Yook 139
Yook ambo bi ye karub yeman. God yaningko kankooni yook Dewidbed wongkoon.
1 O Yariman, ne kuu
ebbed andangke darobeweneb kaadkeruwewen.
2 Ne yiri dibirimainiib yaro dobirimainiib korem kuu ebkaadkerewen,
eb kuu ambab angka doreeb kumban nembed inamen kowaan korem kwangkon ebkaadkerewen.
3 Ne dobiri kiwaaniib ne angki kerekmeniib korem kuu darobe ebkaadkerewen,
ne kamenabi korem kuu ebkaadmo kerewen.
4 O Yariman, ne mongkodkono ari weng aningko mimo mogeed dakmindo kumbed
komo yedmandamiin korem kuu ebkaadmo kerewen.
5 Ne kebed angkara angkara korem kuu ebbed kanawanewande durunewen,
kwane eb dingkimbed ne ari koweneb awawewen.
6 Ne yaa ebkaadkeruwewen ye kerekmen kuu miin manimanandeb kii, ne kuu kwamune meenindeban ii,
kuye inamen kaadkeri kuu miin arimbed, nembed meendobe kabaki kuu yirimo.
7 Eb Kingkin yaambed wene kunaya biknaniin? Dowan.
Eb kerebiri arimbed wene kunaya kombiri wananiin? Dowan.
8 Ewen ari daananiin kuu eb kuu kwari doreeb,
kwane dukniwendan yi doriib yirimbed kawene angkaniin kangkon eb kuu kuri doreeb.
9 Ma, ne kuu wanwene aron yaro minimaun kuu burudande kwangkakoo kai wananiin,
o karamok yara yane dobaraniin kuu,
10 kuyaa kwangkon eb dingkimbed ne nen kinban wananeeb,
kwane eb dingki wiwimbed ne yaa angkumowaneene kangdommo dobaraniin.
11 Kekamune yedmaniin, “Anam kuu kumunbed ne kebenewaneene biknaniin,
kwane nambiri ne yaa yuroon kuu amnoom kumunmo keraneen.” andaniin kuu,
12 kumun aom kuu yiminmo wedmaneeb,
kwane amnoom kuu awingyab areb yuraneen,
amborom kuu kumuniib nambiriyiib kuyaa kuu eb ma meenimokban kowe.
13 Kedi, ebbed ne id yaa kuu yeka yeka wuub nimingke nongkobewen,
ebbed ne id kuu ne ena yu kabeyob aom wuub nimingkewen.
14 Ne kuu binangke une eb yaa anam andi yeman ongmewewen kowe eb yaa eso andaan.
Eb ambangkanabi kuu manimanandewiib,
kukuu anammo nekaad.
15 Ne kuu biknimbon aom ongmewewen,
okad niindem yiri ongmewewen* “Biknimbon” kuyiib “okad niindem yiri” kuyiib yi weng id angkara kuu “ena yu kabeyob aom”. kui,
kuyaa kuu ne kono kono kuu ebkaad, ne yaa komo keroon kuu eb yaa ma biknindo.
16 Ne id kuu mogeed wuub nimingkindo yaron kuu wedmewewen.
Ne wooni yaroniib bobni yaroniib wad doriin yaron koremiib kuu
ne woonindo yaron anuk yirimbed
ebbed kinekoreb eb buk aom wongkewen.
17 O God, eb meeni kuu miin manimanandewiib andaan kii.
Yi korem kuu miin yemoon kai!
18 Ne kuu kwane kimingkembaraniin kuu
kubuk mimim kimingki arebban, kimingke dorindeban.
Kwane angke awari yaro dembaniin kuu domobdainban ewiib dobaraniin.
19 O God, miin arewa kamenabidan kuu yeene nongkobe!
Yeremboromdan, yiib kuu ne yaa angkanime!
20 Kedi, yi kuu inamen arewa kumbed eb dowad dakmimaib,
kwane eb bondan kuu ewaningko monmarimaib.
21 O Yariman, eb yaa arud wandembirimaibdan kuu nembed yi yaa arud wandembirimainoo? Anamaa.
Kwane, eb yaa manmo kerimaibdan kuu nembed yi yaa wunekare komyeng areb kerundimainoo? Anamaa.
22 Nembed yi yaa naawonmo arud wandembirimain kumbedmo,
yi kuu ne bondan andimain.
23 O God, ne yaa kuu andangke darobeneb ne niindem aom kuu ebkaadkere.
Kwane komboon kaamobeweneb ne inamen kabakanabi yi meendobi kuu ebkaadkere.
24 Kwane ne yaa kuu inamen arewa maayiib keroka kankorokbe.
Kwane wadkeri aron korem ye dobiri kiwaan ari kuu ne nen kinban wene.
*Yook 139:15: “Biknimbon” kuyiib “okad niindem yiri” kuyiib yi weng id angkara kuu “ena yu kabeyob aom”.