1-2 Pablo nucá. Tupana a'arí nucá, nu'umacáloje Jesucristo huacára'acarena naquiyana penaje. Caja queja Tupana huátaca nu'umacá. Huanaquiyana, Sóstenes, hua'até huahuacára'a ijló marí puráca'aloji pajimila Corinto ejo. Jesucristo hua'atéjena icá. Ijló huahuacára'a marí papera. Tupana le'ejena ina'uqué icá, Jesucristo chuhuá i'imacale. Tupana a'arí icá, i'imacáloje palá la'acaño Tupánajlo penaje. Ñaqué caja ra'acá ina'uqué ajopana, ajopana que piyuque eja'ahuá chu i'imacaño e'iyayá. Ne'emacáloje palá la'acaño rijló penaje, ra'á necá. Jesucristo nacú nemá: “Huahuacára'ajeri” que. Nahuacára'ajeri ricá. Eyá piyuque huahuacára'ajeri caja ricá. 3 Tupana Huara'apá. Nuhuata ricá, huahuacára'ajeri Jesucristo, quele la'acá ipechu palá. Nuhuata caja i'imacá Tupana palamane, rila'acáloje icá palá penaje.

4 Tupana hua'até pura'acano aú nu'umá rijló palá rila'acá icá yucuna. Jesucristo palamane Tupana la'arí icá palá huani. 5 Jesucristo hua'atéjena i'imacale, cajrú huani Tupana la'acá icá palá piyuqueja. Palá ihue'epica quehuácaje puráca'aloji nacojé raú. Ñaquele ipura'ó palani puráca'aloji nacú rihuátaca que. 6 Caja ihue'epí Jesucristo puráca'alo nacojé nu'umacare yucuna ijló i'imacá. 7 Ñaquele chuhua uncá na nacú calé ila'á camu'ují, ihue'epícale Tupana palamane icá. Ñaqueja ri'imajica ijló Jesucristo iphájica ejená. Riphájica majó huátacana nacuja icá me'etení. 8 Tupana la'ajeri ipechu caphí riphájica majó ejená. Marí caje aú uncá na pu'uhuaré ila'acare i'imalaje ijló rihuacajé. 9 Pajluhuaja chuhuá péchuri Tupana. Rimacá que rila'acá nacaje. Ricá a'arí icá, i'imacáloje Ri'irí Jesucristo que caja rijhua'até penaje. Huahuacára'ajeri huani Jesucristo.

10 Nojena, Jesucristo puráca'alo aú numá ijló marí que: I'imá pajluhuaja queja pajhua'atéchaca. I'imaniya ajopana que paliyácaca. Nacaje i'ijnatácare nacú ipéchuhua, i'imacáloje pajluhuaja queja caja ijló penaje. Marí queja i'imajica aú, nacaje i'ijnatácare nacú ipéchuhua i'imajeri pajluhuaja chuhuá. Ñaqué caja nacaje ihue'epícare itucumó, i'imajeri ijló pajluhuaja queja caja. 11 Nojena, marí nacú numá ijló me'etení, uncá paala ri'imacale rehuá. Cloé ejena i'imari nojló riyucuna. Marí que nemacá inacu: “Aca'ácacajo nacuja necá pajhua'atéchaca rehuá.” 12 Marí caje nacú nuhuata quemacana: Uncá paala nacaje imacare nacú. Apú nacojé, apú nacojé que imacá. Uncá huani paala i'imacá pajhua'atéchaca. E'iyajena quemaño inacuhuá: “Pablo hua'atéjena huecá” que. Ajopana inaquiyana quemaño piño nanacuhuá: “Apolos hua'atéjena huecá.” Ajopana piño quemaño nanacuhuá: “Pedro hua'atéjena huecá.” Ajopana piño quemaño nanacuhuá: “Jesucristo hua'atéjena huecá.” 13 Uncá ajopana ja'apiyá, ajopana ja'apiyá que calé i'imacaño huecá Jesucristo ja'apiyá jema'ajeño. Uncá nucá, Pablo, calé taca'arí a'ahuaná apiyácacanami nacú ichaya. Uncá caja nupuráca'alo aú calé nala'á bautizar icá. 14 Uncá nula'alá bautizar icá. Palani nojló, uncale nula'alá bautizar icá. Grispo, Gayo, queleja calé nula'á bautizar, iyamaja. 15 Marí que ri'imacale, uncá ina'uqué quemalá nanacuhuá: “Bautizar la'aquéjanami huecá Pablo puráca'alo aú.” 16 Re jo'ó ajopana nula'acárena bautizar. Huajé riphíchaca nupechu nacojé. Nula'á caja bautizar Estéfanas, riyajalo, riyani, quele. Uncá nuhue'epila palá nula'acá bautizar ajopana ca'ajná, uncá ca'ajná. Queleja ca'ajná nula'á bautizar. 17 Uncá Tupana a'alá nucá ina'uqué bautizar la'ajeri penaje. Jesucristo huacára'ari nu'umacá yucu ina'uquejlo. Méqueca Tupana i'imataca ina'uqué capichácajo liyá yucuna rihuacára'a nu'umacá najló. Jesucristo taca'arí a'ahuaná apiyácacanami nacú huachaya i'imacá. Raú ri'imatá ina'uqué capichácajo liyá. Nu'umá riyucuna ijló i'imacá huacajé, nuhuata ipechu i'imacá rinacuja. Ñaquele uncá nupura'aló palá huani ajopana cajrú hue'epícaño pura'acó que caja.

18 Jesucristo taca'arí a'ahuaná apiyácacanami nacú ina'uquéjloje penaje. Capichájeño Tupana liyá pechu nacú ri'imá: “Mapéchuruna i'imacáñojlo penaje riyucuna.” Eyá huajló, Tupana i'imatácarena capichácajo liyá, palánija huajló riyucuna. Palani huajló riyucuna, rimacale huajló méqueca Tupana i'imataca iná capichácajo liyá Jesucristo palamane aú. 19 Tupana puráca'alo lana'aquéjami quemari marí que:

20 Chuhua uncá na penaje calé najló nacaje cajrú nahue'epícare nacojé i'imacá. Uncá caja na penaje calé nacaje nehuíña'atacare nacú ajopana ina'uqué. Cajrú nacaje napura'acaro nacú, uncá caja na penaje calé ricá. Nacaje ina'uqué hue'epícare nacojé marí eja'ahuá chu, uncá na penaje calé ricá, Tupana la'acale ricá majopéjari queja najló. 21 Hue'epiri huani Tupana. Aú calé ri'imatá ina'uqué capichácajo liyá, napechu i'imacá aú caphí ripuráca'alo chojé. Raú ja ri'imatá ina'uqué capichácajo liyá. Marí que ri'imacale, uncá meño'ojó iná hue'epila mecajeca Tupana, nacaje nacojé iná hue'epícare aú. Ñaquele riyucuna hue'emacare ajopana, ajopánajlo que, majopéjari queja ricá cajrú ina'uquejlo.

22 Judíona huátaño Tupana la'acá najló nacaje cajrú rená que'ená penaje, nahue'epícaloje ricá raú penaje. Ajopana piño huátaño hue'epiri huani i'imacá yucu najló, nahue'epícaloje quehuaca huánica ricá raú penaje. 23 Eyá huecá i'imaño Jesucristo yucuna. Nacúhua'ata ri'imacá a'ahuaná apiyácacanami nacú ina'uqué chaya. Riyucuna hue'emá ina'uquejlo. Riyucuna jema'acana aú judíona quemaño rinacu: “Uncá huajlojé penaje calé ricá” que, uncale nahuátala rema'acana. Mapéchuruna puráca'alo queja ajopánajlo riyucuna. 24 E'iyonaja Tupana a'arí ina'uqué naquiyana, ne'emacáloje ra'apiyá i'imacaño penaje. Najló calé capechuni huani Tupana, rila'acale palá ina'uqué nacú Jesucristo palamane aú. Jesucristo palamane aú caja Tupana i'imatari necá capichácajo liyá. Ñaqué caja ricá judíonajlo, ajopana ina'uquejlo hua'até. 25 Tupana huacára'ari Jesucristo, ritaca'acáloje ina'uqué chaya a'ahuaná apiyácacanami nacú penaje. Aú calé ne'iyajena pechu nacú ri'imá: “Meque uncá huani ripechu i'imalá” que. E'iyonaja ricá aú richá'ata capéchuruna pechu. Jesucristo taca'acá a'ahuaná apiyácacanami nacú huacajé, napechu i'imá rinacu: “Meque maliyaru huani ricá.” E'iyonaja raú Tupana la'arí cajrú huani; uncá na i'imalá ina'uqué e'iyayá, la'arí ñaqué caja palá.

26 Nojena, ihue'epí marí: Tupana i'ihuapari rijluhua icá ajopana ina'uqué e'iyayá, i'imacáloje rijhua'atéjena penaje. Uncá rimalá inacu: “Cajrú hue'epícaño necá” que. Rihuátaca que ri'ihuapacá rijluhua icá. Mequeleja calé inaquiyana i'imaño cajrú hue'epícaño. Mequeleja inaquiyana i'imaño icó huacára'ajeño naquiyana. Mequeleja cale inaquiyana i'imaño ihuacára'ajeño yaní. 27 Ina'uqué nemacárena nacú: “Huahuejáputenami necá, uncá pechu i'imalaño necá” que, ilé cajena calé Tupana i'ihuapari rijluhua, rapáña'atacaloje capechúruna i'imacaño nacú penaje. Necá ajopana quemacárena nacú: “Uncá caphí calé péchuruna necá,” necá calé Tupana i'ihuapari rijluhua, rapáña'atacaloje caphí péchuruna i'imacaño nacú raú penaje. 28 Tupana i'ihuapari rijluhua necá, ajopana ina'uqué quemacárena nacú: “Majopéjaruna necá” que. Uncá ajopana ina'uqué iphálarena ja'apí ne'emacá. “Uncá na penájena calé necá,” que napechu i'imacá nanacu. Ilé cajena ina'uqué Tupana i'ihuapari rijluhua, rapichátacaloje nachaje i'imacaño pechu raú penaje. 29 Marí cajé aú uncá na calé la'ajeri ricó hue'epiri que huani Tupana jimaje. 30 Tupana a'arí icá, i'imacáloje Jesucristo hua'atéjena penaje. Jesucristo ja'apiyá i'imacaño hue'emacale, huahue'epí Tupana palamane huecá. Jesucristo chojé calé rilamára'ata rijluhua huecá pu'uhuaré huala'acare liyá. Richojeja caja rila'á huecá rile'ejena ina'uqué penaje, hue'emacáloje palá la'acana nacuja penaje. Raú ja caja ri'imatá huecá pu'uhuaré huala'acare liyá, huamanaicho huala'acare liyá. 31 Ñaquele Tupana puráca'alo lana'aquéjami quemacá que, queja huajló ricá. Marí que rimacá: “Ipura'aniyo inacuhuá palá. Hue'emacana huani Tupana nacuja calé iná pura'ó palá, ripalamane hue'emacale.”