1 Ma ningcai taco Zisu hningzuitu sahlo cawh a ka vy lo leimei he ka, aa hrong letei Grik rei a cuipaw Juda cawngsaw sahlo takhei Hebru rei a cuipaw Juda cawngsaw sahlo cung lekhei aa lungtling be, zecawtamaw tatah e le ba ning tating rainah kong letah kaa lahme sahlo heh aa mingpakhung he aa tah. 2 Macawtaco apostol pahrawhluihning takhei hningzuitu vytei khah pahmo he ka, “E le ba khuakhang rawh tah Khazing bia reilai laky khah kaa dethlang caco, kaa cawtah chah a be. 3 Macawtaco uny sahlo, naa hrong chung lehei cawngsaw pasarih, Thlawpaw tah a chihpaw le a singpaw thing la, ma rai heh aaning aa cung letah khing he peh ka, 4 kaaning cawh thlawchang le Khazing bia reilai rai lehei ka pei hri a he peh,” aa tah he.

5 Apostol sahlo tei ma rawhnah aa chuakhuipaw cawh aa lung a cang ngetei. Macawtaco zingnah le Thlawpaw Pathai tei a chihpaw cawngsaw, Stiven khah aa thing; Mataico Filip, Prokora, Nikanor, Timon, Parmena le Antiok khuapui cawngsawpaw Juda behnah lang a palehpaw Nikola khah aa thing he. 6 Ma tlaw cawh apostol sahlo khaco va chuakhui he ka, apostol sahlo taco aa cung letah aa kih pahnia he ka, thlaw aa changpah he.

7 Macawtaco Khazing bia cawh a ka vy leimei ka, Jerusalem khuachung letah Zisu a zingpaw sahlo cawh a ka ngetei he ka, tlangbui a hlupui tah Zisu cawh aa zing hrah.

8 Khazing ningdonah le hmingtuakhyná tah a chihpaw Stiven takhei, khuarawha hming le ningang chuipaw paching pakhanah khah cawngsaw hrong letah a tua. 9 Caduisai cawh cawngsaw thaikhehpaw cawh Stiven cung letah aa lungtling be. Ma sahlo cawh Sae cangnah taitei luasahpaw sahlo aa Synagog* Synagog cawh, Juda sahlo behnah ing,a cang. taitei cawngsaw sahlo a cang he. Sairini khua le Alekzandria khua, Silisia le Asia raang letei a ungpaw Juda cawngsaw sahlo khah a cang he. Ma cawngsaw sahlo taco Stiven a bia cawh aa ei, 10 canghrasala a singnah le Thlawpaw tei bia a reipaw khah ei khy bei he.

11 Mataico, “Stiven tah Moses le Khazing khah dy he katei, reipachianah bia a reipaw khah kaa thui,” tatah a tah ruapaw takhei cawngsaw thaikhehpaw khah aparuh teitah aa pasy he.

12 Macawtaco, zawpui le macang sahlo le phungbia cawngpahtu sahlo khah aa pasy he. Ma tlaw taco Stiven cawh tle he ka, Sanhedrin hme leco aa va chuakhui. 13 Biahnihtu pakheipaw sahlo zong va chuakhui he ka, aa reipaw cawh, “Ma cawngsawpaw tahei phungbia le hming pathai reipachia heh tai khawh beh. 14 Ma Nazaret Zisu tahei ma behnah ing heh chehthlah a neh ka, Moses tei a ma pehpaw phunglang heh a thlai a, tatei a tahpaw kaa thui,” tatah aa tah.

15 Sanhedrin letei a tythlangpaw cawngsaw vytei taco Stiven cawh taa ky tah mingchai he ka, a mehme cawh vaiming mehme hratah a cangpaw khah aa hmuh.