1 Nucá, Juan, huacára'ari marí papera pijló. Phíyu'uque cha nucá. Tupana ja'apiyá jema'ajeyo caja picá nujhua'até. Tupana i'ihuapacáreru rijluhua ajopana ina'uqué e'iyayá caja picá. Pijló, piyánijlo hua'até nuhuacára'a marí papera. Iqui'ija nuhuátacarena icá. Uncá nucaja calé huátari icá íqui'ija. Ñaqué caja ajopana huátaca icá íqui'ija. Hue'epiño quehuácaje puráca'aloji nacojé necá numá nacú. 2 Iqui'ija huahuátaca icá, quehuácaje puráca'aloji ja'apiyá hue'emacale ijhua'até. Caja queja hue'emajica ra'apiyá matajnaco. 3 Jesucristo jara'apá Tupana. Nuhuata ricá Ri'irí, hua'até la'acá icá palá, i'imacáloje Ripechu aú palá penaje. Marí que huani nuhuátaca ijló ricá, íqui'ija Tupana huátacarena i'imacale.

4 Pu'ují nupechu, nuhue'epícale piyani naquiyana a'acá nanacojó quehuácaje puráca'aloji. Raú nala'á Huara'apá Tupana huacára'aca que. 5 O'ohueló, chuhua numájica pijló marí que: Jesucristo huacára'ari huecá, huahuátacaloje íqui'ija pecohuácaca penaje. Uncá huajé calé marí numacare nacú pijló. Caja queja rihuacára'aca huecá, huaqueño'ocá ra'apiyá jema'acana huacajé. 6 Iná huátacachu íqui'ija Tupana, iná la'á ripuráca'alo quemacá que. Iqueño'ocá ra'apiyá jema'acana huacajé, icá hue'epiño méqueca rihuacára'aca huecá, huahuátacaloje íqui'ija pecohuácaca raú penaje.

7 Caja cajrú pajlácachina ja'apaca pajlácaje nacú marí eja'ahuá chu. Uncá na'alá nanacojó Jesucristo yucuna. Apojó nemacá rinacu: “Ri'imaqué marí eja'ahuá chu huacajé, uncá ina'uqué huecá que calé ri'imajica.” Marí que quemacaño pajlaño rinacu majopeja. Chapú péchuruna caja necá Jesucristo nacú. 8 A'aniya inacojó napuráca'alo, napichátajica ijló quehuácaje puráca'aloji. Caja palá la'acana nacuja icá. Marí que ila'acá aú palani nacaje i'imajica ijló je'echú chu. Ñaquele a'aniya inacojó napuráca'alo marí caje apichaco piyá ijló.

9 Apala apú i'imari yucu. Uncá Jesucristo puráca'alo chuhuá calé ca'ajná ri'imá yucu ina'uquejlo. Marí caje aú iná hue'epí uncá ripechu i'imalá Tupana pechu chuhuá. Eyá i'ihuapataro Jesucristo puráca'alo cha, pechu i'imari Jesucristo pechu chuhuá. Tupana pechu chuhuá caja ripechu. 10 Apala apú ina'uqué iphájeri ca'ajná inacu. Uncá ca'ajná rehuíña'atalaje icá nacaje nacú, Jesucristo jehuíña'ataca rinacu que caja. Iyuríniya ilé caje mujlúca'aca iñacaré chojé, rehuíña'atacaloje icá penaje. Imániya caja rijló marí que: “Eco Tupana la'á picá palá” que. 11 Marí que imájica ee rijló, pu'uhuaré la'ajeño i'imajeño rijhua'até.

12 Re cajrú nuhuata nacú quemacana pijló. E'iyonaja uncá nuhuátala rilana'acana papera chojé. Nuhuata ichaje i'ijnacana. Ejéchami nupura'ajico ijhua'até rinacu. Marí que la'acana aú pu'ují huapechu i'imajica.

13 Pilara'úna pila'útuna, quele quemaño pinacu: Eco palá olahuilajlo ca'ajnó. Tupana i'ihuapacáreru rijluhua ajopana ina'uqué e'iyayá pe'ehueló. Maáreje ritajnó.