1 Neda' Judas naca' beṉe' güen žin c̱he Jesucriston', na' naca' beṉe' biše' Jacobo. Chzoja' le'e ba gwlej X̱acho Diosen' cont nacle ḻo ne'en nach zoale chcuas chcue'ej Jesucriston' le'e len da' malen'. 2 Chṉaba' gon X̱acho Diosen' cont gacbe'echle cheyaše' cheži'ilaže'chgüede' le'e, na' gone' cont soa cuezechle binḻo len xbab da' yo'o ḻo' yic̱hjlažda'olen', na' gone' gacbe'echle chacchgüede' le'e.

3 Beṉe' migw, chacda' le'e, na' ba goclaže'chgua' gwzoja' le'e gwzejni'ida' le'e can' ben X̱ancho Jesucriston' cont de yeḻa' mban c̱hecho toḻi tocaṉe. Perw ṉa'a ba chonen byen chzoja' chṉeyoeda' le'e soac̱hac̱hle šejḻe'le diža' ḻi c̱he Diosen' da' bzejni'ide' chio' to ši'ize, chio' naccho ḻo ne'en. 4 Nita' baḻ beṉe' cheseziye'e cont chaquele zjanaque' le'e txen. Bi chosozenague' c̱he Diosen', san chesene' da' nži'ilaže' Diosen' chio' guacte goncho bite'teze da' yeḻa' zto' len cuerp c̱hechon', ḻe chezi'xencze' c̱hecho. Na' chosozoe' to šḻa'ale toz ben' nac dogualje Dios ben' cheyaḻa' yosozenag yogo' beṉac̱hen' c̱he', na' len X̱ancho Jesucriston'. Cana'te byoj Xtiža' Diosen' žan beṉe' cheson ca' yesežaglaochgüe' ṉec̱he xtoḻa'gaquen'.

5 Na' ḻa'czḻa' ba gwṉezele yogo' can' goquen', chaclaža' gona' cont šjayza'laže'le X̱ancho Diosen' bosle' da' x̱ozxta'o neto' beṉe' Israel ḻo na' beṉe' Egipto ca', perw gwdechle bžiaye'e baḻteze' bi gosejḻe'e c̱he'. 6 Na' zan angl bi gosazlaže' yesone' da' gwlo'o Diosen' ḻo na'gaque' yesone', san gosaclaže' yesacche' beṉe' blaoch. Nachen' besyechoje' gan' bžia Diosen' bia' yesenite'. Nach Diosen' gwseḻe' ḻegaque' gan' nacchgua c̱hoḻ, na' zjancheje' gden toḻi tocaṉe cont yesezaca'zi'e cate' žin ža gac juisyw. 7 Na' ḻecze ca' beṉe' gwnita' ciuda Sodoma na' ciuda Gomorra len yezica'chle ciuda ca' zjanyec̱hj zjambi'in ḻegaquen, gosonchgüe' da' nac yeḻa' zto' len cuerp c̱hegaquen', ḻe gosata'lene' ḻjež beṉe' byogaque' gosone' ḻe' ca xo'ole' cont gosone' da' yeḻa' zto' len ḻegaque'. Nach Diosen' gwseḻe' yi' da' bzeyen ciuda ca' gosebiayi'tecczen'. Na' da' bene' ca', chosṉisde' chio' beṉac̱h gata' castigw ḻo yi' gabiḻ toḻi tocaṉe c̱he beṉe' bi yosozenag c̱he'.

8 Na' bia'cze beṉe' ca' chososed chosolo'ede' le'e diža' güenḻaže', zjanite' chesone' da' mal na' chesene' besele'edagüede' nac güen dan' chesonen'. Chesone' da' yeḻa' zto' len cuerp c̱hegaquen' bi chesaclaže' yosozenague' c̱he X̱ancho Diosen', na' chesezi'diže' angl ca' beṉe' zjazaca'chgua. 9 Perw nža'le cheson angl c̱he Diosen', ḻe cani' gwzoa to tiemp cate' angl blao ben' le Miguel gocyože' len Satanás dan' chnabia' da' x̱igüe' ca' da' goclažen' yeyoan' cuerp c̱he da' Moisésen'. Na' ḻa'czḻa' Miguelen' naque' angl blao c̱he Diosen', bi beyaxjde' si'diže' Satanásen', san con gožen': “X̱anto' Diosen' tiḻe' le'.” 10 Perw beṉe' quinga chesezi'diže' bite'teze da' bi chesejni'ide'. Na' chesonteze' da' ca' ža cuerp c̱hegaquen' yesone', ca cheson beyix̱e' be bi chesejni'i, na' da' ca' chesonen' chosožiayin' ḻegaque'.

11 Nyaše'chgua gac c̱hegaque'. Zjanite' chesegue'e ḻježgaque' can' ben da' Caín, na' ḻecze chesoe'laže' chesone' da' mal cont yesone' gan mechw can' ben da' Balaam. Chesone' güedenag len beṉe' ca' gwlej Diosen' cont chesenabi'e ḻegaque' cacze güedenag ben da' ben' gože' Coré cani', na' can' gwžiayi' da' Corén' ṉec̱he yeḻa' güedenag c̱hen', ḻecz ca' yesebiaye'e. 12 Na' cate' le'e che'ej chagwle txen cont chlo'ele chaque ḻježle, ḻegaque' chesagwxatteze' con nacteze žan c̱hegaque' na' chese'ejchgüe' gualaz da' yesone' güen len beṉe' ḻježe'. Na' da' bibi zaca' can' chesone', da'nan' zjazaca'lebde' ca bzigüe' da' dope to ḻe'e lache' šiš, na' ḻecze zjazaca'lebde' ca beṉe' güeye' xila' beṉe' chṉa' cuine' na' bi chṉe'e xila' ca'. Ḻecze zjazaca'lebde' ca bejw da' nžiga' be' da' bi cheyaquen yejw, na' ca to yag xen da' bibi chbian cate' ba bžin tiemp cuian, na' gualaz da' cuian chbižen na' chbix̱en ḻo yo. 13 Na' ṉec̱he yeḻa' zton' cheson beṉe' ca', zjazaca'lebde' ca nisdao' da' chas chata' na' checho'onen bžina' ga nac ḻo yo cho'a nisdaon'. Na' zjazaca'lebde' ca beljw da' bich zjažian xišne'en gan' cheyaḻa' yesebian, ḻe Diosen' bžie' bia' yesezaca'zi'e toḻi tocaṉe gan' nac ḻeca c̱hoḻ.

14 Gwzolaon cate' gwzoa da' Adán bžinten cate' gwzoa da' Enoc goc gaže dia c̱he Adánṉa'. Na' Enoquen' ḻecze be'e diža' da' bzejni'i Diosen' ḻe' c̱he beṉe' ca' chososed chosolo'ede' diža' güenḻaže', cate' gwne': “Ble'eda' za' X̱ancho Diosen' len angl zan juisyw c̱he' ca' 15 cont c̱hogbi'en yesezaca'zi' yogo' beṉe' zjanape' doḻa'. Yogo' beṉe' ca' bi bosozenag c̱he' yesezaca'zi'e toḻi tocaṉe ṉec̱he da' gosone' da' mal juisyw yeḻa' güedenag c̱hegaquen' na' ṉec̱he da' goseṉe' diža' ya' c̱he'.” 16 Na' ca nac beṉe' ca' chososed chosolo'ede' le'e diža' güenḻaže', bate'teze chesežeše' c̱he Diosen', na' bibi chesazlaže'. Con chesonteze' bite'teze žan c̱hegaque'. Len xtiža'gaquen' chesonxen cuingaque' na' chosopede' beṉe' yoble cont yesone' gan mechw o cont yesaclen beṉe' ḻegaque'.

17 San le'e beṉe' migw, beṉe' chacda', cheyaḻa' šjayze'ele diža' nga gosena postlw ca' beṉe' ca' gwlej X̱ancho Jesucriston'. 18 Gosene': “Tiempen' cate' ba zoa yid X̱ancho Jesucriston', ṉita' beṉe' bi yesejḻe' c̱he Diosen' na' yesonḻe' c̱he' na' yesonteze' con da' žan c̱hegaque' da' nac yeḻa' zto'.” 19 Na' ṉa'a beṉe' ca' chesone' cont le'e chejnilaže'le Criston' bi chonḻe toze xbab, san nža' nža'te ca žale. Chesone' xbab c̱he da' chnalaže' cuerp c̱hegaque', ḻe bi yo'o Spiritw c̱he Diosen' ḻo' yic̱hjlažda'ogaquen'.

20 Perw le'e beṉe' migw, chacda' le'e, na' chṉeyoeda' ḻe gonc̱hac̱h laže'le cont soac̱hac̱hle šejḻe'le diža' ḻi c̱he Diosen' da' zaca'chgua. Na' ḻe yoḻ güiž Diosen' ye'lne' da' chzejni'i Spiritw c̱hen' le'e. 21 Na' ḻe soa ḻe gon cont gacbe'ele chaque Diosen' le'e. Na' da' cheyaše' cheži'ilaže' X̱ancho Jesucriston' chio', gone' cont šjayzoalenchone' toḻi tocaṉe. Da'nan' ḻe soa ḻe cueze batcan' gone' ca'.

22 Baḻ beṉe' chesacžejlaže' še cheyaḻa' yesone' can' ža Diosen'. Ḻe gwzejni'i ḻegaque'. 23 Na' beṉe' ca' ba chesezolagüe' chosozenague' c̱he diža' güenḻažen', ḻe gon con ga zelao saca'le cont yesyechoje' ḻo nez malen' na' ḻe co'o ḻegaque' nez güenṉa'. Na' yebaḻ beṉe' chesonchgüe' da' xiṉj, na' ḻecze cheyaḻa' yeyaše'cho ḻegaque', perw do chaž chžebcho, do chgue'echo dan' chesonen' na' cheyaḻa' gwsaca'cho cont bi goncho txen len da' xiṉjen' chesonen'.

24-25 Cheyaḻa' gonxencho toz Dios ben' zaca' gonxencho, ben' noṉe' yeḻa' mban c̱hecho toḻi tocaṉe. Dios nan' naque' beṉe' sina' juisyw. Chac chone' cont bi lažo'cho goncho da' xiṉj, na' chac chone' cont bibi xtoḻa'cho gata' cate' yežincho lagüen' gan' yo'ochgua be'ni'. Ḻeca yebecho cana'. Diosen' naque' ḻa'zelagüe beṉe' zaca' beṉe' blao, na' zaque' chnabi'e doxen. Naque' X̱an yogo' beṉac̱h na' yogo' bica'chle da' de. Ḻen' gocxene' cate' biṉa' x̱e yežlion' na' cheyaḻa' gonxenchone' toḻi tocaṉe dan' gwseḻe' X̱ancho Jesucriston' chaclene' chio'. Ca'šca gac. Da' na'zen' chzoja'.