1 Ne leettsa mera ndetsin ani kuu le Paskw, neʼa Jesús mzina or kuu lee Jesús laa Jesús yezlyu ree, par ndya Jesús lo Xut Jesús. Ne kwathoz mke leettsoo Jesús re zha Jesús kuu nzi lo yezlyu ree, tataka mke leettsoo Jesús re zha asta bluz.

2 Leettsa ngeyow rtsee re zha lee Maxuuy mlooʼa yek Judas Iscariote, xgann Simún, tsa taa zha Jesús lo re zha kuu kuth Jesús. 3 Ne kom neʼa Jesús lo Diox mroo Jesús ne lo Diox bretab Jesús, ne noga neʼa Jesús lee Xut Jesús mndaa reta yalnabee lo Jesús. 4 Kona leettsa ngeyow rtsee re zha, tsa ngwateli Jesús roo mes ne mloo Jesús thib xab Jesús, ne mliib Jesús thib tway leey Jesús. 5 Tsaraa mloo Jesús nit leen thib bandej ne mndelo Jesús mteech nii re zha kuu ngeteed lo Jesús, ne mtekwiiz Jesús nii zha kon tway kuu naliib leey Jesús.

6 Per or ndateech Jesús nii Pey, tsa nzhab Pey lo Jesús:

―Zha Nabee, ¿chu neʼa lu teech niin?

7 Tsa mkab Jesús lo Pey ne nzhab Jesús:

―Nyenta kuu ngetsowʼn nal, per bluz tsaraa yen luy.

8 Lee Pey nzhab:

―Neeka mas latʼn teecha niin.

Lee Jesús mkab ne nzhab:

―Os leen teechtʼn niiʼa gagt gaka zha da.

9 Simún Pey mkab ne nzhab:

―Os leey tabaay, Zha Nabee, teechta beeta niin, noga yaan ne yekʼn bteech.

10 Per lee Jesús nzhab lo Pey:

―Lee zha kuu mkeeʼa got, ndechet yeech dita zha sinke beeta nii zha ndoblo yeech, tak nambiʼa zha. Ne nambiʼa re goo, tegal ret gooy.

11 Leettsa nzhab Jesús: “Ret goo nambi”, tata nzhab Jesús, tak neʼa Jesús naa cho kuu taa Jesús lo re zha kuu kuth Jesús.

12 Leettsa ngwalo mteech Jesús nii re zha, tsa mdok xab Jesús, ne mndob Jesús roo mes tedib welt, ne nzhab Jesús lo re zha:

―¿Chu nyen goo kuu mtsowʼn? 13 Lee re goo ni goo maestr ne Zha Nabee lon, ne wen ntsow goo ni gooy, tak nak nay. 14 Na nak maestr goo ne Zha Nabee lo goo, ne mteechʼn nii goo, kona noga goo ndoblo goo teech goo nii altaa goo. 15 Mtsowʼn koree lo goo, tsa noga goo tsow goo taxal mtsowʼn lo goo. 16 Wlipaa na nin lo goo, neeka thib mos nataagt mos masraa nake zha kuu nabee lo mos, ne neeka thib zha kuu ntsow mandad nataagt zha masraa nake zha kuu mtaal zha. 17 Os lee goo nyen goo re koree ne ntsow gooy, kwathoz wen nda goo.

18 ’Ngenitʼn koree lo reta goo, tak neʼa na cho re zha kuu mlin. Per ndoblo gak kuu mbez lo xkiiz Diox: “Lee zha kuu nzhow kon na, nak zha kuu mnayii nen”. [Sal. 41:9] 19 Nin koree lo goo, tsa leettsa gake, yelaaz goo lee na nakʼn kuu nakʼn. 20 Wlipaa na nin, loka zha kuu kayaa zha kuu talʼn, na nkayaa zhaʼa, ne loka zha kuu nkayaa na, nkayaa zha zha kuu mtaalʼn.

21 Or ngwalo nzhab Jesús re koree, kwathoz nalatt ngoo leettsoo Jesús, tsa nzhab Jesús:

―Wlipaa na nin lo goo, lee thib re goo taan lo re zha kuu kuthʼn.

22 Tsa lee re zha kuu ngeteed lo Jesús mndelo mwii lo altaa, ne neeka net zha naa cho mteth Jesús. 23 Ne lee thib zha kuu kwathoz nke leettsoo Jesús ndob cho Jesús, 24 tsa lee Simún Pey mtsow seny lo zhaʼa, tsa naabdiz zha naa cho nak zha kuu mteth Jesús. 25 Tsa mbig zhaʼa mas gax cho Jesús ne mnaabdiz zha lo Jesús ne nzhab zha:

―Zha Nabee, ¿cho kuu ntetha?

26 Jesús mkab ne nzhab:

―Nal tenitʼn thib le pan ne lo zha kuu ta nay, zhaʼay.

Ora mtenit Jesús lut pan ne mndaa Jesús pan lo Judas Iscariote, xgann Simún Iscariote. 27 Ne ora mzhen Judas pan, ne ndow Judas pan ne oraaka lee Maxuuy mndaab leettsoo Judas. Tsa nzhab Jesús lo Judas:

―Loka kuu nlaaza tsowa, btsowe nalor.

28 Per lee re zha kuu ngeteed lo Jesús kuu nzi tya, myent zha naa chebee tata nzhab Jesús lo Judas. 29 Ne kom lee Judas nak kuu nden bols temi, kona lee chop tson zha kuu ngeteed lo Jesús mtsow xgab, lee Jesús nzhab lo Judas, tii Judas lut kuu ndeche re zha lo ani o taa Judas lut kwaa lo re prob.

30 Ngwalo ndow Judas pan kuu mzhen Judas oraaka nda Judas. Ne mkowa yezlyu ora.

31 Ne or ngwalota mroo Judas, tsa nzhab Jesús:

―Mzina or kuu lee re men tsow nataak na, Kuu Mzin Ngok Men, ne tataga tsow nataak re men Diox por Xgann Diox. 32 Ne os por Xgann Diox tsow nataak re men Diox, noga Diox tetsow nataak xgann, ne mera tsow nataak Diox Xgann Diox. 33 Re goo kuu nak taxal zhiinn na, telutta ndon lo goo. Tsa lee re goo kwaan na, per leeka kuu nzhapʼn lo re zha Israel, nin lo goo nal: Gagt ya goo ta ndyan. 34 Ne lee nal nabeen thib diiz kub kuu nataak lo goo: Bke leettsoo goo thib goo ne tedib goo. Taxal nke leettsoon leeka goo, leeka tata bke leettsoo goo thib goo ne tedib goo. 35 Os lee goo nke leettsoo goo thib goo ne tedib goo, reta men yezlyu ree ne lee re goo nak zha da.

36 Tsa lee Simún Pey mnaabdiz lo Jesús ne nzhab:

―Zha Nabee, ¿pa ndyaʼa?

Lee Jesús mkab nzhab:

―Gagt yaʼa ta ndyan, per mas bluz tsaraa yaada.

37 Lee Pey nzhab:

―Zha Nabee, ¿chebee gagt teken ditsa nal? ¡Si lista ndon gathʼn por lu!

38 Jesús mkab lo Pey ne nzhab:

―¿Gatha por na kaa? Wlipaa na nin loʼa, leettsa terka kwez ngite leeʼa gab tson welt nlebeeta na.