7
Zha ne pcuee lo grëse zha Israel
1 Bded ga, goṉ naa tap anjl. Lo gza tap lad guidzliu, tibga anjl co zo tib lad nocuëëz me me. Wdzeepaaw, per ni tib zhiblag yag rnidraa, niicle lo nisdoow dzese biaca; sac ni palal rrieedraa me lo guidzliu.
2 Tibaque zeeṉe brieequia stib anjl nëz ne rlan ngbidz, neyse me xsell Dios; nguiedz bnee me lo gza tap anjl co (anjl ne pcaa diidzbey ga guṉ guieḻqui lo guidzliu ni lo nisdoo) rëb me:
3 ―¡Goḻcuëz zniip! Guṉde to guieḻqui lo guidzliu niina, niicle lo nisdoow, niiclegaa grë yaga; sac naraa lozh guioquiaa no xsell xDios ne quia grë zha ne ruṉ xtsiiṉ me.
4-8 Zeeṉe blozh pquia sell co quia grë miech co, bin naa lo grë zha ne ziaad lo xtii zha Israel, rgaa zho tib gayoo chooptap mil:
Tsiipchop mil zha xtii Judá,
tsiipchop mil zha xtii Rubén,
tsiipchop mil zha xtii Gad,
tsiipchop mil zha xtii Aser,
tsiipchop mil zha xtii Neftalí,
tsiipchop mil zha xtii Manasés,
tsiipchop mil zha xtii Simeón,
tsiipchop mil zha xtii Leví,
tsiipchop mil zha xtii Isacar,
tsiipchop mil zha xtii José,
stsiipchop mil zha xtii Benjamín.
9 Zeeṉe bui naa zaatne zo xcan ro co, zaatne zo meṉ ne nac Carner yeeṉ co, miech guizhiu ne goṉ naa ndxie ga; grë lose dii miech ne ndxie dib lo guidzliuw. Ne nligaa miech guizhiuw, led miech ne lëbd ne glab new; grëse zho niapse lar nquits nacw zho, ni no tiblëga zin nguia nia zho; 10 nguiedz zëëb tsi zho, rnee zho:
Dios, meṉ ne rdziuuṉbey ne, meṉ ne zob lo xcan ro qui,
me nac meṉ ne psilaa ne lo grëtaa xtoḻ ne;
me ni meṉ ne nac Carner yeeṉ qui.
11 Horco grëse anjl ne ndxie igo xcan ro co, igo zaatne zob grë meṉgol co, ni zo gza tap bult mban co; grëse zho laa zho pquiitsgzhib nëz lo xcan co, haxta bzooblo zho lo liu, rdeed zho xquizh lo Dios 12 rnee zho:
¡Scaw! Luu none dziooḻnie no,
none tibaque gneedz no xquizh lo luu,
luu rieguiaḻ dziuuṉnon no; sac luu nac xDios no.
Luu nac nac meṉ ne rieṉraa, meṉ ne rap poder;
gacxe waa luu none ycaania grëse diidz ndzon,
gzataa dze, niicle nadzew, gzhew, ni grëragaa izdoo ne ziaada. ¡Sca none gaca!
13 Dzigo bnabdiidz tib meṉgol co, në me lo naa:
―¿Pe naṉ luu sca cho nac grë zha ne nacw lar nquits qui? ¿Pe naṉ luu pa nëz ziaad zho?
14 Dzigo rep naa lo me:
―Naṉd naaw. Bzhiguieḻ bnëw lo naa.
Nëchaa me:
―Lëë grë zha qui goṉ bded grëtaa guieḻnëdox ne goc lo guidzliu. Laa zho nacw lar nquits qui, sac wbig zho lo Jesús psaṉmbe xchen me zho lo doḻ. 15 Gacxe waa squitaa ndzon ndxie zho gax lo zhixcan ro Dios, dze guieel quiayooḻnie zho me leṉ xyadoo ro me. Me nac meṉ ne quianap zho grëse zho; 16 led yedraa niina guet gbin zho, guet nisgaa zho; led yedraa niina ctsuu ngbidz zho, sonëëggaa zho. 17 Meṉ ne nac Carner yeeṉ ne zo delant lo xcan ro qui, me gdeed ncuaaṉe gow zho, ni zigne rienie baxtor xpëcwxiil zho ro guiuu, sca zienie me zho zaatne quiada nis ne rdeed guieḻmban. Led yedraa niina goon zho.