1 Primer dxej xten xmaanga, cäjyru, gajd lo guedxliuj jianij che huij Marii Magdaleṉ lo baaga. Che bidzujṉni ro' baaga, bahuiini agubicaj guij ni suga' ro' baaga. 2 Dxejcti ruxuṉni gubi'ni te huiye'tzni lo Simón Pedr näjza lo stee xpejṉpac Jesús ni sanälazduxhni, räjpni lojreni:

―Ahuilääreni Dad neṉ baa, luxh dinu guidon caro sanärenini.

3 Dxejc biriguxuṉ Pedr näjza stee bejṉga, huijreni nez lo baa. 4 Ruxuṉ guiro'preni. Niluxh stee bejṉga ruxuṉduxhruni loj Pedr. Laani ganid bidzujṉni lo baaga. 5 Dxejcti guretäṉni te bahuiini neṉ ba-biliääga. Bahuiini te laad naga' relajdtis nani bidejb Jesús, luxh dini niu' neṉ baaga. 6 Dxejc bidzuṉgajc Pedr, biugajcni neṉ baaga, bahuiini naga' relajdga te laad. 7 Bahuiizani lajd ni guyu' yejcni, ni'c nie'tni saru, naga'ni te laad. 8 Dxejcti biu' stee bejṉga nani bidzujṉ ganid. Che bahuiini neṉ baaga, huililajzni gubaṉsac Jesús. 9 Sa'csi gajdreni gacbee ni caj lo reguijtz, cadro caj nanab guibaṉsacni loj rebeṉgut. 10 Dxejc gubisac guiro'p rexpejṉpacni rolijzreni.

11 Laltis suga' Marii cuä' baaga, cayoonni. Ni'cni laḻ ni cayoonni, basajb lojni te bahuiini neṉ baaga. 12 Dxejcti bahuiini lo tio'p xangl Dios, najcwreni ladnolbäj, sobga'reni, tejni nez cadro gojt yejc Jesús, steeni nez cadro gojt ni'ni. 13 Dxejcti räjpreni lojni:

―Nane', ¿xhicuent roonlu?

Räjpni lojreni:

―Sa'csi sanäreni Dad, luxh dina ganä caro huisa'nrenini.

14 Che gulujx guniini si'c, gubiréni, dxejc bahuiini loj Jesús suga' ro'c, niluxh dini niembee Jesús. 15 Dxejc räjp Jesús lojni:

―Nane', ¿xhicuent roonlu? ¿Chu rguiillu?

Marii bejn xhigab laa dade' ni rcanäj huertga, ni'c räjpni lojni:

―Dad, palga luj sanäluni, gunii caro gudixhluni te guiliäsä́ni te chanää́ni.

16 Dxejcti räjp Jesús lojni:

―¡Marii!

Dxejc gubiré Marii, räjpni neṉ xtidx hebreo:

―¡Raboni!

(Säloj diidxga “Mastr”.)

17 Dxejcti räjp Jesús lojni:

―Na'c guiniaazlu narä sa'csi gadna cha'a lo Xtadä xhaguibaa. Huij loj rebetzä, huiye'tz lojreni, cha'a lo Xtadä, näjza Xtadtu, loj Xtiozä näjza Xtiooztu.

18 Dxejcti huij Marii Magdaleṉ, bidzujṉni loj rexpejṉpacni badeedni didxcoob, räjpni:

―Abahuiä lo Dad Jesús.

Räjpzani lojreni guiraa recos ni gunii Jesús lojni.

19 Che gojl gudxej, najcni dumingw, primer dxej xten xmaan, abiäudzu'tz ro lä' ro' yu' cadro tre' rexpejṉpacni, sa'csi rdxejbreni rexpejṉ Israel. Chela bidzujṉ Jesús, guzujni nez galäiireni, räjpni lojreni:

―Suchu yäḻrbedxi lastootu.

20 Che guniini si'c, baluigajcni reṉaani lojreni näjza cuä' xcustiini. Ni'cni bibaduxhlajz rexpejṉpacni che bahuiireni lo Dad Jesús. 21 Dxejc räjp Jesús lojreni stehuält:

―Suchu yäḻrbedxi lastootu. Si'c ni baxhaḻ Xtadä narä, si'cza ruxhaḻä la'tu.

22 Che gulujx guniini rediidxga, balejbni yejcreni, räjpni, lojreni:

―Suguibajṉ Sprit Dxan xten Dios neṉ lastootu. 23 Rextojḻ rebejṉ nani siäḻlajztu, sibicajreni. Rextojḻ rebejṉ nani ditu jiäḻlajz, siannäjreni redojḻga.

24 Tomás, ni laaza Didimo, najcni te retzubitio'p xpejṉpac Jesús. Rutini che biääd Jesús loj rexpejṉpacni. 25 Dxejcti räjp rexpejṉpacni lojni:

―Abihuiinu loj Jesús, agubaṉsacni loj rebeṉgut.

Dxejcti laani räjpni lojreni:

―Palga dina fiä loj reṉaani cadro caj seen xten reclaab, palga dina guqui'tzä bicueṉaä́ cadro guyu' claabga, guqui'tzäza ṉaa cadro bixal cuä'ni, di lazä chalii gubaṉsacni loj rebeṉgut.

26 Che gudejd xhujṉ dxej, tresac rexpejṉpacni neṉ yu', nadxaagza Tomás lojreni. Niäudzu'tz yu'ga, luxh chela gucbeereni abidzujṉ Jesús, guzujni galäiireni, räjpni lojreni:

―Suchu yäḻrbedxi lastootu.

27 Dxejcti räjpni loj Tomás:

―Baqui'tz bicueṉaalu ree loj patṉaä, basäḻza ṉaalu cuä'äre, na'c ractio'p lajzlu, huililajzpac gubaṉsacä loj rebeṉgut.

28 Dxejcti räjp Tomás lojni:

―¡Xtadä, Xtioozä!

29 Dxejcti räjp Jesús lojni:

―Sa'csi abahuiilu loä, Tomás, huililajzlu. Chicbaa renani mase direni fii, rililajzreni xtidxä.

30 Xhidalroduxhru dzuun bejn Jesús nez loj rexpejṉpacni, nani di nicaj lo guijtz. 31 Redzuunre nani bejn Jesús nani cuaj lo guijtzre cuajni te chalilajztu diidxre: Jesús najc Crist, nani cabäjz rebejṉ jiääd, Xi'n Dios. Luxh che chalilajz te bejṉ xtiidxni, sajpni yäḻnabajṉ par tejpas.