Yook 17
Dewid ye kurikuri yook.
1 O Yariman, wengyundi amun kawe ande kaamobdako wengambere.
Ne baandi kee wengambere.
Ne kurikuri kee wengambere,
ne weng kee birandi ye inamen yaambed dembindo kowe.
2 Ebbed ne dowad wengyunde ma ambarakmindo ande,
ewindobbed yorokmo kiwaan wedme.
3 Eb kuu ne niindem aom wedmene amnoombed andangkewe,
kombon darobewimaab kumban ambarakmi maa ma wedmaabban.
Ne inamen kowaan kuu ne wengbed ambarakmain andaan,
4 okad yiridan kwamunemban.
Eweng awine kandaan kowe,
yeremboromdan yi kiwaan yaa kangkadmimain.
5 Ne kuu eb kiwaan yirimo dodkanmo weniin,
ne yon kuu ma monkare kimyen angka ma dodkan winindo.
6 O God, ne kuu eb yaa baandimain,
amborom kuu ebbed inanduwimaab kowe,
kerendem kawe ne kurikuri wengambere.
7 Kane kane yi bondan yaambed kirokmone ebbed kukbimaabbon aombed dobirimaib kuu,
eb dingki wiwimbed ben burudande bindimaab kowe,
eb womoniyiibban ye mimyob dowaken miin darewoob yi yaa korokbende,
kukuu binangki yeman, miin darewoob anam kowe.
8 Ewindobbed ebka dorondandemoon areb ne nen dorondande.
On ayam yu mana kuu yu dongkon dem aom nen biknemoon areb ne nen bikne.
9 Arewa kamidanbed nenbandande kamiib yaa kuu kwane dorondande,
ne neene kowandamiibdan ne kanawanewandiwen yaa kui.
10 Yi mimyob keendi kuu dowan kai,
yi kuu kerengkan kami ye wengmo dakmimaib.
11 Yi kuu ne kerewenmo miniwen kumbed kibikee ne kanawanewandiwen,
kwane kereknenmo dorenib ne nen okad yiri korarande doriib.
12 Yi kuu laiyonbed dingkan mungi bobnemoon areb doriib,
laiyon darewoobbed biknimbon aombed kerekne diberemoon areb kui.
13 O Yariman, yaro dembe! Yi durunde yenbande ben yiri kubudere.
Eb kerewangbed arewa kamidan yaa ne nen burudande angka kowe.
14 O Yariman, eb dingkimbed karub kwamenabimaib yaa ne nen burudande angka kowe,
okad kiridan okad yiri ye wadkeri ye kakmanmo kandi dowad kwanimaibdan yaa kui.
Ebbed bobne komberewendan yaa kuu animan bangkandaawe ane mikmonaiwe yi mungi dowan kerimaan,
kwane yi meed kangkon yiminmo dobirimaib,
kwane kuye bangkandembiri yeman kuu yi awoya yaa kangkon angkeen.
15 Kwane, ne kuu yorokmo dobiri yaambed eb murubia wedmaniin.
Kwane ne kuu unuk yirimbed yaro dembaniin kuu eb kuru wedmeni kubaniin.