pea naʻa nau hē ko e meʻa ʻi heʻenau loi,
ʻaia naʻe muimui ki ai ʻenau ngaahi tamai:
5 Ka te u fekau ʻae afi ki Siuta,
pea te ne kai ʻo ʻosi ʻae ngaahi fale fakaʻeiʻeiki ʻo Selūsalema.”
6 ¶ ʻOku pehē ʻe Sihova;
“Koeʻuhi ko e talangataʻa ʻe tolu ʻa ʻIsileli, pea mo hono fā,
ʻe ʻikai te u fakaafe hono tautea ʻo ia;
he kuo nau fakatau ʻae kakai māʻoniʻoni ki he siliva,
pea mo e kakai masiva ʻaki ha topuvaʻe;
7 ʻAia ʻoku feinga ke ʻai ʻae efu ʻoe kelekele ʻi he ʻulu ʻoe kakai masiva,
pea ʻoku fakahēʻi ʻae hala ʻoe angamalū:
pea ko e tangata mo ʻene tamai ʻoku na mohe ki he fefine pe taha,
ke fakaongokovi hoku huafa tāpuhā:
8 Pea ʻoku nau tokoto ʻi he ngaahi kofu ʻoku tuku ko e fakamoʻoni ki he totongi ʻi he veʻe feilaulauʻanga kotoa pē,
pea ʻoku nau inu ʻae uaine ʻoe halaia ʻi he fale ʻo ʻenau tamapua.
9 Ka naʻaku fakaʻauha ʻae kakai ʻAmoli ʻi honau ʻao,
ʻaia naʻe māʻolunga hangē ko e sita,
pea naʻe mālohi hangē ko e oke;
ka naʻaku fakaʻauha hono fua mei ʻolunga,
pea mo hono aka ʻi lalo.
10 Pea naʻaku ʻomi foki ʻakimoutolu mei he fonua ko ʻIsipite,
pea naʻaku tataki ʻakimoutolu ʻi he toafa ʻi he taʻu ʻe fāngofulu,
ke maʻu ʻae fonua ʻoe kakai ʻAmoli.
11 Pea naʻaku tuʻutuʻuni mei ho ngaahi foha ʻae kau palōfita,
pea mei hoʻo kau talavou ʻae kakai naʻe fakamavahe.
ʻIkai ʻoku pehē pe,
ʻe fānau ʻa ʻIsileli?” ʻoku pehē ʻe Sihova.
12 “Ka naʻa mou ʻatu ʻae uaine ke inu ʻe he kau Fakamavahe;
pea ne mou fekau ʻae kau palōfita, ʻo pehē, ‘ʻOua naʻa kikite.’
13 Vakai, ʻoku ou taʻomia ʻiate kimoutolu,
hangē ko e saliote ʻi he ngaahi ʻū koane.
14 Ko ia ʻe mole ʻae faʻa lele mei he veʻe vave,
pea ko e mālohi ʻe ʻikai te ne fakamālohiʻi ʻe ia ia;
pea ʻe ʻikai fakahaofi ʻae mālohi ʻe ia ia:
15 Pea ʻe ʻikai tuʻu ia ʻoku ne teke ʻae kaufana;
pea ʻe ʻikai fakahaofi ʻae veʻe vave ʻe ia ia:
pea ko ia ʻoku heka hoosi ʻe ʻikai fakahaofi ʻe ia ia.
16 Pea ko ia ʻoku lototoʻa ʻi he kau mālohi te ne hola telefua ʻi he ʻaho ko ia,”
ʻoku pehē ʻe Sihova.