1 Na Paba, Silvano ne Tim, ngekee nee yeets ree lo re goo kuu nyelaaz Jesús kuu nzo yez Tesalónica, re goo kuu nak zha Diox kuu nak Xutaa, ne zha Jesucrist Zha Nabee loʼaa. 2 Nlazʼn lee Diox kuu nak Xutaa ne Jesucrist Zha Nabee loʼaa, loo yalnkelaaz chaan lo goo tsa wen kwin goo.

3 Reta goo wetsʼn ne btan na, ndoblo thibka taa nee texkix lo Diox por goo taxal ndoblo tsow nee, tak thib wiz ne tedib wiz masraa nali nzi goo nyelaaz goo Jesús ne masraa nke leettsoo goo thib goo ne tedib goo. 4 Ne or nteth nee goo lo re wetsaa ne lo re btanaa kuu nzo tedib yez, kwathoz wen nyoo leettsoo nee, tak ney nzi goo nyelaaz goo Diox ne tak nxek leettsoo goo, leettsa ndreke zha dits goo ne leettsa ndakti goo. 5 Ne reta koree nloo lee Diox nali naab Diox kwent lo reta men, ne ndobloʼaa tabaa ta nabee Diox tak kona ngeriidaa yalti nal.

6 Ne wenka teti Diox re zha kuu nteti goo nal, 7 ne lee re goo kuu ngeriid yalti nal, Diox tsow thibka neyy goo kon nee, per lee koree gak, or kuu lee Jesús Zha Nabee loʼaa yaad xid loz bel lobee kon re mandad Jesús kuu kwathoz ney. 8 Yaad Jesús tsa teti Jesús re zha kuu ndaat yek yelaaz Diox, ne re zha kuu nzhont diiz lo Diiz Chul chaan Jesucrist, Zha Nabee loʼaa. 9 Lee re zhaʼa rid yalti thitanax, ne yot zha lo Diox ne lo xni thoz chaan Diox. 10 Ne lee wiz kuu bre Zha Nabee, tsa lee re zha zha gol lo zha, re zha kuu nali nak lo zha ne lee re zha kuu ngwalaaz zha tsegey leettsoo wii zha. Tak mkayaa goo xkiiz Diox kuu mndaa nee kwent lo goo.

11 Kona thibka naab nee lo Diox tsa tsow Diox ban goo ne tsow goo taxal ndoblo ban re zhiinn Diox. Noga naab nee lo Diox tsa tsow Diox ayud goo kon yalney chaan Diox, tsa tsow goo re kuu wen kuu nzo yek goo tsow goo ne re kuu ntsow goo tak nyelaaz goo Diox. 12 Tsa lee le Jesucrist Zha Nabee loʼaa gak nataak loʼaa, ne tataka gak nataakaa lo Jesucrist, por yalnkelaaz chaan Xutaa Diox ne yalnkelaaz chaan Jesucrist Zha Nabee loʼaa.